Էդվարդ Նալբանդյան. Հայաստանը երբեք հարցականի տակ չի դնի Հայոց Ցեղասպանության փաստը կամ դրա միջազգային ճանաչման կարևորությունը

PanARMENIAN.Net - Թուրքիան երեսպաշտորեն օգտագործում է կարգավորման գործընթացը` որպես ծխածածկույթ այն անհիմն պնդման համար, թե տարբեր երկրներում Հայոց ցեղասպանության մասին բանաձևերի ընդունումը կարող է վնասել կարգավորման գործընթացին: Մինչդեռ, մենք գործընթացի սկզբից թե° թուրք գործընկերների հետ շփումներում, թե° հրապարակավ պարզ ասել ենք, որ Հայաստանը երբեք հարցականի տակ չի դնի Հայոց ցեղասպանության փաստը կամ դրա միջազգային ճանաչման կարևորությունը: Այս մասին Wall Street Journal-ում տպագրված հոդվածում ասել է ՀՀ ԱԳՆ ղեկավար Էդվարդ Նալբանդյանը:

«Ճշմարիտ հաշտեցումը չի նշանակում մոռանալ անցյալը և երիտասարդ սերունդներին հրամցնել ժխտման հեքիաթներ: Չնայած այն փաստին, որ Թուրքիան 95 տարի շարունակ ժխտում է Հայոց Ցեղասպանությունը, հայկական կողմը չպահանջեց դրա ճանաչումը` իբրև հարաբերությունների կարգավորման նախապայման: Պարադոքսալ է, որ հենց Թուրքիան է փորձում ուղղակիորեն կամ անուղղակիորեն շահարկել այս հարցը` դարձնելով այն նախապայման:

Հայաստանը նախաձեռնեց այդ գործընթացը և ջանք չխնայեց, որպեսզի այն հաջողությամբ պսակվի: Հանգամանքների բերումով, երբ թուրքական կողմը ողջ գործընթացը մղում էր դեպի փակուղի, Հայաստանը ստիպված էր կասեցնել վավերացման գործընթացը: Հայաստանը դեռ մնում է կարգավորման գործընթացում, ինչը աշխարհի ղեկավարների կողմից ըմբռնումով ընկալվեց և ողջունվեց: Հայաստանի և Թուրքիայի միջև բանակցություններն ավարտվել են արձանագրությունների ստորագրմամբ: Չկա ո°չ «լուռ դիվանագիտություն», ո°չ Ցյուրիխի «երկրորդ շրջան», ո°չ բանակցությունների որևէ նոր փուլ, ինչպես դա վերջերս փորձում է հաճախ ներկայացնել թուրքական մամուլը: Այս երկարատև գործընթացում առկախված միակ քայլը հայ-թուրքական արձանագրությունների վավերացումն ու իրագործումն է`առանց հետագա ձգձգման: Հայաստանը պատրաստ կլինի շարժվել առաջ, եթե Թուրքիան վերստին պատրաստ կլինի կարգավորման գործընթացում առաջ գնալ առանց նախապայմանների:

Այսօր աշխարհի տարբեր մայրաքաղաքներ հիշեցնում են, որ գնդակը թուրքական կիսադաշտում է, որ Հայաստանն իր բաժինն արել է, և որ Թուրքիան պետք է ձեռնարկի այն քայլերը, որ նա խոստացել էր կատարել»,- ասել է Էդվարդ Նալբանդյանը: