«ԱրմենՏել» ավելացնում է գերարագ ինտերնետի ծավալը

PanARMENIAN.Net - «ԱրմենՏել» ընկերության մամլո ծառայությունից հայտնում են շարժական ինտերնետի “Drive” սակագնային փաթեթում գերարագ ինտերնետի ծավալի ավելացման մասին:

2011թ-ի սեպտեմբերի 1-ից «Drive» հետվճարային սակագնային փաթեթի գործող և նոր բաժանորդներին կտրամադրվի ամսեկան 5 ԳԲ գերարագ ինտերնետ նախկին 3 ԳԲ-ի փոխարեն: Գերարագ ինտերնետի ծավալը սպառելուց հետո կապուղու թողունակությունը կկազմի 256 kbps:

«Նոր ուսումնական տարվա սկզբին «ԱրմենՏել» ընկերությունն անակնկալ է մատուցում աշակերտներին և ուսանողներին` շարժական ինտերնետի մեր ծառայությունների բաժանորդներին: Շարժական ինտերնետից օգտվող մեր հաճախորդների մեծ մասը` երիտասարդներն են, և մենք ուրախ ենք հերթական անգամ խրախուսել միասնական օպերատորի բաժանորդներին` սահմանելով մեր ծառայությունների որակի նոր մակարդակ»,- նշել է «ԱրմենՏել»-ի գլխավոր տնօրեն Իգոր Կլիմկոն:

Շարժական ինտերնետի անսահմանափակ հետվճարային “Drive” սակագնային փաթեթի ամսեկան բաժանորդավճարը կազմում է 6000 դրամ: “Drive” սակագնային փաթեթից օգտվելու պայմանագիր կնքելիս` այն 12 ամսվա ընթացքում չխզելու պայմանով, USB-մոդեմը տրամադրվում է անվճար:

Օգոստոսի սկզբին «ԱրմենՏել» ընկերությունը հայտարարեց 3G ցանցի ընդլայնման մասին։ Ծածկույթի գոտու ընդլայնմանը զուգահեռ Հայաստանի խոշոր քաղաքներում 3G կապի տասնյակ նոր կայաններ շահագործման են հանձնվել ի լրումն գործողների: Beeline 3G ցանցը ծածկում է Հայաստանի շուրջ 150 բնակավայր, որտեղ բնակվում է շուրջ 2,9 մլն. մարդ: «ԱրմենՏել» ընկերությունն առաջին օպերատորն է, որ Հայաստանում գործարկեց երրորդ սերնդի բջջային ցանց։