// IP Marketing video - START// IP Marketing video - END

Ֆրանսիական Պրոպարկոն և Ամերիաբանկը $20 մլն-ի վարկային պայմանագիր են կնքել

Ֆրանսիական Պրոպարկոն և Ամերիաբանկը $20 մլն-ի վարկային պայմանագիր են կնքել

PanARMENIAN.Net - Պրոպարկոն Ֆրանսիական զարգացման գործակալության դուստր ձեռնարկությունը, որն իր գործունեությունն է ծավալում մասնավոր հատվածի զարգացման ուղղությամբ և Ամերիաբանկը, ՀՀ-ում Ֆրանսիայի դեսպան Ժան-Ֆրանսուա Շարպանտիեի ներկայությամբ, նոյեմբերի 29-ին կնքեցին 20 միլիոն ԱՄՆ դոլարի վարկային պայմանագիր:

Տրամադրված ֆինանսավորման գումարը նախատեսում է ուղղել Հայաստանում էներգաարդյունավետության, վերականգնվող էներգետիկայի, գյուղատնտեսության, սննդի վերամշակման, կրթության և առողջապահության ոլորտներում գործարարության աջակցության, տնտեսական աճի խթանման և աշխատատեղերի ստեղծման տեսանկյունից կենսական նշանակություն ունեցող ծրագրերի իրականացմանը: Նշվել է, որ ճկուն պայմաններով երկարաժամկետ ֆինանսավորումը կնպաստի երկրում գործարարության աճին և ընդլայնմանը, ինչպես նաև տեղական և արտահանման շուկաներում հայկական ընկերությունների մրցունակության բարձրացմանը:

Սա Ամերիաբանկի և «Պրոպարկո» ընկերության միջև կնքված երկրորդ գործարքն է: Պրոպարկոյի առաջին ֆինանսական ներդրումը Հայաստանում կատարվել էր դեռևս 2013 թ-ին, երբ ընկերության և Ամերիաբանկի միջև կնքվեց 15 մլն ԱՄՆ դոլարի չափով վարկային պայմանագիր՝ փոքր և միջին ձեռնարկությունների, էներգաարդյունավետության, վերականգնվող էներգետիկայի ոլորտների ֆինանսավորման նպատակով: Երեք տարի անց Պրոպարկոն ընդլայնում է տնտեսության այն հատվածների ցանկը, որոնք պետք է ֆինանսավորվեն Ամերիաբանկի հետ կնքված նոր վարկային պայմանագրով տրամադրվող միջոցների հաշվին:

ՀՀ-ում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեի խոսքով, Ֆրանսիական զարգացման գործակալության դուստր ձեռնարկությունն ընդլայնում, հզորացնում է իր գործունեությունը Հայաստանում:

«Ընկերությունն իր հիմնադրման տարվանից՝ 1977-ից ի վեր զբաղվում է ձեռնարկությունների, ֆինանսական հաստատությունների օժանդակությամբ, փոքր և միջին ձեռնարկությունների գործունեության զարգացմամբ: 2013-ին Ամերիաբանկին տրամադրված $15 մլն-ի առաջին վարկի շահառուն էր հայկական 4 ձեռնարկությունը:

Այս անգամ 20 մլն-ն ուղղվելու է էներգետիկ արդյունավետության, ագրոբիզնեսի, էներգիայի վերականգնվող աղբյուրների և մթերքների մշակմամբ զբաղվող ընկերություններին: Պայմանագիրը լիովին համահունչ է զարգանցման Ֆրանսիական զարգացման գործակալության որդեգրված ընդհանուր քաղաքականությանը. կանաչ տնտեսության մշտական աճ, կայունության ապահովում: Ինչպես նաև, համահունչ է հայկական իշխանությունների քաղաքականությանը. էներգետիկ արդյունավետության, վերականգնվող էներգիայի աղբյուրների զարգացում», - նշեց դեսպանը:

«Ուրախ ենք, որ 2013 թ-ից համագործակցում ենք Հայաստանում առաջատար ֆինանսական հաստատություն համարվող Ամերիաբանկի հետ: Այս նոր վարկը Ամերիաբանկին թույլ կտա ընդլայնել վերականգնվող էներգետիկայի ոլորտում իր նախագծերի պորտֆելը և խթանել բանկի աճը բնակարանաշինության, գյուղատնտեսության, առողջապահության և կրթության վարկավորման բնագավառներում: Նշված հատվածներին աջակցելը հստակ կերպով համապատասխանում է «Պրոպարկո» ընկերության և Ֆրանսիական զարգացման գործակալության քաղաքականությանը», - նշեց «Պրոպարկո» ընկերության ֆինանսական հաստատությունների գծով ղեկավար Գիյոմ Բարբրուսը:

Նրա խոսքով, 3-4 տարվա ընթացքում հետևել է Ամերիաբանկի իրականացված ծրագրերին՝ փաստելով Բանկի առաջընթացը:

«Թվային բոլոր ցուցանիշները վկայում են, որ բանկն առաջատարի դիրք է զբաղեցնում, նրան հաջողվել է ֆինանսական ուժեղ համակարգ կառուցել՝ գրագետ մենեջմենթի և համապատասխան հմուտ, փորձառու կադրերի աշխատանքի շնորհիվ», - հավելեց Բարբրուսը:

Ամերիաբանկի գլխավոր տնօրեն Արտակ Հանեսյանի խոսքով, պայմանագիրը կարևոր է ՀՀ տնտեսության զարգացման համար, քանի որ ուղղված է երկարաժամկետ և մատչելի տոկոսադրույքներով ֆինանսական միջոցների ներգրավմանը:

«Հետևողականորեն աշխատելու ենք, որպեսզի միջազգային կազմակերպություններից բարենպաստ պայմաններով միջոցներ ներգրավենք, մեր տնտեսության ֆինանասավորումն իրականացնենք: Այս տարիների ընթացքում ավելի քան $300 մլն-ի վարկային ռեսուրսներ ենք ներգրավել, որոնք նպատակաուղղվել են ՓՄՁ-ների աջակցությանը, գյուղմթերքների արդատրությանը, էներգախնայողությանը: Այդ ներդրումները նպաստել են տնտեսվարող սուբյեկտների զարգացմանը և նոր աշխատատեղերի ստեղծմանը», - ասաց Հանեսյանը:

«Ամերիաբանկը շատ բարձր է գնահատում «Պրոպարկո» ընկերության հետ համագործակցությունը: Այս երկրորդ վարկային պայմանագիրը, որի գումարն ավելի մեծ է, միանշանակ կընդլայնի մեր համագործակցության շրջանակները՝ ծառայելով տարբեր ոլորտներ ներկայացնող մեր հաճախորդների շահերին: Կարծում ենք, որ սա նշանակալի օր է Հայաստանի և Ֆրանսիայի միջև գործարար հարաբերությունների հաստատման տեսանկյունից: Այս պայմանագիրը որպես լուրջ հիմք կծառայի Հայաստանի տնտեսության առանցքային ենթակառուցվածքներում Ամերիաբանկի վարկային պորտֆելի դիվերսիֆիկացման համար», - հավելեց Ամերիաբանկի գլխավոր տնօրենը:

Պրոպարկոն Ֆրանսիական զարգացման գործակալության դուստր ձեռնարկությունն է, որն իր գործունեությունն է ծավալում մասնավոր հատվածի զարգացման ուղղությամբ: Այն 40 տարի շարունակ աջակցում է տնտեսական, սոցիալական և բնապահպանական կայուն զարգացման ծրագրերի իրականացմանը:

Պրոպարկոն ֆինանսավորում և աջակցություն է տրամադրում Աֆրիկայում, Ասիայում, Լատինական Ամերիկայում և Միջին Արևելքում գործող ընկերություններին և ֆինանսական հաստատություններին:

Այն ձգտում է համագործակցության ծրագրեր իրականացնել տնտեսության՝ զարգացման ենթակա առանցքային հատվածներում, այն է՝ ենթակառուցվածքներ (հատկապես վերականգնվող էներգետիկայի ոլորտում), գյուղատնտեսություն, ֆինանսական հաստատություններ, առողջապահություն և կրթություն և այլն և ընդլայնել 2015 թ-ին միջազգային հանրության կողմից ընդունված զարգացման կայուն նպատակների իրականացման գործում մասնավոր հատվածի ներդրումը: Այս առումով Պրոպարկոն ֆինանսավորում է այն ընկերություննը, որոնք ստեղծում են պատշաճ աշխատատեղեր՝ պատշաճ վարձատրությամբ, մատակարարում են հիմնական ապրանքներ և ծառայություններ և իրենց ներդրումն ունեն կլիմայական փոփոխությունները կանխելու պայքարում:

«Ամերիաբանկ» ՓԲԸ-ն Հայաստանի դինամիկ զարգացող բանկերից է և դասվում է երկրի ամենակայուն և խոշոր ֆինանսական հաստատությունների շարքին: Այն Հայաստանում առաջին ներդրումային բանկն է և սկսած 2007թ-ից` տրամադրում է նորարարական բանկային ծառայությունների լայն տեսականի: «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: Այն նաև խոշորագույն հարկատու բանկն է Հայաստանում: 1992 թ-ից ի վեր, երբ ստեղծվեց անկախ Հայաստանի ժամանակակից բանկային համակարգը, Ամերիաբանկն առաջին բանկն է Հայաստանում, որի ակտիվները հատեցին 1 մլրդ ԱՄՆ դոլարի սահմանը:

 Ուշագրավ
Նախատեսվում է մարզադպրոցին կից կառուցել նաև ֆուտբոլի մարզադաշտ
Կարապետյանի խոսքով, այդ ոլորտում այսօր 2000 մասնագետի պահանջարկ կա
Նա ասել է. «Եթե մենք վստահ չլինեինք մատակարարվող վառելիքի որակի վրա, իհարկե, տեխնիկան չէինք աշխատացնի»
Բեռնափոխադրումը կազմել է 2576 տոննա, որը 49.4 տոկոսով գերազանցում է 2016-ի ցուցանիշը