Երևանը՝ ռուսաստանցիների ամառային էժան էքսկուրսիոն երթուղիների եռյակում

PanARMENIAN.Net - Երևանն ընդգրկվել է 2017-ի ամառային ուղևորությունների ռուսաստանցիների համար ամենաէժան էքսկուրսիոն ուղղությունների ցանկում: Այդ մասին հայտնել են BSI Group-ի օպերատորները:

7 էժան ուղղությունների ցանկում Երևանը 2-րդ տեղում է: Էքսկուրսիոն ուղևորությունը Երևան կացությամբ և այլ ծառայություններով ամռանը կարժենա 22.800 ռուբլի: Այս գումարի մեջ է մտնում Մոսկվա-Երևան-Մոսկվա թռիչքը, 3 օրը 3-աստղանի հյուրանոցում, տրանսֆերն օդանավակայանից հյուրանոց և հակառակ ուղղությամբ, ինչպես նաև էքսկուրսիոն սպասարկումը, գրում է Lenta.ru-ն:

Առաջին հորիզոնականում Մինսկն է: Մեկ անձի հաշվարկով ուղևորությունն այնտեղ կարժենա 18.500 ռուբլի: Եռյակը եզրափակում է Պրահան՝ 22.900 ռուբլի ցուցանիշով:

4-րդ տեղում Թբիլիսին է 23.500 ռուբլի արդյունքով, 5-րդը՝ Բուդապեշտը 23.800 ռուբլի ցուցանիշով:

ՏուրՍտատ վերլուծական գործակալությունը ներառել էր Երևանը ԱՊՀ այն քաղաքների ցանկում, որոնք նախընտրել են ռուս զբոսաշրջիկները 2017-ի տոնական մայիսյան օրերին ուղևորությունների համար: Վարկանիշը կազմվել է հյուրանոցների առցանց ամրագրման համակարգի տվյալների վերլուծության հիման վրա: