Հայաստանի ոստիկանության պետ Ալիկ Սարգսյանը հերքել է այն վարկածը, որ ոստիկանությունը, բերման ենթարկելով Հայ ազգային կոնգրեսի (ՀԱԿ) ակտիվիստներին, փորձում է ձախողել քաղաքական երկխոսության գործընթացը իշխանությունների ու ՀԱԿ-ի միջև: Այդ մասին նա հայտարարել է Երևանում կայացած մամլո ասուլիսում՝ մեկնաբանելով ՀԱԿ ակտիվսիտների ձերբակալությունը օգոստոսի 9-ին Տերյանի փողոցում: «Երկխոսությունն առաջին հերթին բխում է իմ և իմ ղեկավարած կառույցի շահերից»,-ասել է Սարգսյանը:
Ըստ նրա, քաղաքական իրավիճակի կայունացումը երկրում թույլ կտա ոստիկանությանը առավելապես կենտրոնանալ իր անմիջական պարտականությունների կատարման, առաջին հերթին, հանցավորության դեմ պայքարի վրա: «Մենք քաղաքականացված կառույց չենք»,-ասել է ոստիկանապետը: Ալիկ Սարգսյանը հայտնել է նաև, որ երեկ այդ գործի փաստով հանդիպել են աշխատանքային խմբերի ղեկավարներ Դավիթ Հարությունյանի ու Լևոն Զուրաբյանի հետ: Ոստիկանապետը հերքել է նաև որոշ լրագրողների այն ենթադրությունը, թե օգոստոսի 9-ի իրադարձությունները կարող են կապված լինել իր կողմից ՀԱԿ հայտնի ակտիվսիտ Տիգրան Առաքելյանից վրեժխնդիր լինելու ցանկության հետ, (Առաքելյանը հայց է ներկայացրել դատարան ոստիկանապետի դեմ), կամ բերման ենթարկված ՀԱԿ երկու ակտիվիստների քրոջ՝ ընդդիմադիր լրագրող Անի Գևորգյանի գործունեության հետ:
Ըստ ՀԱԿ-ի տեղեկատվության, օգոտոսի 9-ին ոստիկանությունը բռնություն է կիրառել Կոնգրեսի համակիրներ Տիգրան Առաքելյանի և Արտակ Կարապետյանի նկատմամբ: «Երբ միջադեպի վայր հասած Կոնգրեսի համակիրներ Արեգ Գևորգյանը, Սահակ Մուրադյանը, Վահագն Գևորգյանը, Սարգիս Գևորգյանը, Դավիթ Քիրամիջյանը փորձել են հարթել միջադեպը, ոստիկանությունը դաժան բռնություն է կիրառել նաև նրանց նկատմամբ: Նրանք բոլորը բերման են ենթարկվել ոստիկանություն»,-ասվում է ՀԱԿ հաղորդագրության մեջ: Ոստիկանությունն իր հերթին մեղադրում է ՀԱԿ ակտիվիստներին ոստիկանների վրա հարձակվելու մեջ:
