Նոր առաջարկները, որ ԵԱՀԿ Մինսկի խմբի համանախագահները պատրաստվում են ներկայացնել ղարաբաղյան հակամարտության կողմերին, կապված չեն Կազանում եռակողմ հանդիպման ժամանակ ադրբեջանական կողմի ներկայացրած առաջարկների հետ: Այդ մասին PanARMENIAN.Net-ի թղթակցի հետ զրույցում հայտնել է ԱՊՀ երկրների ինստիտուտի երևանյան մասնաճյուղի տնօրեն Ալեքսանդր Մարգարովը` մեկնաբանելով Ֆրանսիայի ԱԳ նախարար Ալեն Ժյուպպեի հայտարարությունն այն մասին, որ «Լեռնային Ղարաբաղի հակամարտության կողմերին լրացուցիչ առաջարկներ կներկայացվեն Ղարաբաղի վերաբերյալ ինչ-որ համաձայնություն ձեռք բերելու համար»: «Եթե այդ առաջարկները համաձայնեցվեին համանախագահների հետ, ապա կմտնեին հունիսի 24-ի բանակցային փաթեթի մեջ»,- նկատել է նա: Մարգարովը չի համաձայնել նաև այն կարծիքի հետ, որ Ֆրանսիան փորձում է բանակցային գործընթացում իր վրա վերցնել միջնորդներից առաջնորդի դերը: Նա նկատել է, որ թեև մինչ այդ բանակցային գործընթացում Ռուսաստանն էր խաղում «լոկոմոտիվի» դերը, սակայն սերտորեն կապ էր պահպանում մյուս միջնորդների հետ և բանակցություններում ներկայացնում միջնորդների համաձայնեցված դիրքորոշումը:
Հունիսի 24-ին Կազանում Հայաստանի, Ռուսաստանի և Ադրբեջանի նախագահների եռակողմ հանդիպումն ավարտվեց առանց Լեռնային Ղարաբաղի հակամարտության կարգավորման շուրջ հիմնարար սկզբունքների մասին պայմանավորվածությունների ձեռքբերման: Կողմերը համատեղ հայտարարություն ընդունեցին, որում առաջընթաց են արձանագրել այդ նպատակին հասնելու ճանապարհին: «Պետությունների ղեկավարներն արձանագրել են փոխըմբռնման ձեռքբերումն այն հարցերի շուրջ, որոնց լուծումը նպաստում է հիմնարար սկզբունքներին համաձայնելու համար պայմանների ստեղծմանը»,- ասվում է նախագահների հայտարարության մեջ: Փաստաթղթում ասվում է, որ հանդիպման մասնակիցները դիտարկել են հիմնարար սկզբունքների նախագծի համաձայնեցման նպատակով իրականացվող աշխատանքների ընթացքը: Ադրբեջանի և Հայաստանի նախագահներն իրենց երախտագիտությունն են հայտնել Ռուսաստանի, ԱՄՆ և Ֆրանսիայի առաջնորդներին, որոնք ԵԱՀԿ Մինսկի խմբի համանախագահներն են, «Լեռնային Ղարաբաղի հիմնախնդրի կարգավորման հանդեպ նրանց մշտական ուշադրության համար»: Նրանք բարձր են գնահատել ՌԴ նախագահի անձնական ջանքերը պայմանավորվածությունների ձեռքբերմանն աջակցելու գործում, ասվում է համատեղ հայտարարության մեջ:
Ավելի ուշ Հայաստանի արտգործնախարար Էդվարդ Նալբանդյանը հայտնեց, որ Կազանի հանդիպումը բեկումնային չեղավ, որովհետև Ադրբեջանը պատրաստ չեղավ ընդունել եռանախագահների կողմից առաջարկված հիմնարար սկզբունքների վերջին տարբերակը: Ավելին, ադրբեջանական կողմը մոտ մեկ տասնյակ փոփոխություններ առաջարկեց, և դա էր պատճառը, որ Կազանի հանդիպումը բեկումնային չեղավ:
