Հանրաքվեին ընտրախախտումների դեպքերով ևս 2 մեղադրանք է առաջադրվել15 հունվարի 2016 - 14:45 AMT PanARMENIAN.Net - Քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժնում ավարտվել է թիվ 10/15 ընտրատեղամասում այլ անձի փոխարեն քվեարկելու դեպքի առթիվ հարուցված քրեական գործի նախաքննությունը։ Ձեռք բերված ապացույցների հիման վրա՝ մեղադրանք է առաջադրվել տվյալ ընտրատեղամասի հանձնաժողովի անդամին։ «Թրանսփարենսի ինթերնեշնլ» հակակոռուպցիոն կենտրոն-ի կայքում դեկտեմբերի 6-ին հրապարակվել էր ահազանգ, որ Երևան քաղաքի թիվ 10/15 ընտրատարածքում ընտրողը ընտրացուցակում ստորագրելիս նկատել է, որ իր եղբոր և նրա կնոջ անվան դիմաց ցուցակում ստորագրված է, սակայն հանձնաժողովը հրաժարվել է արձանագրել խախտումը։ Նյութերի նախապատրաստման ընթացքում պարզվել են թիվ 10/15 ընտրատեղամասի ընտրացուցակներում ընդգրկված այն ընտրողների տվյալները, որոնց փոխարեն, ըստ ահազանգի հեղինակի, մեկ ուրիշը քվեարկել է։ Դեպքի առթիվ Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 153-րդ հոդվածի հատկանիշներով։ Նախաքննության շրջանակներում ձեռնարկվել են անհրաժեշտ քննչական և դատավարական այլ գործողություններ՝ դեպքի բոլոր հանգամանքների բազմակողմանի, օբյեկտիվ և լրիվ հետազոտումն ապահովելու համար։ Ձեռք բերված ապացույցների համաձայն՝ նշված ընտրատարածքի 2 ընտրողի փոխարեն քվեարկել է նույն տեղամասային ընտրական հանձնաժողովի անդամը։ Նախնական քննության տվյալներով՝ 2015-ի դեկտեմբերի 6-ին Սահմանադրության փոփոխությունների հանրաքվեի ընթացքում «թիվ 10/15 ընտրատեղամասի հանձնաժողովի անդամ Գ. Թումանյանը, նույն ընտրատեղամասի ընտրողներ Լ. Հարությունյանի և Ռ. Հարությունյանի անվան դիմաց գրանցամատյանում լրացրել է մտացածին տվյալներ, ստորագրել և քվեարկել վերջիններիս փոխարեն»: Ձեռք բերված ապացույցների համակցությամբ՝ Թումանյանին մեղադրանք է առաջադրվել Քրեական օրենսգրքի 153-րդ հոդվածով: Նրա նկատմամբ որպես խափանման միջոց է ընտրվել ստորագրություն չհեռանալու մասին։ Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին։ Քննչական կոմիտեի Երևանի քննչական վարչության Մալաթիա-Սեբաստիա վարչական շրջանի քննչական բաժնում քննվող քրեական գործով պարզվել է թիվ 8/25 ընտրատեղամասում այլ անձի փոխարեն քվեարկելու փորձ կատարած անձի ինքնությունը։ 2015-ի դեկտեմբերի 6-ին «Թրանսփարենսի ինթերնեշնլ հակակոռուպցիոն կենտրոն»-ի տեղեկատվական հարթակում հրապարակվել է նյութ առ այն, որ թիվ 112 դպրոցում տեղակայված թիվ 8/25 ընտրատեղամասում ընտրողը 2 անգամ է քվեարկել, իսկ հանձնաժողովը չի արձանագրել խախտումը: Ըստ քննչական կոմիտեի՝ Ահազանգում մատնանշված հանգամանքներն ստուգելու ուղղությամբ ձեռնարկված միջոցառումների արդյունքում պարզվել է, որ 2015 թվականի դեկտեմբերի 6-ին՝ ժամը 12:00-ից մինչև 14:00-ն ընկած ժամանակահատվածում, մի երիտասարդ, մոտենալով թիվ 8/25 ընտրատեղամասի հանձնաժողովի անդամ Մայիս Հարությունյանին, կնքելու համար վերջինիս է տվել իր անձնագիրը և քվեածրարը, որի ժամանակ հանձնաժողովի անդամը նկատել է, որ տվյալ անձն արդեն մեկ անգամ քվեարկել է, քանի որ անձնագրում արդեն իսկ առկա է եղել դրոշմակնիքը, և կանչել հանձնաժողովի նախագահին: Նույն պահին երիտասարդը վերցրել է անձնագիրը և շտապ հեռացել ընտրատեղամասից: Նշված փաստն արձանագրվել է թիվ 8/25 ընտրատեղամասի գրանցամատյանում: Նախնական քննության տվյալներով՝ նշված ընտրատեղամասում քվեարկելու փորձ է կատարել մեկ այլ՝ թիվ 8/20 ընտրատեղամասի ընտրող Գ. Խաչատրյանը։ «Ձեռք բերված ապացույցների համաձայն՝ վերջինս 2015-ի դեկտեմբերի 6-ին իր ընտրատեղամասում՝ թիվ 8/20, մասնակցել է հանրաքվեին, ապա գնացել թիվ 8/25 ընտրատեղամաս՝ փորձելով այնտեղ ևս քվեարկել, սակայն իր կամքից անկախ հանգամանքներով չի կարողացել հանցագործությունն ավարտին հասցնել», - փոխանցում է Քննչական կոմիտեն: Ձեռք բերված ապացույցների համակցությամբ՝ Խաչատրյանին մեղադրանք է առաջադրվել Քրեական օրենսգրքի 34-153-րդ հոդվածով: Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին։ ՀՀ Սահմանադրության փոփոխությունների հանրաքվեի քարոզչության, հանրաքվեի և դրան հաջորդող գործընթացների շրջանակում ՀՀ քաղաքացիների ընտրական իրավունքի իրացմանը խոչընդոտելու վերաբերյալ ահազանգերին՝ դատախազության լիազորությունների շրջանակում պատշաճ իրավական գործընթաց իրականացնելու նպատակով ՀՀ դատախազությունում ստեղծված աշխատանքային խմբի կողմից հունվարի 11-ի դրությամբ ուսումնասիրվել է 514 տարբեր բնույթի տեղեկատվություն (ԶԼՄ-ների և ՀԿ-ների հրապարակումներ, նաև քաղաքացիների ահազանգեր և գրավոր դիմումներ): 56 դեպքով հարուցվել է քրեական գործ: 2015-ի դեկտեմբերի 6-ին Հայաստանում անցկացված սահմանադրական փոփոխությունների հանրաքվեին մասնակցել է ընտրողների 50.51%-ը: Փոփոխություններին կողմ է քվեարկել ընտրելու իրավունք ունեցողների մոտ 63%-ը՝ 825.851քվե: Դեմ է քվեարկել 421.600 ընտրող կամ մոտ 32%-ը: Սահմանադրական փոփոխությունները նախատեսում են անցում կիսանախագահական կառավարման համակարգից խորհրդարանական կառավարման համակարգի: Կարդացեք նաև՝ Հանրաքվեի ընտրական հանձնաժողովի 2 անդամին մեղադրանք է առաջադրվել Ուշագրավ
«Ամեն բնակչի կողքին 15 ոստիկան է կանգնած, անձնագրով են ներս թողնում միայն Կիրանցի բնակիչներին»,–ասել է վարչական ղեկավարը Որոշ դեպքերում անձանց ազատությունից զրկելիս չեն ներկայացվում նրանց ազատությունից զրկելու հիմքերն ու պատճառները Պահանջն առնչվում է նրա հետ փոխկապակցված 7 անձի Վարդանյանն ասել է, որ գտնվում է մեկուսացման խցում Ամենաընթերցվողը բաժնում | Սփյուռքի գործերի գլխավոր հանձնակատարը գործուղվել է Իտալիա Հանդիպումներ կլինեն տեղի պաշտոնատար անձանց, հայկական կառույցների հետ ՊՆ. Սուտ է, թե Տավուշի հատվածում Ադրբեջանը կրակել է հայկական դիրքերի ուղղությամբ Նախարարությունը հորդորում է հետևել գերատեսչության պաշտոնական հաղորդագրություններին Զախարովա․ ՀՀ-ն շարունակում է ՀԱՊԿ լիարժեք անդամ մնալ իր համապատասխան պարտավորություններով Նա նաև ասել է, որ ՌԴ–ն կասկածի տակ չի դնում իր արտաքին քաղաքական կուրսն ընտրելու ՀՀ սուվերեն իրավունքը Կուպմանը Բաքվում ասել է, որ Եվրահանձնաժողովը ողջունում է ՀՀ-ի և Ադրբեջանի միջև վերջին պայմանավորվածությունները Նա ասել է, որ Եվրահանձնաժողովում դրական են գնահատում Հարավային Կովկասում վերջին իրադարձությունները |