Կանադան շատ կարճ ժամանակահատվածում 2 դիտորդ կուղարկի Հայաստան, որոնք կմիանան Եվրոպական Միության քաղաքացիական դիտորդական առաքելությանը: Այդ մասին Ջերմուկում լրագրողների հետ զրույցում հայտարարել է ՀՀ արտաքին գործերի փոխնախարար Պարույր Հովհաննիսյանը։
Ջերմուկ էր այցելել նաև Կանադայի արտաքին գործերի նախարար Մելանի Ջոլին։
«Կանադայի արտաքին գործերի նախարարն ասաց, որ Կանադան ոչ ԵՄ անդամ առաջին երկիրն է, որը ցանկություն է հայտնել դիտորդներ ուղարկել Հայաստան, երկու դիտորդ կարճ ժամանակահատվածում ժամանելու են Հայաստան։ Կարծում ենք, որ Կանադան հետագայում նաև կընդլայնի իր այս ներդրումը»,- ասել է Հովհաննիսյանը, հայտնում է Aysor.am-ը։
Փոխնախարարն ասել է, թե Ջոլին շեշտել է՝ Կանադայի համար կարևոր է Հայաստանի տարածքային ամբողջականությունը։
Կանադայի արտաքին գործերի նախարարն այցելել է Ջերմուկի հատվածում տեղակայված հայկական մարտական դիրքեր, ծանոթացել այդ հատվածում Ադրբեջանի հետ սահմանին առկա իրավիճակին։
Հայաստանի զինված ուժերի 5-րդ բանակային կորպուսի հրամանատար Սասուն Բադասյանը Կանադայի ԱԳ նախարարին ներկայացրել է օպերատիվ իրավիճակը և տվյալներ փոխանցել այդ հատվածում Ադրբեջանի կողմից Հայաստանի ինքնիշխան տարածքների օկուպացիայի վերաբերյալ: