Վաղարշապատի նախկին քաղաքապետ Դիանա Գասպարյանին մեղադրանք է ներկայացվել

PanARMENIAN.Net - «Ազատության» տեղեկություններով՝ մեղադրանք է առաջադրվել Վաղարշապատի նախկին քաղաքապետ Դիանա Գասպարյանին: Թե կոնկրետ ինչ հոդվածով կամ հոդվածներով է առաջադրվել մեղադրանքը, դեռևս հայտնի չէ։

Հակակոռուպցիոն կոմիտեից այս տեղեկությունը հրաժարվել են մեկնաբանել։

37-ամյա Դիանա Գասպարյանը, որի ընտանիքի անդամները նրա պաշտոնավարման ընթացքում տարբեր աղմկահարույց պատմությունների մեջ են հայտնվել, պաշտոնը լքելու մասին հայտնել էր մայիսին՝ պատճառաբանելով, թե 7 տարվա պաշտոնավարումից հետո որոշել է ժամանակն այսուհետ նվիրել ընտանիքին:

Փետրվարին «Ազատությունը» բացահայտել է, որ Գասպարյանը կնքել է 13.6 միլիոն դրամ արժողությամբ պայմանագիր իր սկեսրայրի հետ՝ սեղմված բնական գազ մատակարարման նպատակով: Նյութի հրապարակումից հետո Կոռուպցիայի կանխարգելման հանձնաժողովը գործ է հարուցել՝ ենթադրյալ շահերի բախման հիմքով:

Նույն ժամանակահատվածում հարցեր են առաջացել նաև Դիանա Գասպարյանի ամուսնու՝ Արամայիս Միրզոյանի գույքային և ֆինանսական հայտարարագրի հետ կապված՝ այնտեղ արձանագրված գումարները զգալիորեն չեն համընկնում նրա փաստացի եկամուտների հետ։ Քաղաքապետի ընտանիքի մասնակցությամբ ամենավերջին աղմկահարույց դեպքն արձանագրվել է նրա սկեսրայրին պատկանող գազալցակայանի տարածքում, որտեղ տեղի է ունեցել սպանություն։