Վարչապետը՝ Ամուլսարի մասին. Եթե լինեինք նախնական փուլում՝ Ջերմուկում հանք չունենալու քաղ.որոշում կլիներ (Թարմացվող)

PanARMENIAN.Net - Հուլիսի 6-ին ՀՀ վարչապետ Նիկոլ Փաշինյանը այցելել է Ջերմուկ: Նա հանդիպել է «Հայկական բնապահպանական ճակատի» ներկայացուցիչ Լևոն Գալստյանի և «Լիդիան Արմենիա» ընկերության գործադիր տնօրեն Հայկ Ալոյանի հետ, լսել Ամուլսարի հանքի շահագործման վերաբերյալ նրանց մտահոգություններն ու փաստարկները, հայտնում է «Ազատություն» ռադիոկայանը:

Վարչապետը հանդիպել է նաև հանքի շահագործման խնդրով շահագրգիռ կողմերի հետ:

«Ստուգումները Ամուլսարում պետք է շարունակվեն: Այս այցի արդյունքում մենք հասանք խնդրի էությանը՝ ինչ երկու հիմնարար հարցի մենք պետք է պատասխանենք. առաջինը՝ հանքի հնարավոր ազդեցությունը ջրային ռեսուրսների որակի վրա և հանքի ազդեցությունը Ջերմուկի՝ որպես առողջարանային քաղաքի վրա: Մենք ունենք երրորդ իրավիճակ, եթե մենք որևէ ապօրինություն անենք, ապա գոնե միջազգային հարաբերությունների տեսակետից կարող ենք շատ բարդ իրավիճակում հայտնվել», - ասել է վարչապետը՝ հավելելով, որ որոշումները պետք է հիմնված լինեն բացառապես փաստերի և ոչ թե էմոցիաների վրա:

Ըստ վարչապետի՝ տեսականորեն այդ հարցերն ունեն երկու պատասխան՝ դրական կամ բացասական: «Եթե մենք հիմա գտնվեինք նախնական փուլում, կլիներ քաղաքական որոշում՝ Ջերմուկի մոտակայքում հանք չպետք է լինի, բայց մենք ունենք իրավիճակ, երբ հանքի շահագործման համար անհրաժեշտ գործի 80%-ն արդեն արված է, և սա իրավիճակ է, որի հետ մենք պետք է հաշվի նստենք»,- ասել է վարչապետը:

11:50 Վարչապետը կողմերին հարցրել է, թե արդյոք պատրաստ են ժամանակ տալ կառավարության փորձագիտական խմբին հանքի շահագործման ազդեցությունը գնահատելու համար: Հանքի շահագործմանը դեմ արտահայտվողներն ասել են՝ այո, եթե հանքի շահագործումը այդ ընթացքում դադարեցվի:

Փաշինյանը հարցրել է, «Լիդիան Արմենիայի» տնօրենին, թե այդպիսի սցենարի պատրաստ են, թե՝ ոչ: Վերջինիս պատասխանը բացասական էր:

«Հիմա մենք այստեղ հավաքվել ենք փոխզիջման ճանապարհով խնդրին լուծում տալու համար: Ինձ ասում են, որ դուք ձեր տնօրենին փոխել եք և հիմա մի տնօրեն է աշխատում, որը մասնագիտացած է ոչ թե հանքերի շահագործման մեջ, այլ մասնագիտացված է պետություններին դատի տալու մեջ: Դա ճիշտ է, թե ճիշտ չէ», - հարցրել է Փաշինյանը Ալոյանին:

Նա ասել է, որ այդ տեղեկությունը չի համապատասխանում իրականությանը:

11:40 Վարչապետն ասում է՝ եթե Ամուլսարի հանքի շահագործման թույլտվությունն ուղեկցվել է կոռուպցիոն գործարքներով, ապա ինքը «որևէ խնդիր չի տեսնում, որ այդ մարդիկ կրեն պատասխանատվություն»:

11:30 Ջերկուկ քաղաքի բնակիչներից Ստեփանյան Կորյունն առաջարկել է վարչապետին ուսումնասիրել, թե ինչ պայմաններում է նախորդ կառավարությունը տվել հանքի շահագործման թույլտվություն «Լիդիանին»:

«Կարծում ենք, որ պետք է իրավականությունը ստուգվի հարցի, թե ինչպես են ստացել թույտվություն», - ասել է բնակիչը:

«Լիդիան Արմենիա» ընկերության՝ Ջերմուկ առողջանային քաղաքի մերձակայքում գտնվող Ամուլսարի ոսկու հանքավայր տանող ճանապարհներն արդեն մոտ երկու շաբաթ է՝ արգելափակված են հանքավայրի շահագործմանը դեմ բողոքողների կողմից:

Ընթերցեք նաև՝ «Ամուլսարի «կողմն» ու «դեմը». Բնապահպանների, «Լիդիանի» ու իշխանության փաստարկները»: