Եզդիները ցանկանում են ինքնավարություն ստեղծել ԱՄՆ-ի տարածքում

PanARMENIAN.Net - «Եզդիների համաշխարհային միությունը (ԵՀՄ) նամակ է հղել ԱՄՆ նախագահ Ջորջ Բուշին, խնդրելով կանխել բռնությունները, որ կատարվում են Իրաքում եզդիների դեմ: Այդ մասին մայիսի 15-ին Երեւանում կայացած մամլո ասուլիսի ժամանակ հայտարարել է Եզդիների համաշխարհային միության նախագահ Ազիզ Թամոյանը: Նրա խոսքերով, Իրաքի մահմեդականները «շարունակում են իրենց սեւ գործը տեղի եզդիների հանդեպ»: Նա նշել է, որ ընթացիկ տարվա ապրիլի 22-ին Իրաքի Մոսուլ քաղաքում մահմեդականները 24 եզդիների են սպանել, որոնք մեկնում էին աշխատանքի, վերջին շրջանում շուրջ 8 հազար եզդիներ լքել են իրենց բնակավայրերը Իրաքի տարբեր քաղաքներում, ապաստան որոնելով ԱՄՆ-ում: «Եթե այդպիսի իրավիճակը շարունակվի, ապա եզդի բնակչությունը ցեղասպանության կենթարկվի 21-րդ դարում»,-հայտարարել է նա:



Այդ կապակցությամբ ԵՀՄ ղեկավարը նախագահ Բուշին հղած նամակում առաջարկում է ԱՄՆ-ում ինքնավար մարզ ստեղծել եզդիների համար, որը մշտապես կլինի ԱՄՆ իրավասության տակ եւ կհամարվի վարչական տարածք:



Անդրադառնալով այն հարցին, թե ինչու այդ հարցով ԵՀՄ-ն չի դիմել Իրաքի իշխանություններին, Ազիզ Թամոյանը նշել է, որ իշխանություններն իրենք են հանդիսանում այդ բռնությունների կազմակերպիչները, հաղորդում է «Ռեգնում» գործակալությունը: