Ադամ Շիֆ. ժամանակը չի բուժել Սումգայիթի, Բաքվի ու Կիրովաբադի բռնությունների վերքերը 2 մարտի 2017 - 12:47 AMT PanARMENIAN.Net - ԱՄՆ Կոնգրեսի Ներկայացուցիչների պալատի անդամ Ադամ Շիֆը մարտի 1-ին հանդես է եկել Սումգայիթում հայերի ջարդերի 29-րդ տարելիցին նվիրված հայտարարությամբ: Կոնգրեսականը հիշեցրել է, որ մեծ մասամբ հայերով բնակեցված ադրբեջանական Սումգայիթ քաղաքում ջարդերը տեղի են ունեցել փետրվարի 27-29-ը (1988թ.). ադրբեջանցի ՕՄՕՆ-ցիները դռնեդուռ ընկած բռնել են հայերին ու բարբարոսներին հատուկ ձևով տանջել, սպանել, գրում է Asbarez.com-ը: «Սումգայիթում հարյուրավոր հայեր են դաժանաբար սպանվել, կանայք ու աղջիկները՝ բռնաբարվել: Զոհերն անպատմելի կտտանքների են ենթարկվել ու ողջ-ողջ այրվել: Մինչդեռ նրանք, որոնց հաջողվել էր փրկվել այս բարբարոսությունից, հուսալքված փախել են իրենց տներից՝ թողնելով ամեն ինչ՝ ունեցվածքը, բիզնեսը: Իրականում այս ջարդերն ադրբեջանական իշխանությունների կողմից տարիներ շարունակ իրականացվող հակահայկական քարոզչության կուլմինացիոն պահն էին: Հետագայում նույն այդ իշխանությունները ոչինչ չարեցին պատասխանատուներին պատժելու համար: Փոխարենը նրանք ջանք չխնայեցին տեղի ունեցածը քողարկելու և իշխանությունների անմիջական դերակատարումը կոծկելու համար: Այս համատեքստում զարմանալի չէ, որ Սումգայիթում տեղի ունեցած բռնությունը ոչ թե ավարտվեց, այլ շարունակվեց Բաքվում»,-նշել է Շիֆը՝ հիշեցնելով, որ նախքան այդ ջարդերը՝ Ադրբեջանում ապրում էր մոտ 450.000 հայ: Դեմոկրատը նկատել է, որ թեև անցել են տասնամյակներ, այնուհանդերձ՝ ժամանակը չի բուժել Սումգայիթում, Բաքվում ու Կիրովաբադում տեղի ունեցած սոսկալի բռնությունների վերքերը: Սահուն անցում կատարելով 21-րդ դարին՝ կոնգրեսականը նկատել է, որ այսօր էլ Ադրբեջանը շարունակում է վտանգավոր վարք դրսևորել, սակայն արդեն Լեռնային Ղարաբաղի հետ շփման գծում՝ անմիջական սպառնալիք ներկայացնելով տարածաշրջանի կայունության ու անվտանգության համար: Հայտարարության վերջում կոնգրեսականը Ներկայացուցիչների պալատին հիշեցրել է, որ ապրիլին լրանում է Ադրբեջանի ամենամոտ դաշնակցի՝ Թուրքիայի կողմից իրականացված Հայոց ցեղասպանության 102-րդ տարելիցը: «Մենք չպետք է թույլ տանք, որ մարդկության դեմ իրագործված նման հանցանքները չճանաչված մնան, կապ չունի, թե դրանք երբ են տեղի ունեցել՝ 29, թե 100 տարի առաջ: Եկեք 1 րոպե լռությամբ հարգենք Սումգայիթի ջարդերի զոհերի հիշատակը: Պարո՛ն խոսնակ, մեր պարտականությունն է դատապարտել ատելության հողի վրա իրագործված հանցագործություններն ու հիշել զոհերին՝ հույսով լի առ այն, որ պատմությունը չի կրկնվի»,-եզրափակել է Շիֆը: 1988 թվականի փետրվարին Ադրբեջանի մայրաքաղաք Բաքվից ընդամենը 30 կիլոմետր հեռավորության վրա գտնվող Սումգայիթ քաղաքում տեղի ունեցան հայերի զանգվածային սպանություններ և ջարդեր: Երեք օր շարունակ ջարդերն ուղեկցվեցին զանգվածային բռնությամբ, թալանով ու սպանություններով, ինչն էլ Ադրբեջանից դեպի Հայաստան ու Լեռնային Ղարաբաղ փախստականների առաջին հոսքի պատճառ դարձավ: Հայերի ջարդերը Սումգայիթում 1988 թ. փետրվարի 26-29-ին Ադրբեջանի Սումգայիթ քաղաքում տեղի ունեցած հայ ազգաբնակչության ջարդերը խորհրդային իշխանության նորագույն պատմության մեջ էթնիկ բռնության առաջին դրսեւորումն էր: Սումգայիթի ջարդերը շարուակվեցին երեք օր եւ ուղեկցվում էին զանգվածային բռնություններով, կողոպուտով եւ սպանություններով: Սումգայիթի իրադարձությունները ազդակ էին Ադրբեջանում նոր Հայոց ցեղասպանության համար: Այդ ալիքի զոհերը դարձան Կիրովաբադի, Ղազախի, Խանլարի, Դաշկեսանի, Մինգեչաուրի, Բաքվի եւ Ադրբեջանի այլ քաղաքների ու գյուղերի հայ ազգաբնակչությունը: Դրա հետեւանքով սկիզբ առավ Ադրբեջանից հայ փախստականների հոսքը դեպի Լեռնային Ղարաբաղ եւ Հայաստան: Ուշագրավ
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը Ամենաընթերցվողը բաժնում | Փաշինյանը մեկնել է Դանիա Նա կմասնակցի «Առաջնագծից․ Հայաստանի ժողովրդավարության պաշտպանությունը» թեմայով քննարկմանը Երևանը կհյուրընկալի կարատեի Եվրոպայի 2025-ի մեծահասակների առաջնությունը 2027-ին Եվրոպայի կարատեի պատանիների, երիտասարդների առաջնությունը ևս կանցնի Հայաստանում Զբոսաշրջության կոմիտեի նախագահն ազատվել է պաշտոնից Պօղոսեանը նշանակվել էր պաշտոնում 2022–ի հունվարին Բագրատ սրբազանը՝ առաջնորդությունը քաղուժերին փոխանցելու մասին․ Թող գան, վերցնեն, ով ցանկանում է «Ես բոլորի հետ խոսում եմ»,–ասել է նա |