Սեպտեմբերի 8-ին վարչապետ Հովիկ Աբրահամյանի հրաժարականից հետո ավտոմատ կերպով հրաժարական ներկայացրեց նաև ՀՀ կառավարությունը: 20-օրյա ժամկետում նորանշանակ վարչապետը՝ Կարեն Կարապետյանը, պետք է նոր կառավարություն ձևավորի:

Միևնույն ժամանակ նախագահ Սերժ Սարգսյանը խոստացավ, որ կադրային փոխոխությունները շարունակվելու են ու լինելու գրեթե բոլոր ոլորտներում՝ նախագահի աշխատակազմից մինչև դատաիրավական համակարգ:

Իսկ մինչև այդ, PAN-ն անցկացրեց «անցանկալի» նախարարների մասին քվեարկություն՝ հարցնելով ընթերցողներին՝ կառավարությունից ում առանց վարանելու հրաժեշտ կտային:

Բնականաբար, «հարցումը» ու հետևությունները ակադեմիական ճշգրտության հավակնություն չունեն ու չեն էլ կարող ունենալ (ինչպես ցանկացած օնլայն-հարցում), թեև որոշակիորեն արտացոլում է հանրության տրամադրությունը:

Հարցմանը մասնակցել է 13.238 մարդ: Նրանց մեծ մասը՝ մոտ 86%-ը, ՀՀ-ից է, մոտ 4.7%-ը ՌԴ-ից, 4.2%՝ Եվրոպայից, 3%-ը՝ ԱՄՆ և Կանադա:

Արդյունքում առաջին «պատվավոր» հորիզոնականը զբաղեցնում է ԱԳ նախարար Էդվարդ Նալբանդյանը՝ 18.37%, նրան հաջորդում է տրանսպորտի և կապի նախարար Գագիկ Բեգլարյանը՝ 17.62%, այնուհետև մշակույթի նախարար Հասմիկ Պողոսյանն է՝ 15.98%: «Չսիրվածների» 4-րդ տեղում ֆինանսների նախարար Գագիկ Խաչատրյանն է՝ 13.34%, 5-ում՝ սփյուռքի նախարար Հրանուշ Հակոբյանը՝ 10.47%:

Սա PAN-ի նմանատիպ երկրորդ հարցումն էր: Առաջինը եղել է փետրվարին՝ ՀՅԴ-ՀՀԿ կոալիցիայի կազմավորումից հետո: Այն ժամանակ էլ լսարանը դեմ էր արտահայտվել ֆինանսների (15.62%), սփյուռքի(10.94%), մշակույթի(11.29%) նախարարներին: Սեյրան Օհանյանի և Էդվարդ Նալբանդյանի դեմ քվեարկողների քանակը գրեթե եռապատկվել է՝ 1.5 ու 6%-ից մինչև, համապատասխանաբար, 4.41 ու 18.37%: Հավանաբար, այս հարցում իր դերն է խաղացել Քառօրյա պատերազմը:

Կարդացեք նաև՝ «Դրայվի» վերադարձը. Նախկին քաղաքապետը՝ նոր վարչապետի թեկնածու

Հովիկ Աբրահամյան, թվապատում.Նախկին վարչապետի կառավարման 29 ամիսը