ԿԽՄԿ աշխատակիցներն այցելել են Ադրբեջանում պահվող ՀՀ քաղաքացիներին

PanARMENIAN.Net - Կարմիր խաչի միջազգային կոմիտեի (ԿԽՄԿ) ներկայացուցիչները այցելել են Ադրբեջանում պահվող ՀՀ 2 քաղաքացուն: Այս մասին հաղորդում է ադրբեջանական ԱՊԱ-ն:

ԿԽՄԿ ադրբեջանական ներկայացուցչության հասարակության հետ կապերի պատասխանատու Իլահա Հուսեյնովան հայտնել է, որ դեկտեմբերին իրենք այցելել են ադրբեջանական կողմում պահվող անձանց: «Մենք մշտապես այցելում ենք նրանց, մշտադիտարկում նրանց պահման պայմանները, ապահովում նրանց կապը ընտանիքների հետ»,-ասել է նա:

Ներկայումս Ադրբեջանում 2 գերի կա՝ Արսեն Բաղդասարյանն ու Զավեն Կարապետյանը, որին ադրբեջանական աղբյուրները Զավեր Կարապետյան են կոչում:

Զավեն Կարապետյանը ՀՀ զինված ուժերում չի ծառայել, քանի որ առողջական խնդիրներ է ունեցել (մտավոր հետամնացություն) և ՀՀ պաշտպանության նախարարի համապատասխան հրամանի համաձայն՝ 24․12․1993 ազատվել է ծառայությունից, վարել թափառական կյանք, մշտական բնակության վայր չի ունեցել։ Ըստ ստացված տեղեկությունների՝ ՀՀ տարբեր տարածքներում վարձատրության դիմաց անասնապահությամբ է զբաղվել։ Խուսափել է շփումներից, եղել է ինքնամփոփ, առերևույթ ակնհայտ են եղել մտավոր թերություններ։

Արսեն Բաղդասարյանն, ըստ Ադրբեջանի ՊՆ վարկածի, գերեվարվել է 2014-ի դեկտեմբերի 27-ին, «դիվերսիան» ետ մղելիս: ԼՂՀ ՊԲ-ն հերքեց դիվերսիայի փորձը, իսկ ինքը Բաղդասարյանը, լինելով պայմանագրային զինծառայող, ԼՂՀ ՊԲ հաղորդագրության համաձայն, պարբերաբար ինքնակամ լքել է իր մշտական տեղակայման վայրը, որի համար հրամանատարության որոշմամբ, կարգապահական խախտումներ կատարելու հիմնավորումով, ժամանակավորապես հեռացված է եղել ծառայությունից: Ադրբեջանական կողմը, սակայն, չի հրաժարվում «ձերբակալված դիվերսանտի» վարկածից: Արսեն Բաղդասարյանն արդեն իսկ Ադրբեջանում դատարանի կողմից դատապարտվել է 15 տարվա ազատազրկման: