Վատիկանը մտադիր չէ բանավիճել Թուրքիայի հետ. Պապի խոսքը «շատ հստակ էր»

16 ապրիլի 2015 - 14:30 AMT

PanARMENIAN.Net - Վատիկանը մտադիր չէ բանավիճել Թուրքիայի հետ, հայտարարել է Վատիկանի խոսնակ հայր ֆեդերիկո Լոմբարդին` մեկնաբանելով Անկարայի արձագանքը Հռոմի պապ Ֆրանցիսկոսի հայտարարությանը Հայոց ցեղասպանության մասին: «Վատիկանն ի գիտություն է ընդունել Թուրքիայի արձագանքը և մտադիր չէ բանավիճել»,-ասել է նա:

Լոմբարդին նշել է, որ Պապի խոսքը «շատ հստակ էր»: «Նա մեջբերել է Հովհաննես Պողոսի Երկրորդի և կաթողիկոս Գարեգին Երկրորդի 2001 թ. հռչակագիրը և այդ համատեքստում կիրառել «ցեղասպանություն» եզրույթը»,-ասել է նա: -Սակայն մենք ի գիտություն կընդունենք թուրքական կողմի առարկությունները: Մենք երբեք չենք ձգտել բանավեճի»: Նա նաև նշել է, որ Թուրքիայի նախագահ Էրդողանի առաջարկությունը համատեղ հանձնաժողովի մասին «հետաքրքիր էր և նշանակալի»: Լրագրողների այն դիտողությանը, որ Էրդողանի այդ առաջարկը նոր չէ, հայր Լոմբարդին նշել է, որ Թուրքիայի կողմից Հայոց ցեղասպաության ժխտումը ևս նորություն չէ` հավելելով, որ Թուրքիան ազատ է Պապին բողոք հայտնելու հարցում: «Մենք ցանկանում ենք կանխել ցանկացած բանավեճ»,-ասել է նա, հայտնում է Armenia Today-ը:

Ապրիլի 12-ին Վատիկանի Սուրբ Պետրոսի տաճարում Հայոց ցեղասպանության 100-րդ տարելիցի առիթվ զոհերի հիշատակին պատարագի ժամանակ Հռոմի պապ Ֆրանցիսկոսն Օսմանյան կայսրությունում հայերի սպանություններն անվանել է «20-րդ դարի առաջին ցեղասպանություն»: «Հայոց ցեղասպանության, այդ անծայրածիր խենթ ողբերգության 100-րդ տարելիցը հիշելը պարտադիր է, որովհետև ուր հիշատակ չկա, այնտեղ չարիքը դեռ բաց է պահում վերքը: Ծածկել հանցանքը, նշանակում է թողնել, որ վերքն արյունահոսի», - ասել է Հռոմի պապը:

Վատիկանի Սուրբ Պետրոսի տաճարում Հայոց ցեղասպանության 100-րդ տարելիցին նվիրված պատարագը պատմական էր. առաջին անգամ էր Հռոմի պապը պատարագ մատուցում՝ հիշատակելով ցեղասպանությունը: Մինչ այժմ եղել են միայն աղոթքներ տարբեր ցեղասպանությունների զոհերի հոգիների հանգստության համար, բայց պատարագ դեռևս չէր մատուցվել: Հատկանշական է, որ պատարագը նախաձեռնել է հենց Հռոմի պապը: Ճնշումը նրա և Սուրբ Աթոռի վրա եղել է աննախադեպ: Թուրքական կողմն ամեն կերպ փորձել է խաթարել պատարագի անցկացումը, սակայն ջանքերը զուր են անցել: Իսկ պատարագից հետո թուրքական հիստերիան դեռ շարունակվում է՝ վարչապետի, արտգործնախարարի, այլ նախարարների մակարդակով:

Պատարագին ներկա են եղել ՀՀ նախագահ Սերժ Սարգսյանը, Գարեգին Բ և Արամ Ա կաթողիկոսները, պաշտոնատար այլ անձինք:

Ապրիլի 12-ին Թուրքիայի ԱԳՆ էր կանչվել Անկարայում Վատիկանի դեսպանը: Արտգործնախարարությունում դեսպանին հայտնել էին, որ Հռոմի պապի հայտարարությունը հիասթափեցրել և վշտացրել է իրենց, ինչպես նաև վստահության կորստի պատճառ է դարձել:

Թուրքիայի վարչապետ Ահմեթ Դավութօղլուն իր հերթին ևս կոշտ արձագանք էր տվել Հռոմի Ֆրանցիսկոս պապի երեկվա հայտարարությանը, գրում է թուրքական Vatan օրաթերթի կայքը: Դավութօղլուն հայտարարել է, թե այդ հայտարարությունը վայել չէ Պապին: «Հոգևոր առաջնորդներից ակնկալում ենք, որ խաղաղության կոչ անեն: Հռոմի պապի հայտարարությունները Եվրոպայում տարածված ռասիզմն է ավելացնում: Պապի հայտարարությունը միակողմանի է և անհիմն»,- ասել է նա:

Իսկ ապրիլի 13-ին Վատիկանում Թուրքիայի դեսպան Մեհմեթ Փաչաջըն Թուրքիա է կանչվել` խորհրդակցության նպատակով:

Ավելի վաղ Թուրքիայի նախագահը գրառում է կատարել Twitter-ի իր միկրոբլոգում` «դատապարտելով» Պապի հայտարարությունը երեք մեծ ողբեգությունների` «Հայոց ցեղասպանության, նացիզմի և ստալինիզմի մասին»: «Պապի հայտարարությունն անընդունելի է Թուրքիայի համար,-գրել է Էրդողանը:-Կրոնը չպետք է անհիմն հայտարարությունների համար հիմք ծառայի: Դա հանգեցնում է թշնամանքի և ատելության»:

Հղումներ թեմայով.

Armenia Today: Ватикан не намерен вступать в полемику с Турцией