SMS-սպամինգը դարձել է Հայաստանի բջջային օպերատորների վերջին միտումը

12 նոյեմբերի 2011 - 09:27 AMT

PanARMENIAN.Net - Մի քանի տարի առաջ Հայաստանում բջջային օպերատորները սկսեցին պարբերաբար SMS հաղորդագրությունների միջոցով տեղեկացնել իրենց բաժանորդներին իրենց նորույթների, ակցիաների մասին։ Այս մեթոդը նոր էր և բաժանորդները սիրում էին կարդալ, տեղեկանալ։Սակայն այժմ օպերատորները SMS հաղորդագրությունները օգտագործում են որպես գովազդային ծառայություններ և ամեն օր մեծաքանակ սպամ են ուղարկում բաժանորդներին։ Հարցրեք ձեր ընկերներին` որքա՞ն են SMS ստանում օրական, այն էլ «երկարաշունչ» SMS-ներ, հաճախ անհասկանալի։

Շատերն անգամ դադարել են կարդալ այդ SMS-ները, դրանք անհետաքրքիր են, ամեն մարդու չէ որ հետաքրքրում է SMS -ում գովազդվողը։ Անգամ եթե բարեգործական նպատակներով ուղարկված SMS է, միևնույն է, «աչքիդ» էլ բարեգործությունն էլ չի երևում։

Նմանատիպ գովազդը դադարել է արդյունավետ լինել։ Հատկապես, ինտերնետի այս դարաշրջանում մարդիկ ավելի շատ շփվում են օնլայն և SMS ստանալիս արդեն այն համարում են հերթական սպամը և ոչ թե ծանոթի, ընկերոջ կամ մոտ մարդու երկար սպասված SMS-ը։

Այս SMS -ային միտումը գնալով ձեռք է բերում էլեկտրոնային մարքեթինգի հատկություններ։ Սակայն, ցավոք, եթե էլեկտրոնային մարքեթինգում նամակ ստացողը ինքն է բաժանորդագրվում նամակներին և նույն կերպ էլ հնարավորություն ունի հրաժարվել բաժանորդագրությունից, ապա այս պարագայում օպերատորներն առանց բաժանորդների համաձայնության, անգամ առանց նրանց թիրախավորման ուղարկում են «մի գլուխ» SMS -ներ։ Իսկ SMS-ներից ձանձրացած բաժանորդները «ձև» չունեն դրանք չստանալու։