«Շատ ափսոս, որ ԵԽԽՎ-ում համազեկուցողների հանդեպ անվստահության արտահայտման մեխանիզմ չկա, քանի որ Հայաստանի հարցերով համազեկուցող Գորան Լինգբլադը չի կարողանում կատարել իր պարտականությունները»,- ՀՀ խորհրդարանում կայացած ճեպազրույցում հայտնել է «Բարգավաճ Հայաստան» խմբակցության պատգամավոր Նաիրա Զոհրաբյանը: Նա նշել է, որ հայկական կողմը Գորան Լինգբլադից չի պահանջում հայամետ դիրքից հանդես գալ, այլ պարզապես ցանկանում է, որպեսզի նա անվերապահ կատարի իր պարտականությունները:
«Սակայն Գորան Լինգբլադն իրեն դրսևորել է որպես ադրբեջանական պատվիրակության անդամ, և ԵԽԽՎ-ում առաջիկա հանդիպման ժամանակ Հայաստանի պատվիրակությունն անպայման կհայտնի իր անհանգստությունն այդ առիթով: Եվ եթե անվստահության արտահայտման մեխանիզմ գոյություն ունենար, ապա այդ մեխանիզմը կկիրառվեր Լինգբլադի նկատմամբ»,- նշել է Նաիրա Զոհրաբյանը: