Սիմոնյանը հավաստիացրել է` Հռոմի ստատուտը կվավերացվի

PanARMENIAN.Net - Հայաստանի Ազգային ժողովի նախագահ Ալեն Սիմոնյանն ասել է, որ խորհրդարանըամենայն հավանականությամբ, կվավերացնի Միջազգային քրեական դատարանի Հռոմի ստատուտը։

«Ամենայն հավանականությամբ Հռոմի ստատուտը կվավերացվի։ Փաստաթուղթը գտնվում է քննարկման փուլում։ Կքննարկենք, կհասկանանք՝ ինչ օգուտներ կան, իսկ դրանք շատ են, քանի որ մեր երկրի դեմ ռազմական հանցագործություններ են կատարվել ու կատարվում։ Մեզ, մեր երկրին դա (վավերացումը) պետք է», - ասել է Ալեն Սիմոնյանը News.am-ին։

Հայաստանը Հռոմի ստատուտը ստորագրել է 1998 թվականին, բայց մինչև հիմա չի վավերացրել։ Կառավարությունն այն Ազգային ժողովի վավերացմանն է ուղարկել։

2023–ի մարտին Հայաստանի Սահմանադրական դատարանը որոշել է, որ Միջազգային քրեական դատարանի Հռոմի կանոնադրությունը համապատասխանում է երկրի Սահմանադրությանը: Դրանից մեկ շաբաթ առաջ Հաագայի Միջազգային քրեական դատարանը Ռուսաստանի նախագահ Վլադիմիր Պուտինին ձերբակալելու օրդեր էր տվել: Ռուսական կողմը մտահոգություններ ունի, թե Հռոմի ստատուտի վավերացումը ռիսկեր է պարունակում Հայաստանի և Ռուսաստանի դաշնակցային հարաբերությունների համար:

Մոսկվան Երևանից պարզաբանում է խնդրել Հռոմի ստատուտի վավերացման վերաբերյալ և հայտարարել, որ իր հետագա գործողությունները կբխեն հայկական կողմի պատասխանից։