ԱՄՆ-ում հրաժեշտ են տալիս Ուիթնի Հյուսթոնին

18 փետրվարի 2012 - 12:47 AMT

PanARMENIAN.Net - Այսօր ԱՄՆ Նյու Ջերսի նահանգի Նյուարք քաղաքում հրաժեշտ են տալի ռիթմ-էնդ-բլյուզի ամենվառ աստղ Ուիթնի Հյուսթոնին, որը վախճանվեց փետրվարի 11-ին 48 տարեկան հասակում: Նյու Ջերսիի նահանգապետի հրահանգով այդ օրը նահանգում կխոնարհեն ազգային դրոշները, սովորաբար նման պատվի արժանանում են միայն պետական գործիչները:

Ընտանիքի որոշմամբ հոգեհանգիստը տեղի կունենա «Նոր հույս» բապտիստական եկեղեցում, որի երգչախմբում երգել է Ուիթնին մանկության տարիներին:

Եկեղեցական արարողությանը կկարողանան մասնակցել միայն հարզատները և 1,5 հազար պաշտոնապես հրավիրված մարդիկ, այդ թվում նրա նախկին ամուսին՝ Բոբբի Բրաունը:

Չի լինելու նաև ավանդական թաղման արարողություն, երգչուհու հարզատների խնդրանքով: Ոստիկանությունը զգուշացրել է, որ բոլոր մուտքերը դեպի եկեղեցի փակ կլինեն:

Հյուսթոնը մահացել է Լոս Անջելեսլի Beverly Hilton հյուրանոցի համարում, մահն արձանագրել են կանչով դեպքի վայր եկած շտապ օգնության բժիշկները: Երգչուհին 48 տարեկան էր: Մահվան պատճառների մասին պաշտոնական տեղեկատվություն առայժմ չկա: TMZ-ի տվյալների համաձայն, Հյուսթոնը հյուրանոցի աշխատակիցների կողմից հայտնաբերվել է լոգարանում անգիտակից վիճակում: Աղբյուրը հաղորդում է, որ երբ ժամանել է շտապ օգնության ծառայությունը, Հյուսթոնի մարմինն արդեն դուրս էին բերել լոգասենյակից: Երգչուհու համարում նաև հայտնաբերվել են հաբեր, որոնք նրան նշանակել էր բժիշկը: Երգչուհու մահվան պատճառը կկարողանան հաստատել միայն դիահերձումից հետո, հաղորդում է ՌԻԱ Նովոստին:

Վերջին տարիներին երգչուհին բուժվում էր թմրանյութային և ալկոհոլային կախվածությունից: Առողջական վատթարացման պատճառով 2010-ին երգչուհու համաշխարհային շրջագայությունը դադարեցվել էր: Նա այդ ժամանակ նոր էր թողարկել իր ամենահաջողված սկավառակը:

2009-ին երգչուհին թողարկեց "I Look To You" ալբոմը, որը Գերմանիայի, Կանդայի, Իտալիայի և այլ հիթ շքերթներում առաջին հորիզոնականներում էր: Նման հաջողության Հյուսթոնը հասել էր 1993-ին, երբ թողարկվել էր «Թիկնապահ» (Bodyguard) ֆիլմի համար գրված իր երգը: 1992-ին նա նկարահանվեց «Թիկնապահ» ֆիլմում գլխավոր դերում՝ սկսելով նաև իր կինոկարիերան: Հետագայում նա ևս մի քանի ֆիլմերում նկարահանվեց:

Ուիթնի Հյուսթոնը համարվում է Գիննեսի ռեկորդակիր՝ իր մրցանակների թվով: Նա արժանացել է 411 մրցանակների, որոնց թվում 6 Գրեմմի մրցանակ, 23 American Music Awards և 16 Billboard Music Awards: