Թուրքիայում 1.5 ամսում սպանվել է 417 քուրդ զինյալ, 88 թուրք զինվոր

10 հոկտեմբերի 2016 - 16:23 AMT

PanARMENIAN.Net - Թուրքիայի զինված ուժերի գլխավոր շտաբը (ԶՈՒ ԳՇ) վիճակագրական տվյալներ է հրապարակել երկրում ահաբեկչության դեմ պայքարի վերաբերյալ: Թուրքական Anadolu լրատվական գործակալության փոխանցմամբ՝ ԶՈՒ ԳՇ հայտարարության մեջ մասնավորապես նշված է, որ Թուրքիայի զինված ուժերն ու անվտանգության ծառայությունները վերջին ամիսներին ամենահամառ պայքար են մղել «անջատողական ահաբեկչական խմբավորումների» դեմ:

Ըստ աղբյուրի՝ օգոստոսի 29-ից մինչ օրս ահաբեկչության դեմ պայքարի շրջանակում Թուրքիայում վնասազերծվել է 537 քուրդ զինյալ: Նրանցից 417-ը զինված գործողությունների արդյունքում զոհվել է: Զինված ուժերի ստորաբաժանումներն ու անվտանգության ծառայությունները առգրավել են Թուրքիայում որպես ահաբեկիչ որակվող քուրդ զինյալներին պատկանող մեծ քանակությամբ զենք ու զինամթերք, գրում է Ermenihaber.am-ը:

Նույն ժամանակահատվածում զինված գործողությունների արդյունքում սպանվել է 88, վիրավորվել 152 զինվոր:

ՔԱԿ-ը քրդական կազմակերպության հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը: Կազմակերպությունը 1978 թվականին հիմնադրել է Աբդուլլահ Օջալանը, որը ներկայում ցմահ ազատազրկում է կրում թուրքական Իմրալը կղզու բանտում, սակայն շարունակում է համարվել կազմակերպության ղեկավարը։

Կարդացեք նաև՝ Կարո Փայլանը՝ Վաշինգտոնում. Թուրքիայում քրդերը գրեթե նույն վիճակում են, ինչ հայերն էին 1 դար առաջ

Հղումներ թեմայով.

Թուրքիայում 1.5 ամսում զինված բախումների ընթացքում սպանվել է 417 քուրդ զինյալ, 88 թուրք զինվոր. Ermenihaber.am