Տոնոյան. Արցախում հրադադարի ռեժիմ հաստատված չէ, կա կրակը դադարեցնելու մասին պայմանավորվածություն

PanARMENIAN.Net - Արցախում հրադադարի ռեժիմ չկա, կա կրակը դադարեցնելու մասին պայմանավորվածություն: Այդ մասին հայտարարել է ՀՀ պաշտպանության փոխնախարար Դավիթ Տոնոյանը: Տոնոյանն ասել է նաև, որ ադրբեջանական կողմի հսկողության տակ ոչ մի հայկական դիրք չի մնացել:

Ազգային ժողովում տեղի են ունեցել փակ լսումներ ղարաբաղյան գոտում իրավիճակի վերաբերյալ: Նախատեսվում է նաև քննարկել ԼՂՀ հետ ռազմական փոխօգնության մասին պայմանագրի կնքման հարցը: Լսումներին ներկա են եղել ՊՆ փոխնախարար Դավիթ Տոնոյանը և ԱԳ փոխնախարար Շավարշ Քոչարյանը: Քննարկումներին մասնակցել են խորհրդարանի պատգամավորները, հայտնում է Armenia Today-ը:

Ապրիլի լույս 2-ի գիշերից ղարաբաղա-ադրբեջանական շփման գծում շարունակվող մարտերում ՊԲ ստորաբաժանումները, ըստ ԼՂՀ ՊՆ տվյալների, ոչնչացրել են հայկական դիրքերի ուղղությամբ գրոհող թշնամական 2 ուղղաթիռ, ինչպես նաև 26 տանկ, 4 ՀՄՄ, 1 «Գրադ», ինժեներական 1 մեքենա և 12 ԱԹՍ: Ադրբեջանն ընդունել է 16 զինծառայողի զոհվելու, ինչպես նաև 1 տանկի ու 1 ուղղաթիռի ոչնչացման փաստը և չի հայտնել ոչ մի վիրավորի մասին՝ այն դեպքում, երբ միայն հայկական կողմի հրապարակած ֆոտո- և տեսանյութերում առկա են մի քանի տասնյակ դիակներ, 1 ուղղաթիռ և 3 ԱԹՍ: Ստեփանակերտի գնահատականով, Ադրբեջանի ընդհանուր կորուստները գերազանցում են 300-ը:

Հայկական կողմն ունի 29 զոհ, 101 վիրավոր, ևս 28-ն անհետ կորած է: ՊԲ-ն նաև 14 տանկ է կորցրել: Ապրիլի 5-ին՝ ժամը 12:00-ի դրությամբ, երկկողմանի հրադադար է հայտարարվել: