Սիրիան Ադրբեջանի իշխանություններին կոչ է արել չընկնել Թուրքիայի թակարդն ու արձագանքել երկխոսության ու տարաձայնությունները խաղաղ ճանապարհով լուծելու Հայաստանի նախաձեռնությանն ու կոչերին, փոխանցում է Sana գործակալությունը:
Սիրիայի արտաքին գործերի նախարարությունից զգուշացրել են հակամարտությանը Թուրքիայի բացահայտ ներգրավվածության մասին։
Ըստ սիրիական կողմի՝ Թուրքիայի նպատակն է էլ ավելի բորբոքել իրավիճակը, ինչը հատուկ է աշխարհի տարբեր հատվածներում խռովություններ հրահրելու և լարվածություն առաջացնելու՝ այդ երկրի ռեժիմի վարքագծին:
Սեպտեմբերի 27-ից սկսված Արցախյան պատերազմում Թուրքիայի անմիջական ներգրավվածության մասին բազմաթիվ փաստեր կան․ այդ մասին խոսել են ինչպես հայկական կողմից, այնպես էլ համաշխարհային առաջնորդներն ու միջազգային մամուլը։
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։