Քոչարյան․ Վստահ եմ՝ այլևս չեք խաբվելու

Քոչարյան․ Վստահ եմ՝  այլևս չեք խաբվելու

PanARMENIAN.Net - ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը նախընտրական քարոզարշավի վերջին օրը ուղերձով դիմել է ժողովրդին՝ նշելով, որ հունիսի 20-ին ընտրելու ենք արժանապատիվ խաղաղության ու նվաստացած խայտառակության, բարեկեցիկ կյանքի և անհույս աղքատության միջև։

«Վստահ եմ, որ այլևս չեք խաբվելու»,-ասել է նա։

Ուղերձում ասվում է․ «Սիրելի ժողովուրդ, ավարտին մոտեցավ արտահերթ ընտրությունների քարոզարշավը։ Անցած մեկ ամսվա ընթացքում թիմակիցներիս հետ միասին շրջեցինք Հայաստանով մեկ։

Վաղուց՝ 13 տարի ձեզ հյուր չէի եղել, շնորհակալ եմ հյուրըկալության ու ջերմ ընդունելության համար։

Այս օրերին հազարավոր մարդկանց ձեռք եմ սեղմել, նայել եմ նրանց աչքերին։ Չեմ թաքցնում՝ փորձում էի հասկանալ՝ արդյո՞ք փոխվել եք այս տարիների ընթացքում։

Ու մեծ ուրախությամբ պետք է ասեմ՝ չեք փոխվել, մնացել եք աշխատասեր, տաղանդավոր, պարզ խոսող, վատն ու լավը տարբերող։ Կարճ ասած՝ շատ ուրախ եմ, որ նորից միասին ենք։

Հիմա ընտրությունների մասին՝ երկու բառով։

Հունիսի 20-ը ճակատագրական օր է։ Ընտրում ենք արժանապատիվ խաղաղության ու նվաստացած խայտառակության միջև։ Ընտրում ենք բարեկեցիկ կյանքի և անհույս աղքատության միջև։

Վստահ եմ, որ այլևս չեք խաբվելու։ Սուտը, տգիտությունն ու պիղծը մերժելու եք»։

Քոչարյանը նաև կոչ է արել նորից միասին շենացնել Հայաստանը։

«Հարատև խաղաղություն հաստատենք։ Վերականգնենք մեր արժանապատվությունը։

Բուժենք վերքերը։ Հավերժացնենք մեր հերոսներին ու իմաստ հաղորդենք նրանց սխրանքին։

Մեր ամենօրյա տքնաջան աշխատանքով առողջ, կիրթ, բարեկեցիկ կյանք կերտենք մեր երեխաների ու մեր թոռների համար։

Դա՛ պետք է լինի մեր կատարելիք ընտրության իմաստը։ Եվ ընդհանրապես՝ մեր ապրած կյանքի իմաստը։

Վստահ եմ, որ չեք սխալվի։ Իսկ Դուք վստահ եղեք, որ ամեն ինչ լավ է լինելու։ Դեպի ուժեղ Հայաստան»,-ասվում է Քոչարյանի ուղերձում։

Խորհրդարանական արտահերթ ընտրությունները կայանալու են հունիսի 20-ին։

 Ուշագրավ
Նշվում է, որ իրադրության հետագա սրման ամբողջ պատասխանատվությունն ընկնում է Ադրբեջանի ղեկավարության վրա
«ԿԸՀ-ն այս շաբաթ մանդատները գրանցելու արձանագրությունը կկազմի»,-ասել է ԿԸՀ քարտուղարը