Թուրքիան ցուցադրում է իր անկարողությունը՝ առերեսվելու անցյալին

PanARMENIAN.Net - Թուրքիան՝ խուսափելով առերեսվել իր անցյալին և ուրիշներին կոչ անելով «պատմությունից թշնամանքի փոխարեն դասեր քաղել», շարունակում է Հայոց ցեղասպանությունն արդարացնելու և հայ ժողովրդին նոր ոճրագործություններով սպառնալու ավանդական քաղաքականությունը: Այս մասին հայտարարել է ԱԳՆ խոսնակ Աննա Նաղդալյանը։

Հայաստանում Սևրի հաշտության պայմանագրի հարյուրամյակի հիշատակման առնչությամբ Թուրքիայի ԱԳՆ-ի հայտարարությունը մեկ անգամ ևս ի ցույց է դնում այդ երկրի անկարողությունը` առերեսվելու իր անցյալին:

Խոսնակի խոսքով՝ Սևրի հաշտության պայմանագիրը եղել է, կա և շարունակելու է մնալ պատմական փաստ, որը հնարավոր չէ վերախմբագրել կամ ջնջել:

Սևրի պայմանագիրը ստորագրվել է 1920-ի օգոստոսի 10-ին։ Միջազգային իրավունքի տեսակետից Հայաստանը, որպես պայմանագրի մասնակից, դե յուրե ճանաչվում էր պայմանագիր ստորագրած մյուս բոլոր պետությունների կողմից, այդ թվում՝ Թուրքիայի։

Թուրքիայի կողմից մեր տարածաշրջանում խաղաղության և անվտանգության խաթարմանն ուղղված քայլերը, Հայաստանի հանդեպ որդեգրած ռազմատենչ կեցվածքը հարևան տարածաշրջաններն ապակայունացնելու այդ երկրի ներկա կառավարության ծավալապաշտական քաղաքականության մասն են կազմում:

Միայն այդ քաղաքականության վերանայումը և Թուրքիայի կողմից անցյալին առերեսվելու կարողությունը ճանապարհ կհարթեն մեր տարածաշրջանի ժողովուրդների միջև իրական հաշտության համար:

Թուրքիայի ԱԳՆ-ն հայտարարել էր՝ զարմանալի չէ, որ դասերի փոխարեն պատմությունից թշնամանք քաղող հայերը դիմում են այս փաստաթղթին, թեև անցել է մեկ դար։ Թուրքիան Հայաստանին մեղադրել էր ազգայնական քաղաքականություն վարելու համար։