Ամենաէժան գազը տարածաշրջանում վաճառվում է Հայաստանին: ԱԺ-ում լրագրողների հետ ճեպազրույցում հայտարարեց Էներգետիկայի և բնական պաշարների նախարար Արմեն Մովսիսյանը: Նա համաձայն չէ այսօր ԱԺ-ում հնչած այն դիտարկմանը, թե գազի գնի բարձրացումը Կառավարության ապաշնորհ քաղաքականության հետևանք է: «Եթե մեր կառավարությունն ապաշնորհ լիներ, ամենաէժանը չէր լինի մեզ վաճառվող գազը»,- ասաց նա:
Նա ընդգծեց, որ գազի գնի բարձրացումն ընտրությունների հետ որևէ կապ չունի. «Որ գազի գինը թանկանալու էր, բոլորս էլ գիտենք, սա էլ վերջնական գին չէ, տարիներ հետո նորից նման խնդիր է առաջանալու»: Դիտարկմանը, թե նախագահ Սերժ Սարգսյանն ասուլիսի ժամանակ հերյուրանք էր որակում գազի գնի թանկացման մասին լուրերը, նախարարը արձագանքեց. «Հերյուրանք է, դեռ չի բարձրացել»:
Նա ընդգծեց, որ որևէ բան դեռ հստակ չէ, սակայն միտումը բարձրանալուն է ուղղված: «Բնականաբար չենք բանակցում էժանացնելու համար, եթե մեզ առաջարկեն էժանացնել, մենք առանց բանակցելու երկու ձեռքներս կբարձրացնենք, կասենք այո»: Հարցին, թե տնտեսությունն ինչ վնասներ է կրելու, նախարարը նշեց, որ հաշվարկներ են արել, թե որ ճյուղի վրա ինչ անդրադարձ կլինի, բայց հիմա չի կարող տվյալներ հայտնել:
