ԱՄՆ-ն կոչ է արել Բաքվին հարգել մարդու հիմնարար ազատությունները

PanARMENIAN.Net - ԱՄՆ-ն մտահոգված է Ադրբեջանում ընդունված կուսակցությունների մասին օրենքով։ Այդ մասին Twitter-ի իր միկրոբլոգում գրել է ԱՄՆ պետքարտուղարության պաշտոնական ներկայացուցիչ Նեդ Փրայսը՝ կոչ անելով հարգել մարդու հիմնարար ազատությունները։

«ԱՄՆ-ն անհանգստացած է Ադրբեջանում ընդունված կուսակցությունների մասին օրենքով։ Իշխանություններին կոչ ենք անում հաշվի առնել Վենետիկի հանձնաժողովի և ԵԱՀԿ ժողովրդավարական հաստատությունների և մարդու իրավունքների գրասենյակի առաջարկները, ինչպես նաև հարգել հիմնարար ազատությունները, այդ թվում՝ հավաքների իրավունքը»,-ասվում է գրառման մեջ։

Ադրբեջանի նախագահ Իլհամ Ալիևը հաստատել է «քաղաքական կուսակցությունների մասին օրենքը 2023-ի հունվարին։ Վենետիկի հանձնաժողովը կոչ է արել փոխել օրենքի որոշ դրույթներ։ Ըստ նոր օրենքի, պետգրանցում ստանալու համար կուսակցությունը պետք է առնվազն 5000 անդամ ունենա, պարտավոր է անդամների ցուցակը ներկայացնել իշխանություններին ստուգման համար, պետությունն իրավունք է ստանում կասեցնելու կուսակցության գործունեությունը գործողությունների համար, որոնք կապ չունեն իրավական ակտերի լուրջ խախտումների հետ։