Խորհրդարանական «Քաղաքացիական պայմանագիր» խմբակցության քարտուղար Արթուր Հովհաննիսյանը, արձագանքելով այն հարցին, թե արդյոք իր ներկայացրած ուժը պատրաստ է Միջազգային քրեական դատարանում հայց ներկայացնել ընդդեմ Ադրբեջանի նախագահ Իլհամ Ալիևի, ասել է, որ նպատակը ձևակերպված չէ կոնկրետ անձի դեմ։
Նա հավելել է, որ նպատակը հանցագործությունները պատժելն է, գրում է Panorama.am-ը։
«Որպես նպատակ ՀՀ-ն իր առաջ դրել է նպատակ բոլոր կատարված հանցագործությունների համար քայլեր ձեռնարկել, թե դրա արդյունքում ո՞ր սուբյեկտը պատասխանատվության կենթարկվի, դա արդեն իրավական հարց է։ Այսինքն՝ որպես այդպիսին նպատակը ձևակերպված չէ կոնկրետ անձի դեմ, կամ որևէ այլ սուբյեկտի դեմ։ Նպատակը հանցագործությունները պատժելն է»,-հայտարարել է Արթուր Հովհաննիսյանը։
Հայաստանը փետրվարի 1–ից դարձել է Միջազգային քրեական դատարանի 124–րդ լիիրավ անդամ։ Հայաստանի պաշտոնյաները հայտարարում են, որ այսուհետ Երևանը կարող է դատարանի առաջ բարձրացնել Հայաստանի և նրա բնակչության դեմ Ադրբեջանի ագրեսիայի և ռազմական հանցագործությունների հարցը։ Մոսկվան բացասաբար է ընդունել ՀՀ որոշումը, քանի որ այդ կառույցը Ռուսաստանի բարձրագույն ղեկավարությանը ձերբակալելու օրդեր է տվել։ Ըստ Ադրբեջանի ԱԳՆ–ի՝ ՀՀ–ում Հռոմի ստատուտի վավերացումը «այդ ինստիտուտներն իր անհիմն նկրտումների համար օգտագործելու փորձ է»:
