Հրապարակում լարվածություն ստեղծած «Համմերի» վարորդը ձերբակալվել է. Ենթադրաբար թմրանյութի ազդեցության տակ էր

PanARMENIAN.Net - Երևանի կենտրոնական փողոցներում լարված իրավիճակ ստեղծած «Համմերի» վարորդը փետրվարի լույս 11-ի գիշերը հայտնաբերվել և ձերբակալվել է։ Այդ մասին ֆեյսբուքյան իր էջում հայտնել է ՆԳՆ ոստիկանության լրատվության վարչության պետ Էդգար Ջանոյանը։

Օրինազանց վարորդն Արարատի մարզի բնակիչ 25-ամյա երիտասարդ է։

Ըստ ՆԳՆ ոստիկանության հաղորդագրության, փետրվարի 10-ին՝ ժամը 23:00-ի սահմաններում, Երևանի կենտրոնում «Համմեր» մակնիշի մեքենայի վարորդը կոպիտ կերպով խախտել է ճանապարհային երթևեկության կանոնները, չի ենթարկվել պարեկների օրինական պահանջներին, մեքենան վարել է ոստիկանների և քաղաքացիների ուղղությամբ, նրանց կյանքի և առողջության համար վտանգավոր գործողություններ կատարել:

«Մեքենայի ընթացքը կանգնեցնելու նպատակով գործադրվել է հրազեն անվադողերի ուղղությամբ»,-ասվում է ոստիկանության հաղորդագրության մեջ։

Քննչական կոմիտեի տարածած հաղորդագրության մեջ ասվում է, որ վարորդը ենթադրաբար եղել է թմրանյութի ազդեցության տակ:

«Փետրվարի 10-ին` ժամը 23։30-ի սահմաններում, Հանրապետության հրապարակում Պարեկային ծառայության ծառայողներին է մոտեցել «Համմեր» մակնիշի ավտոմեքենա, որի վարորդը մեքենան լիցքավորելու համար գումար է ապահանջել պարեկներից։

Մերժում ստանալուց հետո, նա մեքենան վարել է Աբովյան փողոցով՝ երթևեկությանը հանդիպակաց, չի ենթարկվել ոստիկանության ծառայողների` «կանգ առ» ազդանշանին, մեքենան շարունակել է վարել Արամի, Բյուզանդի, Վ.Սարգսյանի, Ագանթագեղոսի, Տիգրան Մեծի, Ամիրյան փողոցներով, այդ թվում նաև` հետիոտնի համար նախատեսված վայրով՝ դիտավորյալ վնասելով փողոցներում կայանված թվով 8 քաղաքացիական մեքենա։ Այնուհետև նա երթևեկել է Կառավարության վարչական շենքի հանդիպակաց՝ ոչ երթևեկելի հատվածով, որտեղ, շարունակելով չենթարկվել պարեկային ծառայության օրինական պանաջին, վրաերթի է ենթարկել Պարեկային ծառայության աշխատակցին, դիտավորյալ վնասել Պարեկային ծառայության թվով 3 ավտոմեքենա։ Այդ գործողությունները կանխելու համար պարեկային ծառայողներն իրենց ամրակցված ատրճանակներով մոտ տարածությունից` մի քանի անգամ կրակել են վերոհիշյալ ավտոմեքենայի անվադողերի ուղղությամբ՝ փորձելով կանգնեցնել այն, սակայն վարորդը շարունակել է երթևեկությունը, խույս տալով պարեկներից` մեքենան թողել է Ագաթանգեղոս 7-րդ շենքի կամարանցման տակ և փախել:

Վարութային գործողությունների արդյունքում պարզվել է, որ ավտոմեքենան պատկանում է Արարատի մարզի բնակչի, ով փետրվարի 11-ին` ժամը 01:40-ին, ձերբակալվել և ներկայացվել է վարույթն իրականացնող մարմնին: Պարզվել է, որ ավտոմեքենան վարել է վերջինիս որդին՝ Գ․Ս․-ն, ով եղել է ենթադրաբար թմրանյութի ազդեցության տակ: Տեղյակ լինելով որդու թմրամոլ լինելու մասին` հայրը մեքենայի բանալիները թաքցրել է նրանից, սակայն երիտասարդը փնտրել ու գտել է պահեստային բանալին, որից հետո մեքենայով մարզից եկել է Երևան և օգտագործել թմրամիջոց: Նա ձերբակալվել է»,-ասվում է ՔԿ հաղորդագրության մեջ։

Ձերբակալվածի անձնական խուզարկությամբ հայտնաբերվել է ընդհանուր 1․9 գրամ քաշով թղթի մեջ փաթեթավորած բյուրեղանման «Մեթամֆետամին» տեսակի թմրանյութին նմանվող զանգված: Գ.Ս․-ն տվել է ինքնախոստովանական ցուցմունք։