Հայաստանի եւ Թուրքիայի ԱԳՆ ղեկավարները հաջորդ շաբաթ կհանդիպեն Մյունխենում

PanARMENIAN.Net -
Լոնդոնում Աֆղանստանի գծով միջազգային խորհրդաժողովի շրջանակներում տեղի ունեցավ Հայաստանի ու Թուրքիայի ԱԳՆ ղեկավարներ Էդվարդ Նալբանդյանի եւ Ահմեդ Դավուդօղլուի հանդիպումը: Այդ մասին PanARMENIAN.Net ին է հաղորդել ՀՀ ԱԳՆ մամլո քարտուղար Տիգրան Բալայանը: Ըստ նրա, զրուցակիցները մի քնի րոպե են շփվել:



«Նախարարները պայմանավորվել են հանդիպել եւ շարունակել քննարկումներն այն իրավիճակի շուրջ, որը ստեղծվել է Հայ-թուրքական արձանագրությունների վերաբերյալ ՀՀ ՍԴ որոշումից հետո, հաջորդ շաբաթ Մյունխենում անվտանգության հարցերին նվիրված խորհրդաժողովի շրջանակներում»,-գրում է «Հյուրիեթ Դեյլի Նյուսը»:



Հայ-թուրքական հարաբերությունների կարգավորման մասին Արձանագրությունները ստորագրվել են 2009թ. հոկտեմբերի 10-ին Ցյուրիխում: Արձանագրությունները ստորագրել են Հայաստանի եւ Թուրքիայի ԱԳ նախարարներ Էդվարդ Նալբանդյանը եւ Ահմեդ Դավութօղլուն` Ֆրանսիայի, ԱՄՆ-ի, ՌԴ-ի եւ Շվեյցարիայի ԱԳՆ ղեկավարների ներկայությամբ: Շվեյցարիան որպես միջնորդ է հանդես գալիս հայ-թուրքական բանակցություններում 2007թ. ի վեր: Ըստ փաստաթղթերի, երկրների միջեւ պետք է հաստատվեն դիվանագիտական հարաբերություններ եւ պետք է բացվի 1993թ. ի վեր փակ հայ-թուրքական սահմանը: Հունվարի 12-ին Հայաստանի Սահմանադրական դատարանն Արձանագրությունները Հայաստանի Սահմանադրությանը համապատասխան ճանաչեց: ՍԴ որոշման մեջ Արձանագրությունների վերաբերյալ ոչ մի նախապայմաններ չկան, քանի որ դա հակասում է վճռի կայացման սահմանված կանոնին: ՍԴ որոշման համաձայն Հայ-թուրքական արձանագրությունները համապատասխանում են ՀՀ Սահմանադրությանն ու Հայաստանի Անկախության մասին հռչակագրին:



Թուրքիայի արտաքին գործերի նախարարությունը պաշտոնապես մեկնաբանել է հայ-թուրքական հարաբերությունների կարգավորման մասին Արձանագրությունների վերաբերյալ Հայաստանի Սահմանադրական Դատարանի որոշումը: Ինչպես ասվում է Թուրքիայի ԱԳՆ կայքում տեղակայված հաղորդագրության մեջ, ՀՀ ՍԴ որոշման հիմնավորումը նախապայմաններ եւ սահմանափակող դրույթներ է պարունակում, որոնք հակասում են Արձանագրությունների տառին ու ոգուն:



«2010 թվականի հունվարի 12-ին Հայաստանի ՍԴ-ն երկրի Սահմանադրությանը համապատասխան ճանաչեց 2009թ. հոկտեմբերի 10-ին Ցյուրիխում ստորագրված Արձանագրությունները: ՍԴ որոշումը հրապարակվել է սեղմ տեքստով: Այդ որոշումը խարխլում է Արձանագրությունների շուրջ բանակցությունների էությունը, ինչպես նաեւ հիմնական նպատակները: Նման մոտեցումը չի կարող ընդունվել մեր կողմից»,- ասվում է Թուրքիայի ԱԳՆ հայտարարության մեջ:



Հաղորդագրության մեջ ասվում է, որ Թուրքիան, ըստ ստանձնած պարտավորությունների, հավատարիմ է մնում Արձանագրությունների դրույթներին եւ նույնն ակնկալում է հայկական կողմից:



Անվտանգության քաղաքականության գծով Մյունխենի կոնֆերանս: Իր գոյության ընթացքում Անվտանգության քաղաքականության գծով Մյունխենի կոնֆերանսը վերածվեց ակտուալ քաղաքական եւ քաղաքական-տնտեսական հարցերի կարգավորման կարեւոր համաժողովի: Մյունխենի կոնֆերանսը 1962թ. ի վեր բարձրաստիճան քաղաքական գործիչների, դիվանագետների, զինվորականների եւ փորձագետների հանդիպման ամենամյա վայր է: Դա աշխարհի կարեւորագույն ոչ պաշտոնական համաժողովներից մեկն է, որտեղ քննարկվում են ակտուալ քաղաքական խնդիրներ, որոնք առնչվում են ուժերի հարաբերակցությանը միջազգային հարաբերություններում, միջազգային իրավունքի եւ ժողովրդավարական աշխարհակարգի համակարգի ամրապնդմանը:



Առաջին 30 տարիներին կոնֆերանսի մասնակիցները ՆԱՏՕ-ի երկրների ռազմական ու քաղաքական առաջնորդներն էին, քաղաքագետներն ու ԶԼՄ-ների ներկայացուցիչները: 1990-ականների սկզբից կոնֆերանսի պատվիրակությունների կազմը աստիճանաբար համալրեցին ՌԴ-ի, Չինաստանի, Ճապոնիայի եւ Արեւելյան Եվրոպայի ներկայացուցիչները: 1998թ. համաժողովը ֆինանսավորում է Գերմանիայի կառավարությունը ԳԴՀ պաշտպանության նախարարության բյուջեից:



Մինչեւ 1998թ. Մյունխենի կոնֆերանսի հիմնադիրը, կազմակերպիչն ու անփոփոխ ղեկավարն եղել է գերմանացի հրատարակիչ Էվալդ-Հանյրիխ ֆոն Կլյաստը: 1999-2008թթ. այդ դերը կատարում էր Գերմանիայի կանցլերի նախկին խորհրդական Հորսթ Տելչիկը: Իսկ 2009թ. կոնֆերանսը կգլխավորի գերմանացի իրավապաշտպան եւ ԱՄՆ-ում եւ Մեծ Բրիտանիայում ԳԴՀ նախկին դեսպան Վոլֆգանգ Իշինգերը: