Անցյալ շաբաթ Հայաստանի ներքաղաքական իրադարձությունները հիմնականում ղարաբաղյան հակամարտության կարգավորման շուրջն էին կատարվում: Երևանում օգոստոսի 30-ին տեղի ունեցած մամլո ասուլիսի ժամանակ ՀՀԿ խորհրդարանական խմբակցության պատգամավոր Արտակ Զաքարյանը հայտարարել է, որ Հարավային Կովկասը շարունակում է մնալ համաշխարհային գործընթացների ուշադրության կենտրոնում: Նրա խոսքերի համաձայն, տարածաշրջանի քաղաքականությունը բազմակողմ է և Հարավային Կովկասում կարևոր է ուժերի հավասարակշռությունը: Այդ առումով Զաքարյանն ասել է, որ կարևոր դեր են խաղում վերջերս ձեռք բերված հայ-ռուսական պայմանագրերը, որոնք երկարացնում են տարածաշրջանում հավասարակշռության պահպանման հնարավորությունը, ինչպես նաև պաշտպանում են Հայաստանն արտաքին սպառնալիքներից: «Գաղտնիք չէ, որ Ադրբեջանն իր ապակառուցողական քաղաքականությամբ շարունակում է մնալ տարածաշրջանում կայունության պահպանման գլխավոր սպառնալիքը»,- ասել է ՀՀԿ խմբակցության պատգամավորը և հավելել, որ այդ քաղաքականությանը դիմակայելու տարբերակներից մեկը հայ-ռուսական պայմանագրերն են:

«Ձախողված դիվերսիոն երրորդ գործողությունը ահազանգ է, որ Բաքուն շարունակելու է դիվերսիաներն այնքան ժամանակ, մինչև որ գերի վերցնի հայ զինվորի, ինչի մասին նա երազում է», - գտնում է հայ փորձագետը: