Զատուլին. Լապշինի արտահանձնումով ԱՊՀ-ում վտանգավոր նախադեպ է ստեղծվել

PanARMENIAN.Net - ԱՊՀ տարածքում վտանագվոր նախադեպ է ստեղծվել, ըստ որի միջպետական և միջազգային օրակարգի բարդ հարցերը հասվցում են երրորդ երկրների քաղաքացիների հետապնդման, որոնք հակամարտության մասնակիցներ չեն: Այդ մասին ասվում է ՌԴ Պետդումայի պատգամավոր, ԱՊՀ երկրների ինստիտուտի տնօրեն Կոնստանտին Զատուլինի հոդվածում`նվիրված ռուսաստանցի բլոգեր Ալեքսանդր Լապշինի արտահանձնմանը Բաքվին:

Փետրվարի 7-ին Բելառուսի Գերագույն դատարանն ուժի մեջ է թողել ՌԴ և Իսրայելի քաղաքացի Ալեքսանդր Լապշինին Ադրբեջանին արտահանձնելու որոշումը: Նույն օրը նա տեղափոխվել է Բաքու և այժմ գտնվում է մեկուսարանում:

Զատուլինը հիշեցնում է, որ «Լապշինի ամբողջ մեղքն այն է, որ նա չարտոնված այց է կատարել Լեռնային Ղարաբաղ, որի համար նրան 8 տարվա ազատազրկում է սպառնում»:

«Բողոքարկումներն ու բազմաթիվ միջնորդությունները ձերբակալվածին ազատ արձակելու վերաբերյալ ինչպես ռուսական կողմից, այնպես էլ Իսրայելից, որոնց քաղաքացին է Լապշինը, անպատասխան մնացին Մինսկի կողմից: Այդպիսով, ԱՊՀ տարածքում վտանգավոր նախադեպ է ստեղծվում ըստ որի միջպետական և միջազգային օրակարգի բարդ հարցերը, որոնց հանգուցալուծման համար տարիներ շարունակ աշխատում են պաշտոնական կողմերը, ինչպես օրինակ ղարաբաղյան հակամարտության դեպքում, հանգեցվում են երրորդ երկրների քաղաքացիների հետապնդման, որոնք ոչ մի մասնակցություն չունեն հակամարտությանը»,-ասվում է հոդվածում:

Հեղինակը գրում է, որ «ՌԴ քաղաքացին, առանց նրա համաձայնության և հակառակ նրա կարծիքին, փոխանցվում է մի պետության կողմից մյուսին քաղաքական դրդապատճառով ազատազրկվելու համար»:

«Հատկապես տարակուսելի է այն փաստը, որ որոշումը կայացվել է Բելառուսում, որը ՌԴ հետ Դաշնային միության, ԵՏՄ և ՀԱՊԿ անդամ է, այսինք ամենասերտ հարաբերություններն ունի:

Ես ծանոթ չեմ Լապշինին: Սակայն շատ ցավալի է, որ ադրբեջանական կողմն ընտրել է քաղաքացիական անձին` բլոգերին ու լրագրողին, հետապնդելու ճանապարհը որպես ԼՂ համար պայքարում ինքնահաստատվելու միջոց»,-գրում է Զատուլինը:

Ըստ նրա, Ադրբեջանի այդպիսի վրեժխնդրությունը միայն նվաստացնում է Ադրբեջանի հեղինակությունն այն երկրների հասարակական դաշտում, որոնց կարծիքը պիտի որ կարևոր լինի նրա համար: Դա ստիպում է հիշել «ազգային հզորության այնպիսի ապացույցի մասին», ինչպիսին է Հունգարիայից փրկագնի դիմաց մանյակ Ռամիլ Սաֆարովի արտահանձնումը Բաքվին, որտեղ նրան ազգային հերոսի կոչում շնորհվեց»:

«Ես ամաչում եմ Ալեքսանդր Լուկաշենկոյի և մեր Դաշնային պետության համար: Եթե այն, իհարկե, դեռ գոյություն ունի: Համաձայնեք, վերջին շրջանում դա կասկածներ է հարուցում` մեր ժամանակակից պատմության ամենաբեկումնային ու կրիտիկական պահերին մեր դաշնակցի վարքագծի և ՌԴ մասին նրա դատողությունների ֆոնին»,-ասվում է Զատուլինի հոդվածում:

Վերջում Զատուլինը հույս է հայտնել, որ ՌԴ ԱԳՆ-ն կհասնի Լապշինի վերադարձմանը: «Հակառակ դեպքում մերձավոր արտերկրում քաղաքական կամ տնտեսական դրդապատճառներով օտարերկրյա քաղաքացիներով «առևտրի» համաճարակը կանդրադառնա կրկին իրենց համար ամառային Ղրիմը բացահայտած ՌԴ շարքային քաղաքացիների վրա»,-եզրակացրել է նա:

2016-ի դեկտեմբերին բլոգեր Ալեքսանդր Լապշինին ձերբակալել են Մինսկում Ադրբեջանի հարցումով, որտեղ նա ընդգրկված է «սև ցուցակում» ԼՂՀ այցելելու համար: ԼՂՀ այցելած անձանց համար մուտքն Ադրբեջան արգելված է: Այնուամենայնիվ, 2015-ի հունիսին Լապշինը մուտք է գործել Ադրբեջան Վրաստանի տարածքից ուկրաինական անձնագրով: Նրան հաջողվել է անցնել սահմանային հսկողությունը և հայտնվել Բաքվում, քանի որ ուկրաինական անձնագրում Ալեքսանդր անունը գրված էր «Օլեքսանդր»: Դրանից հետո Ադրբեջանը բլոգերի միջազգային հետախուզոմ էր հայտարարել «Պետական սահմանի մասին» օրենքը և երկրի միգրացիոն օրենսդրությունը խախտելու համար: ՌԴ ԱԳՆ-ն հայտարարել է, որ ՌԴ քաղաքացու արտահանձնումը երրորդ երկիր անթույլատրելի է: