Սամութ. Հայ ժողովուրդն արժանի է ստանալ Հայրիկյանի մահափորձի հետ կապված բոլոր հարցերի պատասխանը

PanARMENIAN.Net - ՀՀ նախագահի թեկնածու Պարույր Հայրիկյանի դեմ մահափորձը խեղաթյուրված դրամայի տարրեր ներմուծեց, սակայն, դրանից զատ, նախընտրական մթնոլորտը Հայաստանում հանդարտ է և նույնիսկ ձանձրալի: Այդ մասին հայտարարել է բրիտանական ոչ կառավարական Links կազմակերպության տնօրեն Դենիս Սամութը:

«Դժվար է ասել, թե ով և ինչու է կանգնած Հայրիկյանի դեմ մահափորձի ետևում: Բայց, ես համաձայն եմ, որ Հայրիկյանի դեմ մահափորձը ուղղված էր ոչ թե մարդու, այլ ավելի շուտ գործընթացի դեմ»,-ասել է բրիտանացի փորձագետը:

Անդրադառնալով ընդհանուր առմամբ նախընտրական արշավին՝ Սամութը նշեց, որ 2012թ. երկու անգամ մրցակցային ընտրություններ անցկացվեցին Հարավային Կովկասում՝ խորհրդարանական ընտրությունները Հայաստանում մայիսին և Վրաստանում հոկտեմբերին: «Դրանք մրցակցային էին ինչպես քարոզարշավի, այնպես էլ մասնակիցների առումով: Ընտրությունները հիմնականում դրական գնահատվեցին, թեև կային որոշ լուրջ խնդիրներ: 2012թ. ԱԺ ընտրությունների համեմատ նախագահական ընտրությունները Հայաստանում առավել հանգիստ են անցնում»,-ասել է նա:

Անդրադառնալով նրան, որ Հայրիկյանն իր մահափորձի մեջ մեղադրել է «ռուսական իմպերիալիզմը», Սամութը նշել է. «Ռուսաստանը ցանկանում է, որ Սերժ Սարգսյանը վերընտրվի ՀՀ նախագահի պաշտոնում, դա բոլորի համար պարզ է: Սակայն, Հայրիկյանը լուրջ մրցակից չէ Սարգսյանի համար, ինչո՞ւ պետք է ձգտեին վերացնել նրան: Չեմ կարծում, թե կարելի է շահարկել այդ թեման: Հուսով եմ, որ համապարփակ ու թափանցիկ քննություն կկատարվի: Հայ ժողովուրդն արժանի է, Հայրիկյան մահափորձի հետ կապված հարցերի պատասխանը ստանալու»: