Բունդեսթագի փոխխոսնակ. Գերմանիան ուզում է օգնել հայերին և թուրքերին շփման եզրեր գտնել

PanARMENIAN.Net - Գերմանիան պատրաստ է աջակցել հայ և թուրք ժողովրդների միջև հարաբերությունների կարգավորմանը: Այդ մասին Երևանում հայտարարել է Բունդեսթագի փոխխոսնակ Էդելգար Բուլմանը ՀՀ փոխարտգործնախարար Էդուարդ Շարմազանովի հետ համատեղ ճեպազրույցի ժամանակ, հայտնում է «Նովոստի-Արմենիան»:

«Հաշվի առնելով Գերմանիայի պատմության մութ էջերը` մենք ցանկանում ենք պատասխանատվություն ստանձնել և օգնել հայ և թուրք ազգերին շփման եզրեր գտնել` համակերպվելով սեփական պատմության հետ», - ասել է Բուլմանը Նրա խոսքով, դա բարդ, բայց հնարավոր քաղաքական ուղի է, որով կարող են ընթանալ Հայաստանը և Թուրքիան` երկխոսության և միմյանց միջև հարաբերությունների վերսկսման նպատակով:

Հունիսի 2-ին գերմանական Բունդեսթագը պատրաստվում է ընդունել Հայոց ցեղասպանությունը. Քրիստոնյա-դեմոկրատական Դաշինքը, Քրիստոնյա-սոցիալիստական դաշինքը, Սոցիալ-Դեմոկրատներն ու Կանաչների կուսակցությունը, կարծես, համաձայնության են եկել բանաձևի վերաբերյալ: Փաստաթղթի տեքստը հրապարակված չէ:

Բանաձևը կրում է «101 տարի առաջ Օսմանյան կայսրությունում տեղի ունեցած հայերի ու այլ քրիստոնյա փոքրամասնությունների ցեղասպանության հիշատակին» անվանումը: Այնուամենայնիվ, օրինագիծը չի դրվի անվանական քվեարկության. դա նշականում է, որ պատգամավորներն, ովքեր քվեարկելու ցանկություն չեն ունենա, կարող են ձեռնպահ մնալ:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. Հայոց ցեղասպանության միջազգային ճանաչման գործընթացին:

Հայաստանի և Թուրքիայի հարաբերությունների բարելավման գործընթացը 2008 թվականի աշնանը նախաձեռնել էր Հայաստանի նախագահ Սերժ Սարգսյանը։

2009 թ. հոկտեմբերի 10–ին Հայաստանի և Թուրքիայի արտգործնախարարները Ցյուրիխում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման արձանագրությունը», որոնք պետք է վավերացվեին երկու երկրների խորհրդարանների կողմից։ Սակայն 2010 թ.–ի ապրիլի 22–ին Սարգսյանը հայ–թուրքական արձանագրությունների վավերացման գործընթացը դադարեցնելու մասին հրամանագիր ստորագրեց` հայտարարելով, որ Թուրքիան պատրաստ չէ շարունակել սկսած գործընթացը։ Արձանագրությունների վավերացման գործընթացը սառեցված վիճակում է։