Վարդանյան. ԵԱՀԿ ԽՎ պատվիրակության հետ հանդիպման ենք գնալու մեծ փաթեթով

PanARMENIAN.Net - ԵԱՀԿ խորհրդարանական վեհաժողովի պատվիրակությանը ներկայացվելու է մեծ փաթեթ «իշխանությունների սպառնալիքների, ապօրինի քրեական հետապնդումների վերաբերյալ», հայտարարել է ԱԺ պատգամավոր և ԲՀԿ-ի կողմից պատգամավորության թեկնածու առաջադրված Էլինար Վարդանյանը:

«Վաղը հանդիպելու ենք ԵԱՀԿ խորհրդարանական վեհաժողովի պատվիրակության հետ: Գնալու ենք մեծ փաթեթով՝ իշխանությունների վիրավորանքների, սպառնալիքների, ապօրինի քրեական հետապնդումների, ձերբակալությունների, կալանավորումների բազմաթիվ և կոնկրետ օրինակներով»,-նշել է նա, հայտնում է Panorama.am-ը:

Նրա խոսքով՝ հանդիպման ընթացքում ներկայացվելու են ինչպես ԲՀԿ-ի, այնպես էլ ընտրարշավին մասնակցող մյուս ընդդիմադիր քաղաքական ուժերի նկատմամբ իրականացվող, իրենց գնահատմամբ, ապօրինի գործողությունները։

«Ուզում եմ հավատալ, որ այս անգամ տեսնելու են, ֆիքսելու են, արձագանքելու են: Իսկ եթե՝ ոչ, կրկին ենք դիմելու, մինչև կլսեն, կտեսնեն»,-նշել է նա։

Մայիսի 8-ին մեկնարկած նախընտրական քարոզարշավը կշարունակվի մինչև հունիսի 5-ը։ Հունիսի 6-ը կլինի լռության օր, իսկ հունիսի 7-ին կանցկացվեն ընտրությունները։