Քոչարյան․ Պատրաստ եմ հանդիպելու Փաշինյանին՝ քննարկելու ստեղծված վիճակից դուրս գալու ելքերը

Քոչարյան․ Պատրաստ եմ հանդիպելու Փաշինյանին՝ քննարկելու ստեղծված վիճակից դուրս գալու ելքերը

PanARMENIAN.Net - ՀՀ երկրորդ նախագահ Ռոբերտ Քոչարյանը, անդրադառնալով առաջին նախագահ Լևոն Տեր-Պետրոսյանի հրապարակած հայտարարության տեքստին, ասել է, որ Կաթողիկոսի մոտ ՀՀ և ԱՀ նախկին նախագահների հանդիպման ժամանակ այն չի ներկայացվել։

«Այն թուղթը, որ ինքը հարցազրույցի ժամանակ կարդացել է, մենք չենք տեսել։ Ուղղակի ինքը երևի փորձել է այդ բովանդակությունը որպես տեսակետ մեզ ներկայացնել։ Բայց մենք այնտեղ չենք քննարկել երկու հայտարարություն»,– ասել է Քոչարյանը։

«Հիմա, ասում են՝ միավորվենք, որ կապիտուլյացիա ստորագրենք։ Կոնսոլիդացիայի նպատակը ժողովրդին հաղթանակի մղելն է, ոչ թե պարտության։ Կապիտուլյացիան առաջացնում է անզորության զգացում, դեգրադիացիա»,- ասել է նա՝ հավելելով, որ գուցե սա է այն մարդկանց նպատակը, որոնք կոչ են անում կոնսոլիդացվել ու կապիտուլյացիայի փաստաթուղթ ստորագրել։

Նա նշել է, որ իշխանությունը տարվել է ուտոպիստական խաղաղության դարաշրջան բացելու թեզով և անտեսել անվտանգության բազմաթիվ հարցեր։

Հարցին, որ եթե ոչ կապիտուլյացիայի համար, ապա ո՞ր հարցերի դեպքում է պատրաստ հանդիպել վարչապետ Նիկոլ Փաշինյանի հետ՝ Քոչարյանն ասել է, որ, այո՛, պատրաստ է հանդիպել Փաշինյանի հետ՝ քննարկելու ստեղծված իրավիճակից դուրս գալու ելքերը, գրում է Factor.am-ը։

«Պետք է քննարկումներ ունենալ և դրանով ինչ-որ լուծումների գալ»,- ասել է նա։

Պատասխանելով հարցին, թե հեռանալուց հետո Փաշինյանին պե՞տք է տալ անվտանգության երաշխիքներ՝ Քոչարյանն ասել է, որ չի ուզում մտնել այդ դաշտ, բայց եթե հումանիտար միջանցքն է Փաշինյանի հեռանալու գինը, պետք է տալ։

Միևնույն ժամանակ, նա նշել է, որ մարդկանց մոտ մեծ սպասելիքներ են առաջացել, թե նախկին նախագահները և Վեհափառը լուծում են գտնելու ստեղծված իրավիճակից, բայց նրանք չունեն լծակներ՝ դա պետք է անի իշխանությունը։

«Ժողովուրդ ջան, ճգնաժամից երկիրը դուրս են հանում ոչ թե նախկին նախագահները, որ այսօր լծակներ չունեն, կամ Վեհափառը, այլ իշխանությունը»,- նշել է Քոչարյանը։

Տեր-Պետրոսյանի հարցազրույցին ավելի վաղ անդրադարձել էր նաև ՀՀԿ փոխնախագահ Արմեն Աշոտյանը՝ նշելով, որ Փաշինյանի մասնակցությամբ որևէ միասնություն ձևավորվել չի կարող, քանի որ ի թիվս այլ հանգամանքների, իր հաղորդած տեղեկության հավաստիությունը կասկածի տակ դրեց անգամ հենց ինքը՝ առաջին նախագահը։ Անդրադառնալով Տեր-Պետրոսյանի բերած Ճապոնիայի օրինակին, որը «նույնպես կապիտուլացվել է»՝ Աշոտյանը գրել էր․ «Ճապոնիան 1945 թվականին ստորագրել է կապիտուլյացիոն ակտը, սակայն առ այսօր, 77 տարի անց խաղաղության պայմանագիր Ռուսաստանի հետ չի ստորագրել և չի հրաժարվել Հարավային Կուրիլներից»։

Սեպտեմբերի 22-ին հանդիպում էր եղել Գարեգին Երկրորդի և ՀՀ նախագահներ Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի, ինչպես նաև ԼՂՀ նախագահներ Արկադի Ղուկասյանի և Բակո Սահակյանի միջև։ Ըստ հաղորդագրության՝ կայացել է շահագրգիռ քննարկում Հայաստանում ստեղծված իրավիճակի առնչությամբ և որոշում էր կայացվել շարունակել հանդիպումները։

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---