Անկարան չեղյալ է համարել Թուրքիա-ԵՄ հանձնաժողովի նիստը՝ օրակարգում Ցեղասպանության հարցի պատճառով12 փետրվարի 2015 - 12:09 AMT PanARMENIAN.Net - Անկարան չեղյալ է համարել Թուրքիա-ԵՄ համատեղ խորհրդարանական հանձնաժողովի նիստը, որը պետք է տեղի ունենար փետրվարի 18-19-ը Ստամբուլում, քանի որ օրակարգում ներառված էր նաև Հայոց ցեղասպանության հարցի քննարկումը: Այդ մասին գրում է թուրքական Hurriyet-ը: Ավելի վաղ Թուրքիայի իշխանությունները զգուշացրել էին ԵՄ-ին, որ եթե օրակարգում ներառվի Հայոց ցեղասպանության հարցը, Անկարան կհրաժարվի նիստից: Թուրքիայի վարչաետ Ահմեդ Դավութօղլուն հայտարարել է, թե «1915 թվականի իրադարձությունների շեշտադրումը խանգարում է Անկարայի ու Երևանի հարաբերություններին», հայտնում է Թրենդը: Ինչպես հայտնի է, պաշտոնական այցով Կոլումբիայում գտնվող Թուրքիայի նախագահ Ռեջեփ Թայիփ Էրդողանը ելույթ է ունեցել Բոգոտայի Էքտերնադո ու Անկարայի համալսարանների համատեղ ջանքերով կազմակերպված «1915 թվականը` Օսմանյան կայսրության ամենաերկար տարին» վերտառությամբ սիմպոզիումում: Էրդողանը մասնավորապես ասել է. «Պատմությունը, ցավոք, միշտ գրվում է հաղթողի, իշխող ուժի ձեռքով և նրա տեսանկյունից: Մենք խստորեն դեմ ենք դրան, քանի որ այդպիսի պատմությունն արդար լինել չի կարող: Պատմությունը պիտի գրվի պատմաբանների կողմից: 1915-ի հայտնի ցավալի իրադարձություններն էլ հաղթողների և իշխողների ձեռքով են գրված», հայտնում է Panorama.am-ն «Անադոլու» լրատվական գործակալությանը հղումով: Թուրքիայի նախագահը կարծիք է հայտնել, որ անցած այս հարյուր տարիների ընթացքում ոչ հայերի` թուրքերի նկատմամբ կատարած քայլերը, ոչ էլ թուրքերի` հայերի հանդեպ կատարածները լրջորեն ու ճիշտ ձևով չեն քննարկվել, չեն մեկնաբանվել և գրի չեն առնվել: Նրա համոզմամբ` «100 տարի շարունակ կեղտոտ քաղաքական քարոզչության միջոցով քողարկվել է իրական պատմությունը»: «Եթե հայկական սփյուռքն իրապես անկեղծ է, ապա մենք ազնվորեն բացում ենք մեր բոլոր արխիվները: Մենք մինչև այժմ շուրջ մեկ միլիոն պատմական փաստաթղթեր ենք ուսումնասիրել: Մենք դրանք բոլորին հասանելի ենք դարձնում: Եթե Հայաստանն էլ այսպիսի փաստաթղթեր ունի, թող ներկայացնի: Երրորդ երկրներն էլ եթե ունեն, թող ներկայացնեն: Ընտրենք պատմաբանների, քաղաքագետների, իրավաբանների, թող նրանք ուսումնասիրություններ անեն, վերջնական որոշում կայացնեն, այս խնդրին լուծում տանք»: Էրդողանի կարծիքով` չի կարելի հույզերի, սեփական սուբյեկտիվ վերապրումների հիման վրա օբյեկտիվ պատմություն գրել: Թուրքիայի նախագահի բնորոշմամբ. «Հայկական սփյուռքը 100 ամյակի առթիվ ծայրաստիճան բացասական նախաձեռնություններ է իրականացնում: Մենք` Թուրքիան, նման պրոպագանդաների կարիք չունենք: Նման խնդիր չունենք: Մենք միշտ անկեղծ ու բացսիրտ ենք և ուզում ենք, որ 1915թ դեպքերը ճիշտ ուսումնասիրվեն և ճիշտ մեկնաբանվեն»: Ավելի վաղ Թուրքիայի իրավապաշտպան կազմակերպությունները կոչ էին արդել համաշխարհային առաջնորդներին ապրիլի 24-ին մեկնել ոչ թե Չանաքքալե, այլ Երևան: Թուրքիայի Մարդու իրավունքների միությունը, Իզմիրի ասորիների բարեկամության և մշակութային համերաշխության պլատֆորմը, «Նոր Զարթոնք» կազմակերպությունը, www.suryaniler.com մշակութային պլատֆորմը և «Ջան» սոցիալ-քաղաքական հետազոտությունների հիմնադրամը համատեղ մամուլի ասուլիսում դատապարտել են Թուրքիայի ժխտողական քաղաքականությունը, ինչպես նաև Չանաքքալեի 100-ամյակը ապրիլի 24-ին նշելու Անկարայի նախաձեռնությունը: Ըստ իրավապաշտպանների, թուրքական իշխանությունները Հայոց ցեղասպանության 100-ամյակի տարում ցանկանում են շեղել աշխարհի առաջնորդների ուշադրությունն ու մոռացության մատնել Ցեղասպանությունը: Թուրքիայի Մարդու իրավունքների միության փոխնախագահ Մերալ Չըլդըրը նշեց, որ ապրիլի 24-ին՝ Հայոց ցեղասպանության զոհերի հիշատակի օրը, որպես հաղթանակի կեղծ օր տոնելը անարգում է Ցեղասպանության զոհերի հիշատակը: «Ջան» սոցիալ-քաղաքական հետազոտությունների հիմնադրամի ներկայացուցիչ Այհան Իշիկն իր հերթին նշեց, որ եթե պատմության հետ առերեսվելու փոխարեն Թուրքիայի իշխանությունները ապրիլի 24-ին աշխարհի առաջնորդներին Չանաքքալե են հրավիրում, ապա դա կարելի է համարել Ցեղասպանության ժխտման շարունակությունը: Թուրքիայի Մարդու իրավունքների միության անդամ, իրավապաշտպան Էրեն Կեսկինը նշեց, որ Միությունը կատարվածը հենց Ցեղասպանություն է համարում և կոչ է արել աշխարհի առաջնորդներին մենել Երևան, ոչ թե՝ Չանաքքալե: Թուրքիայի նախագահը ի թիվս այլ երկրների ղեկավարների Հայաստանի Հանրապետության նախագահին ևս հրավիրել է ապրիլի 24-ին ներկա լինելու Թուրքիայում Գալիպոլիի ճակատամարտի հարյուրամյակի հիշատակի միջոցառումներին: ՀՀ նախագահը պատասխան նամակում գրել է. Թուրքիան շարունակում է ժխտողականության իր ավանդական քաղաքականությունը և տարեցտարի «կատարելագործելով» պատմության աղճատման իր գործիքակազմը՝ Գալիպոլիի մարտերի հարյուրամյակն այս տարի առաջին անգամ նշում է ապրիլի 24-ին, այն դեպքում, երբ դրանք սկսվել են 1915 թվականի մարտի 18-ին և շարունակվել մինչև 1916 թվականի հունվարի վերջը, իսկ դաշնակիցների ափհանման օպերացիան՝ Գալիպոլիի ցամաքային մարտերը սկսվել են ապրիլի 25-ին: «Ի՞նչ նպատակ է սա հետապնդում, եթե ոչ համաշխարհային հանրության ուշադրությունը Հայոց ցեղասպանության 100-ամյա տարելիցի միջոցառումներից շեղելու պարզունակ նպատակ: Մինչդեռ, մինչև հիշատակի միջոցառում նախաձեռնելը, Թուրքիան շատ ավելի կարևոր պարտականություն ուներ սեփական ժողովրդի և ամբողջ մարդկության հանդեպ, այն է՝ Հայոց ցեղասպանության ճանաչումն ու դատապարտումը: Ուստի, խորհուրդ կտայի համաշխարհային խաղաղությանն ուղղված Ձեր կոչերում չմոռանալ Հայոց ցեղասպանության ճանաչման ուղերձ հղել աշխարհին՝ ոգեկոչելով մեկուկես միլիոն անմեղ զոհերի հիշատակը: Յուրաքանչյուրիս պարտքն է գալիք սերունդներին փոխանցել խեղաթյուրումից զերծ իրական պատմությունը՝ այդ կերպ կանխելով ոճրագործությունների կրկնությունն ու հող նախապատրաստելով ազգերի, հատկապես հարևան ազգերի միջև մերձեցման և հետագա համագործակցության համար»: Հետգրությամբ Սերժ Սարգսյանը շեշտել է, որ դեռևս մի քանի ամիս առաջ Թուրքիայի նախագահին հրավիրել է Երևան՝ 2015 թվականի ապրիլի 24-ին միասին հարգելու Հայոց ցեղասպանության անմեղ նահատակների հիշատակը. «Մեզ մոտ ընդունված չէ հյուրընկալվել հրավիրվողին՝ առանց սեփական հրավերի պատասխանը ստանալու»: Ուշագրավ Նա սուտ է անվանել այդ տեղեկությունները
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը | Հայաստանում անցկացվել է առաջին Bug Bounty մրցույթը Խոցելիություններ գտած մասնակիցները, ըստ դրա լրջության, պարգևատրվում են Շվեյցարացի մասնագետները Լոռիում են․ Գնահատելու են աղետից հետո ենթակառուցվածքների վիճակը Նրանք հետաղետային կարիքների խորքային գնահատում կիրականացնեն Պապիկյանը Բուլղարիայում պայմանավորվածություններ է ձեռք բերել ռազմարդյունաբերական ընկերությունների հետ Նա այցելել է «ՀԵՄՈՒՍ-2024» միջազգային ցուցահանդես Վերաբացվել են Ovio-ի վերափոխված և նորացված վաճառքի և սպասարկման սրահները Սրահները շարունակում են գործել նախկին հասցեներում |