Գալուստ Սահակյան. Կիպրոսի խորհրդարանը հստակ «ոչ» ասաց այլատյացությանը, ռասիզմին ու խտրականությանը 3 ապրիլի 2015 - 11:05 AMT PanARMENIAN.Net - Ընդունելով Հայոց ցեղասպանության ժխտումը քրեականացնող բանաձև՝ Կիպրոսի խորհրդարանը հստակ «ոչ» ասաց այլատյացությանը, ռասիզմին ու խտրականությանը: Այս մասին ապրիլի 2-ին հայտարարել է ՀՀ ԱԺ նախագահ Գալուստ Սահակյանը, ելույթ ունենալով Կիպրոսի Ներկայացուցիչների պալատում, հայտնում է ԱԺ մամուլի ծառայությունը: Խոսնակը մասնավորապես ասել է. «Ես եկել եմ մի երկիր, որը դարեր շարունակ բարեկամական կապեր է ունեցել Հայաստանի հետ: Այս հանգամանքի հիմքում մեր պատմական ընդհանրություններն են, նման ճակատագրերը: Այսօր ես պատիվ ունեմ ելույթ ունենալու խորհրդարանում, որն առաջիններից մեկը, իսկ Եվրոպայում առաջինը՝ 1975 թ. ճանաչեց և դատապարտեց Հայոց ցեղասպանությունը՝ պահանջելով վերականգնել պատմական արդարությունը: Ինչպես գիտեք, 2015-ին լրանում է Ցեղասպանության 100-րդ տարելիցը: Մեր խորին երախտագիտությունն ենք հայտնում Կիպրոսի Ներկայացուցիչների պալատում Հայոց ցեղասպանության ժխտման համար քրեական պատասխանատվություն սահմանող բանաձևի ընդունման համար: Ցեղասպանությունը ոչ միայն հանցագործություն է մարդկության դեմ, այլ նաև ֆաշիզմի և անհանդուրժողականության դրսևորում, կյանքի իրավունքի կոպիտ խախտում: Նման սարսափելի ոճիրների կրկնությունը կանխելու լավագույն միջոցը մարդկության դեմ կատարված հանցագործությունների ճանաչումն ու դատապարտումն է: Ցեղասպանության ժխտումն այդ հանցագործության անմիջական շարունակությունն է», հայտնում է Armenia Today-ը: Ապրիլի 2-ին Կիպրոսի խորհրդարանն ընդունեց Հայոց ցեղասպանության ժխտումը քրեականացնող օրինագիծը, որը ներկայացրել էին խորհրդարանի բոլոր խմբակցությունները: Կիպրոսի խորհրդարանը միաձայն ընդունեց Հայոց ցեղասպանության ժխտումը քրեականացնող օրենքը: Ըստ օրենքի, ռազմական, մարդկության դեմ հանցագործությունների և ցեղասպանությունների ժխտումը, եթե այն ճանաչված է Միջազգային դատարանի կողմից, պատժվում է մինչև 5 տարվա ազատազրկմամբ և/ կամ 10 000 եվրո տուգանքով: 2014-ի սեպտեմբերի 9-ին Հունաստանի խորհրդարանը ձայների մեծամասնությամբ՝ 54 կողմ, 42 դեմ ու 3 ձեռնպահ, ընդունեց Ցեղասպանության ժխտումը քրեականացնող՝ «Այլատյացության դեմ պայքար» անվամբ օրինագիծը: Դրա լրամշակված տարբերակով Հունաստանի տարածքում քրեական պատասխանատվության կենթարկվեն ոչ միայն հրեաների, այլև հայերի և Պոնտոսի հույների ցեղասպանության ժխտման համար: Օրինագծով սահմանվում է, որ այն անձինք, ովքեր կժխտեն կամ բացասական կարտահայտվեն Ցեղասպանության մասին, կազատազրկվեն 3 ամսից մինչև 3 տարի: Եթե օրենքը խախտողը պատգամավոր է կամ պետական պաշտոնյա, սահմանվելու է 3-5 տարվա ազատազրկում: Ֆիզիկական անձինք նման խախտման համար կարող են տուգանվել՝ 10-ից մինչև 100 000 եվրոյով: Ժխտում ենթադրող միջոցառումներին մասնակցության համար նախատեսվում է 5-20 000 եվրո տուգանք: Շվեյցարիայից և Սլովակիայից հետո Հունաստանը ԵՄ անդամ երրորդ պետությունն էր, որ քրեականացրել է Հայոց ցեղասպանության ժխտումը:Նմանատիպ օրինագիծ է քննարկվում նաև Ֆրանսիայում: ԱԺ նախագահի գլխավորած պատվիրակությանն ընդունել է Կիպրոսի Հանրապետության Ներկայացուցիչների պալատի նախագահ Յանակիս Օմիրուն: Հանդիպման ընթացքում Հայաստանի Հանրապետության Ազգային ժողովի նախագահը բարձր է գնահատել երկու երկրների միջև ընթացող քաղաքական երկխոսությունը և այդ համատեքստում մեծապես կարևորել է խորհրդարանական դիվանագիտության դերը: Գալուստ Սահակյանի խոսքով՝ Հայաստանը հետամուտ է շարունակելու համագործակցությունը Եվրոպական միության հետ բոլոր ձևաչափերով, հնարավոր բոլոր ոլորտներում և ուղղություններով՝ նկատի ունենալով Հայաստանի պարտավորություններն այլ ինտեգրացիոն գործընթացներում: Ազգային ժողովի նախագահը խոսել է նաև Թուրքիայի կողմից Կիպրոսի մասնատման մասին՝ նշելով, որ Հայաստանը երբեք չի ընդունել և չի ընդունի եղբայրական Կիպրոսը մասնատելու որևէ փորձ: Նա նշել է, որ Հայաստանը կողմ է բանակցությունների ճանապարհով Կիպրոսի հիմնախնդրի խաղաղ կարգավորմանը՝ հիմք ընդունելով ՄԱԿ-ի բանաձևերում արտահայտված սկզբունքները, որոնց համաձայն՝ Կիպրոսի հիմնահարցի կարգավորումը պետք է հիմնվի երկհամայնք, երկզոնալ դաշնային կառույցի վրա՝ մեկ ընդհանուր իշխանությամբ և մեկ քաղաքացիությամբ: Գալուստ Սահակյանը խոսել է նաև Ադրբեջանի ռազմական ագրեսիայի և այդ երկրի իշխանության կողմից վարվող անառողջ քաղաքականության մասին: Կիպրոսի Ներկայացուցիչների պալատի նախագահն իր երախտագիտությունն է հայտնել հայկական պատվիրակությանը Կիպրոս այցելելու և կիպրացիներին մշտապես սատարելու համար:Յանակիս Օմիրուն նշել է, որ Կիպրոսը մշտապես կաջակցի եղբայրական Հայաստանին միջազգային կառույցներում, ինչպես նաև Եվրոպական միությունում կլինի Հայաստանի բարեկամն ու աջակիցը: Ուշագրավ
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը Ամենաընթերցվողը բաժնում | Փաշինյանը մեկնել է Դանիա Նա կմասնակցի «Առաջնագծից․ Հայաստանի ժողովրդավարության պաշտպանությունը» թեմայով քննարկմանը Երևանը կհյուրընկալի կարատեի Եվրոպայի 2025-ի մեծահասակների առաջնությունը 2027-ին Եվրոպայի կարատեի պատանիների, երիտասարդների առաջնությունը ևս կանցնի Հայաստանում Զբոսաշրջության կոմիտեի նախագահն ազատվել է պաշտոնից Պօղոսեանը նշանակվել էր պաշտոնում 2022–ի հունվարին Բագրատ սրբազանը՝ առաջնորդությունը քաղուժերին փոխանցելու մասին․ Թող գան, վերցնեն, ով ցանկանում է «Ես բոլորի հետ խոսում եմ»,–ասել է նա |