«Ապրելու երկիրը» Փարաքարում արտահերթ ընտրություն է պահանջում

PanARMENIAN.Net - «Ապրելու երկիր» կուսակցությունը Փարաքար համայնքում արտահերթ ընտրություն անցկացնելու պահանջով դիմել է կառավարությանը։ Այդ մասին ասվում է կուսակցության հայտարարության մեջ։

Նշվում է, որ «Ապրելու երկիրը», հունվարի 3-ին դիմել է կառավարությանը Փարաքարի ավագանու լիազորությունները վաղաժամկետ դադարեցնելու և նոր ընտրություններ նշանակելու խնդրանքով՝ հիմք ընդունելով «Տեղական ինքնակառավարման մասին» օրենքի 69-րդ հոդվածի 2-րդ մասը։

Օրենքով սահմանված երկշաբաթյա ժամկետը լրացել է հունվարի 3-ին։

Նույնանման հանգամանքներով մեկ այլ՝ Վեդիի դեպքում կառավարության հունվարի 4-ի որոշմամբ վաղաժամկետ դադարեցվել են համայնքի ավագանու լիազորությունները և նշանակվել են արտահերթ ընտրություններ։

Ընդ որում, հունվարի 4-ին ՀՀ կառավարությունը այդ որոշումը կայացրել է հեռակա քվեարկությամբ՝ չսպասելով հունվարի 5-ի հերթական նիստին՝ նպատակ ունենալով պահպանել օրենքով սահմանված ժամկետները։

«2021թ․ դեկտեմբերի 20-ին տեղի է ունեցել Արմավիրի մարզի Փարաքար համայնքի ավագանու առաջին նիստը, և համայնքի ղեկավար է «ընտրվել» հունվարի 9-ի նիստին՝ 21-րդ օրը՝ օրենքի կոպիտ խախտումներով։ Այս փաստը հիմք է ՀՀ կառավարության կողմից օրենքի ուժով Արմավիրի մարզի Փարաքար միավորված համայնքի ավագանու լիազորությունները վաղաժամկետ դադարեցնելու և ավագանու արտահերթ ընտրություններ նշանակելու համար։ Սակայն, կառավարությունը նման որոշում չի կայացրել ոչ միայն սեփական նախաձեռնությամբ, այլև «Ապրելու երկիր» խմբակցության կողմից 2022թ հունվարի 3-ի և հունվարի 5-ի ներկայացված դիմումների հիման վրա։ Ավելին, կառավարությունը մինչև այժմ չի պատասխանել խմբակցության նամակին՝ սպասելով քաղաքական որոշման։

Այս կապակցությամբ, «Ապրելու երկիր» խմբակցությունը դիմելու է դատարան՝ կառավարության անգործության հիմքով և կառավարության կողմից իր պարտականությունների կատարման պահանջով»,-ասվում է հայտարարության մեջ։

«Ապրելու երկիր» կուսակցությունը Փարաքար համայնքում հավաքել է ձայների 49%-ը, «Քաղաքացիական պայմանագիր» կուսակցությունը՝ 27%: Համայնքի ութ բնակավայրերից երեքում «Ապրելու երկիր» կուսակցությունը հավաքել է ձայների 77-85%: