Շիֆը հայ գերիների հարցով լրացում է մշակել 2023-ի Ազգային անվտանգության հատկացումների ակտում

PanARMENIAN.Net - Ադրբեջանում պահվող հայ ռազմագերիներին ու քաղաքացիական անձանց անհապաղ ազատ արձակելու կոչով ԱՄՆ կոնգրեսական Ադամ Շիֆը լրացում է մշակել 2023 թվականի Ազգային անվտանգության հատկացումների ակտում։

Ամերիկայի Հայ դատի հանձնախմբի խոսնակ Էլիզաբեթ Չուլջյանը հայտնել է, որ հաջորդ շաբաթ Ներկայացուցիչների պալատի ընթացակարգային հանձնաժողովում լրացումն ընդունվելու դեպքում միայն այն քվեարկության կդրվի Ներկայացուցիչների պալատում, տեղեկացնում է «Ազատությունը»։

«Այս բանաձևն օրենք պիտի դառնա, էսպես կիսատ չի կարող մնալ։ Կոնգրեսը հաճախ բանաձևեր է ընդունում, որ չեն համաձայնում Սենատի հետ և նախագահի սեղանին չի հասնում։ Այս բանաձևը հաստատ պիտի հասնի նախագահի սեղանին՝ ստորագրության, ուրեմն որքան կարողանանք Ներկայացուցիչների տան և Սենատի հետ աշխատելով դրական՝ ի նպաստ Հայաստանի և Արցախի բաժիններ մտցնել, այնքան ավելի հավանական է, որ գնա նախագահի ստորագրության։ Եթե Ներկայացուցիչների տունն, օրինակ, դրական քվեարկի, առնվազն ազդանշան կգնա Ադրբեջանի կառավարությանը, որ Ներկայացուցիչների տունը հստակ տեսակետ է հայտնել այս խնդրի շուրջ, որ անմիջապես պետք է ազատվեն հայ ռազմագերիները», - ասել է Չուլջյանը։

Այս լրացումից բացի կան նաև այլ պահանջներ։ Մասնավորապես, ԱՄՆ Կոնգրեսի հայկական հարցերով հանձնաժողովի համանախագահ Ջեքի Սփիերը Պետդեպարտամենտից պահանջել է ներկայացնել Ադրբեջանին ռազմական աջակցություն տրամադրելու պատճառները։

«Չորս բարեփոխում կա, որ տարբեր ձևերով փորձում է կրճատել ամերիկյան ռազմական օժանդակությունն Ադրբեջանին։ Մի քանիսը պարզապես նրա մասին են, որ ամերիկյան կառավարությունն որևէ ռազմական օժանդակություն չպետք է ուղարկի Ադրբեջան, ուրիշներն էլ կան, որ ասում են՝ «պետք է նայել, թե մինչև հիմա ռազմական օժանդակության ուղարկված գումարներն ինչ ազդեցություն են ունեցել Արցախի և Արցախի հարցի արդար լուծման վրա»։ Մի քանի այլ բարեփոխումներ էլ կան, որ մենք աջակցում ենք, դրանք էլ Թուրքիայի հետ են կապված, որ ներկայիս ամերիկյան կառավարությունը քննարկում է վաճառել թուրքիային F16 օդանավեր, և Հայաստանի հանձնախումբը ընդհանուր խմբակցություն է ստեղծել տարբեր՝ թուրք, քրիստոնյա և Միջին Արևելքով հետաքրքրված կազմակերպություններով, որ դեմ արտահայտվենք F16 օդանավերի վաճառքին Թուրքիային։ Երկու բարեփոխումներ կան, որ դրա հետ են կապված», - ասել է Ամերիկայի Հայ դատի հանձնախմբի խոսնակը։

Այս լրացումներին իրենց աջակցությունն են հայտնել մեկ տասնյակ կոնգրեսականներ և, Չուլջյանի փոխանցմամբ, Հայ դատի հանձնախումբը հիմա ջանքեր է գործադրում՝ Ներկայացուցիչների պալատի ընթացակարգային հանձնաժողովում քննարկման ժամանակ աջակիցների թիվն ավելացնելու ուղղությամբ:

Ավելի վաղ հայտնի դարձավ, որ ԱՄՆ նախագահ Ջո Բայդենը կրկին հրաժարվել է 907-րդ բանաձևի սահմանափակումների կիրառումից։ Դա նշանակում է, որ ԱՄՆ-ն կշարունակի ռազմական աջակցությունն Ադրբեջանին։

Բայդենը մինչև պաշտոնավարումը ստանձնելը, 2020թ․ հոկտեմբերի 14-ին հայտարարել էր, որ «Միացյալ Նահանգները պետք է ամբողջությամբ իրականացնի և չհրաժարվի «Ազատության աջակցության ակտի» 907-րդ հոդվածի պահանջներից և դադարեցնի ռազմական տեխնիկայի հոսքը դեպի Ադրբեջան»: Առաջին անգամ Բայդենն իր դիրքորոշումից հրաժարվել է 2021թ․ ապրիլի 23-ին։ ‌