Երուսաղեմում հայերը բողոքի ցույց են անկացրել Իսրայելի կողմից Հայոց ցեղասպանության հերքման դեմ

PanARMENIAN.Net - Հոկտեմբերի 22-ին Իսրայելի հայ համայնքի ներկայացուցիչները Երուսաղեմում արտգործնախարարության շենքի մոտ բողոքի ցույց են անցկացրել պետության կողմից Հայոց ցեղասպանության հերքման դեմ: Ինչպես հաղորդում է PanARMENIAN.Net ի թղթակցին Երուսաղեմում առկա աղբյուրը, մոտ 200 հայ հավաքվել են Արդարադատության հրապարակում` հայ երգեր կատարելով եւ կարգախոսներ գոչելով: Հայերի հետ միասին ցույցին մասնակցում էին Կնեսեթի պատգամավորներ Յաիր Ցաբանը եւ Խայիմ Օրոնը, ովքեր իսրայելյան կառավարությանը մեղադրել են Հայոց ցեղասպանության հերքման մեջ: Մասնավորապես, Խայիմ Օրոնը խոստացել է նորից բարձրացնել Կնեսեթում Հայոց ցեղասպանության խնդրի քննարկումը: Հունական ուղղափառ եկեղեցու վանահայր Աատալան կոչ է արել հայերին շարունակել պայքարը հանուն Ցեղասպանության ճանաչման: Ցույցի մասնակիցները պլակատներ էին տանում` «Ես զոհ եմ», «Հերքումն այսօր, ցեղասպանություն է վաղը», «Իսրայել, ճանաչի'ր Հայոց ցեղասպանությունը»: «Հայ Դատի» գրասենյակի կողմից նամակ է հանձնվել Արտգործնախարարության ներկայացուցչին, ով խոստացել է այն հանձնել Իսրայելի ԱԳՆ ղեկավարին: