Բոնո․ Վաշինգտոնի համար կարևոր է, որ Ադրբեջանն ու Հայաստանը շփվեն անկախ միջնորդական ձևաչափից

PanARMENIAN.Net - Հարավային Կովկասում բանակցությունների հարցերով ԱՄՆ Պետքարտուղարի ավագ խորհրդական Լուիս Բոնոն Բաքվում լրագրողների հետ զրույցում ասել է, որ Վաշինգտոնի համար կարևոր է, որ Ադրբեջանն ու Հայաստանը շփվեն անկախ միջնորդական ձևաչափից։

Նա հավելել է, որ ԱՄՆ-ն պատրաստ է շարունակել աջակցել Հայաստանին և Ադրբեջանին խաղաղության պայմանագիր ստորագրելու նպատակով, հայտնում է Haqqin.az-ը։

«Խաղաղության պայմանագիրը պետք է կայուն լինի։ Եվ դա պետք է գա կողմերից, այլ ոչ թե ԱՄՆ-ից կամ այլ երկրներից», - հավելել է նա։

Նրա խոսքով, Վաշինգտոնի համար կարևոր է, որ Ադրբեջանը և Հայաստանը շփվեն՝ անկախ միջնորդական ձևաչափից։

«Մեր վերջնական նպատակը Ադրբեջանի և Հայաստանի միջև խաղաղության հասնելն է։ Խաղաղությունը ձեռնտու է երկու կողմերին։ Մյունխենի հանդիպմանը երկու կողմն էլ հայտարարել է, որ խաղաղություն է ուզում», - ընդգծել է նա։

Բոնոն հայտարարել է, որ մարտի 7-ին Հայաստան է մեկնելու։

«Իմ այցի նպատակն է խրախուսել կողմերի երկխոսությունը և նոր հանդիպումը», - ասել է նա։

Փետրվարի 18–ին Մյունխենի անվտանգության համաժողովի շրջանակում կայացել է ՀՀ վարչապետ Նիկոլ Փաշինյանի, ԱՄՆ պետքարտուղար Էնթոնի Բլինքենի և Ադրբեջանի նախագահ Իլհամ Ալիևի եռակողմ հանդիպումը։ Հանդիպմանը հանդիպմանը կողմերը քննարկել են Հայաստանի և Ադրբեջանի միջև խաղաղության պայմանագրի նախագծի աշխատանքների ընթացքը։ Օրակարգում են եղել նաև տարածաշրջանային տրանսպորտային ենթակառուցվածքների ապաշրջափակումն ու երկու երկրների միջև դելիմիտացիայի հարցերը։ Ըստ հայկական կողմի՝ վարչապետ Նիկոլ Փաշինյանը վերահաստատել է Հայաստանի նպատակամղվածությունը` հասնելու այնպիսի պայմանագրի ստորագրմանը, որն իսկապես կերաշխավորի տարածաշրջանում երկարաժամկետ խաղաղությունն ու կայունությունը: