«Զվարթնոցը» կրկին չի սպասարկում «Արմավիա» ավիաընկերության չվերթները պարտքերի պատճառով

PanARMENIAN.Net - «Միջազգային օդանավակայաններ-Արմենիա» ՓԲԸ-ն («Զվարթնոց») հոկտեմբերի 18-ի առավոտյան կրկին դադարեցրել է «Արմավիա» ավիաընկերության չվերթների սպասարկումը: Այդ մասին PanARMENIAN.Net ի թղթակցի հետ զրույցում հայտարարել է օդանավակայանի մամլո քարտուղար Գևորգ Աբրահամյանը: «Իրավիճակը կփոխվի, եթե ավիաընկերությունը քայլեր ձեռնարկի կուտակված պարտքերի նվազեցման ուղղությամբ»,- ընդգծել է նա:

Նախօրեին «Զվարթնոցը» 4:30-ին վերսկսել է «Արմավիա» ավիափոխադրողի չվերթների սպասարկումը: Սակայն դեռ երեկ ասվել է, որ հոկտեմբերի 18-ին պարզ կլինի «Արմավիայի» չվերթների սպասարկման հետ կապված հետագա իրավիճակը:

Ավիաընկերությունը հաղորդել է, որ Երևանի «Զվարթնոց» միջազգային օդանավակայանի կողմից «Արմավիայի» չվերթների սպասարկման դադարեցումը կապված է նրա հետ, որ «Զվարթնոցի» ղեկավարությանը դուր չի եղել ավիաընկերության նոր բաժնետերը: «Զվարթնոցում» արդեն պնդում են, որ չվերթների սպասարկումը դադարեցվել է պարտքերի պատճառով. Ընկերության պարտքի չափը գերազանցել է նախօրոք համաձայնեցված գումարն ավելի քան 1 մլն դրամով, իսկ «Արմավիայի» ընդհանուր պարտքը կազմում է 3.360 մլն դոլար:

Ավելի վաղ հայկական մամուլում տեղեկատվություն է հայտնվել այն մասին, որ «Արմավիա» ավիաընկերությունը մտադիր է գնել արգենտինահայ գործարար Էդուարդո Էռնեկյանը, ում տնօրինության տակ է գտնվում «Զվարթնոց» օդանավակայանը կամ Հայաստանի նախագահի փեսա Միքայել Մինասյանը: Ավելի ուշ Էռենկյանը հերքեց այդ լուրերը: «Ես ամենևին չեմ պատրաստվում գնել «Արմավիա» ավիաընկերությունը»,- լրագրողներին ասել է նա: