Բրիտանացի խորհրդարանականը կոչ է արել Հարավային Կովկասին ավելի սերտ համագործակցել ԵՄ հետ

PanARMENIAN.Net - ՀՀ ԱԺ նախագահ Արթուր Բաղդասարյանն ընդունեց Եվրախորհրդարանի «Լիբերալները եւ դեմոկրատները հանուն Եվրոպայի» խմբի ղեկավար Գրահամ Ուոթսոնի գլխավորած պատվիրակությանը: Հայտնում է ՀՀ ԱԺ մամլո ծառայությունը: Պարոն Ուոթսոնի խնդրանքով Աժ նախագահը նրան իրազեկեց սահմանադրության փոփոխություններից հետո խորհրդարանի գործունեության մասին` նշելով, որ շուրջ 70 օրենքներ ու օրենքների փոփոխություններ կան խորհրդարանի օրակարգում` պայմանավորված սահմանադրության հետ համապատասխանեցման անհրաժեշտությամբ: Կարեւորվեց ընդդիմության վերադարձը օրենսդիր գործունեությանը, որի արդյունքում օրենքների քննարկումները ամբողջական են դառնում: Արթուր Բաղդասարյանը ողջունեց Եվրախորհրդարանի որոշումը Հին Ջուղայում հին հայկական խաչքարերի ոչնչացման դեպքերի շուրջ եւ կոչ արեց Հարավային Կովկասի երկրներում դարավոր մշակության ժառանգության պահպանման խնդիրներին առանձնակի ուշադրության դարձնել:



Երկուստեք կարեւորվեց ժողովրդավարության խորացման անհրաժեշտությանը` տարածաշրջանի քաղաքական ու տնտեսական զարգացումների համար, նաեւ` պետությունների միջեւ նորմալ հարաբերությունների հաստատումը եւ կոնֆլիկտների հաղթահարումը խաղաղ ճանապարհով: Նշելով, որ 2007-ին, Ռումինիայի ու Բուլղարիայի անդամակցությամբ, Եվրամիության սահմանները մոտենում են տարածաշրջանին` պարոն Ուոթսոնը զարգացման առումով կարեւորեց տարածաշրջանի երկրների ու Եվրամիության հարաբերությունների ընդլայնումը: Հանդիպման ընթացքում քննարկվեցին նաեւ Եվրախորհրդարանի ու Ազգային ժողովի համագործակցությանն առնչվող հարցեր: Նշենք, որ ALDE-ն բավականին ազդեցիկ դեր է խաղում Եվրախորհրդարանում` լինելով թվով երրորդը: