Եվրոպացի պատգամավորները կոչ են արել Բաքվին հեռացնել դիպուկահարներին շփման գծից

PanARMENIAN.Net - Եվրախորհրդարանի անդամներ Էլենի Թեոհարուսը, Ֆրանկ Էնգելը, Տատյանա Ժդանոկը, Էվալդ Շտադլերը, Ինակի Իրազաբալբեյտան, Միշել Ռիվազին, ինչպես նաև Իսպանիայի խորհրդարանի պատգամավոր Ջոն Ինարիտուն հանդես են եկել հայտարարությամբ հրադադարի 20-ամյակի կապակցությամբ: Պատգամավորները, մասնավորապես, նշել են, որ հրադադարի մասին համաձայնագրի կնքման արդյունքում հաստատված փխրուն խաղաղությունը ոչ միայն թույլ տվեց խուսափել հակամարտության սրացումից և հետագա զոհերից, այլ նաև հնարավորություն տվեց խաղաղ կարգավորման ուղիներ որոնել:

«Չնայած բոլոր ջանքերին, հրադադարի 20-ամյա ռեժիմը, ցավոք, չվերաճեց կայուն խաղաղության: Պարբերաբար շարունակվում են ստացվել տագնապալի լուրեր շփման գծում միջադեպերի մասին, որոնք դառնում են երկու կողմերում երիտասարդ զինվորների մահվան պատճառ և կարող են նպաստել մարտական գործողությունների վերսկսմանը»,-ասվում է հայտարարության մեջ:

Պատգամավորները հիշեցրել են, որ գիտակցելով Հարավային Կովկասի ռազմավարական կարևորությունը ԵՄ համար ու այնտեղ կայուն խաղաղության հաստատման անհրաժեշտությունը, Եվրամիությունն իր բանաձևերում կոչ է արել համապատասխան իշխանություններին ձեռնպահ մնալ ուժի կիրառումից, հրաժարվել սադրիչ քաղաքականությունից ու հռետորաբանությունից, ռազմատենչ հայտարարություններից ու պատմության մանիպուլյացիայից:

Պատգամավորները բարձր են գնահատել այն փաստը, որ Լեռնային Ղարաբաղն ու Հայաստանը բազմիցս են հաստատել հավատարմությունը հակամարտության կարգավորմանը բացառապես խաղաղ ճանապարհով ԵԱՀԿ բանակցային գործընթացի շրջանակում: Նրանք բազմիցս են հայտարարել դիպուկահարներին շփման գծից ետ քաշելու պատրաստակամության մասին:

«Մենք կցանկանայինք օգտվել առիթից ու կոչ անել Ադրբեջանի իշխանություններին հետ քաշել դիպուկահարներին շփման գծից ու հայ-ադրբեջանական սահմանից՝ խուսափելու համար հակամարտության հետագա թեժացումից: Կարևոր է նաև, որ Ադրբեջանի ղեկավարությունը պարտավորվի լուծել հակամարտությունը բացառապես խաղաղ ճանապարհով»,-ասվում է հայտարարության մեջ:

Պատգամավորները կոչ են արել ԵՄ-ին աջակցել ԵԱՀԿ Մինսկի խմբի համանախագահներին խաղաղաության ու երկու կողմերի միջև փոխըմբնռման հաստատման գործընթացին՝ հասնելու համար հակամարտության խաղաղ կարգավորմանը, որպեսզի Եվրոպային հատուկ մարդու իրավունքներն ու ազատությունները հասանելի լինեն նաև հարևան երկրներում:

Բիշքեկի արձանագրությունը ստորագրվել է 1994-ի մայիսի 5-ին, բայց ուժի մեջ է մտել մայիսի 12-ին: Արձանագրությունը ստորագրել են բոլոր շահագրգիռ կողմերը՝ Հայաստանը, ԼՂՀ-ն, Ադրբեջանը, ՌԴ-ն ու Ղրղզստանը: Արձանագրությունով կոչ էր արվում 1994-ի մայիսի լույս 9-ի գիշերը դադարեցնել կրակը: Անժամկետ հրադադարի մասին համաձայնագիրը մայիսի 9-ին ստորագրել է Ադրբեջանի պաշտպանության նախարար Մամեդրաֆի Մամեդովը: 1994-ի մայիսի 10-ին Երևանում համաձայնագիրը ստորագրել էր այն ժամանակ պաշտպանության նախարարի պաշտոնը զբաղեցնող Սերժ Սարգսյանը, իսկ մայիսի 11-ին՝ ԼՂ բանակի հրամանատար Սամվել Բաբայանը: Հրադադարն ուժի մեջ մտավ նույն տարվա մայիսի 12-ի կեսգիշերին: