Asbarez. Ալի Բաբաջանի ելույթը Լոս Անջելեսում սուտ է սկզբից մինչև վերջ

23 հոկտեմբերի 2013 - 13:19 AMT

PanARMENIAN.Net - Ելույթ ունենալով Լոս Անջելեսի Միջազգային հարցերի խորհրդում (LAWAC), Թուրքիայի փոխվարչապետ Ալի Բաբաջանը ստել է Թուրքիայի տնտեսական առաջընթացի, տարածաշրջանում երկրի դերակատարության ու Հայ-թուրքական արձանագրությունների մասին: Բաբաջանը ներկայացրել է բարգավաճող Թուրքիայի պատկերը, որը միանգամայն հեռու է իրականությունից, գրում է Asbarez-ը:

Ամերիկայի Հայ Դատի հանձնախմբի (ANCA) Հոգաբարձուների խորհրդի անդամ Լևոն Կիրակոսյանի հարցին ի պատասխան՝ Բաբաջանը բնութագրել է հայ-թուրքական արձանագրությունները որպես հարաբերություններին եռամիասնական մոտեցում, ներառյալ ղարաբաղյան կարգավորումը: Փաստորեն, արձանագրություններն ու հետագա բոլոր հայտարարությունները ցույց տվեցին, որ երկու երկրների հարաբերությունների կարգավորումն անհնար է:

Բաբաջանը պատմել է ներկաներին, որ գաղտնի բանակցությունները Հայաստանի ու Թուրքիայի միջև սկսվել են դեռ 2007 թվականին, Շվեյցարիայի միջնորդությամբ, և հայտարարել է, որ երկու երկրները համաձայնվեցին «1915 թվականի իրադարձությունների», այսինքն Հայոց ցեղասպանության, վերաբերյալ հանձնաժողովի ստեղծմանը: Ըստ նրա, Հայաստանի ու Ադրբեջանի միջև համաձայնագրի բացակայության պայմաններում, ինչը կհանգեցներ տարածաշրջանային կայունության, գործընթացը փակուղի մտավ:

Բաբաջանն ասել է, որ Առաջին աշխարհամարտի տարիներին եղել են ողբերգական իրադարձություններ, սակայն Թուրքիայի կառավարությունը ոչ մի ապացույց չունի, դրանք ցեղասպանություն համարելու համար:

Բաբաջանի խոսքը հատուկ մշակված էր հանգստացնելու համար, ինչպես ինքն էր կարծում, ոչինչ չկասկածող ունկընդրին: Այնուամենայնիվ, լսարանի հարցերը ցույց տվեցին, որ նրանք ավելի իրազեկ են թուրքական քաղաքականության ընթացիկ միտումներին: Իր ողջ ելույթի ընթացքում Բաբաջանն ասել է, որ Թուրքիան հաջողությունների է հասել ժողովրդավարացման գործում, վերագրելով դա տնտեսական աճին և անտեսելով շարունակական միջազգային քննադատությունը լրագրողների, ազգային փոքրամասնությունների ու այլախոհների հանդեպ վերաբերմունքի վերաբերյալ:

LAWAC նախագահ Թերի Մաքքարթին գովել է Թուրքիային տնտեսական աճի համար ու բերել է բասկետբոլիստ Քոբի Բրայանթի օրինակը, որը դարձել է Turkish Airlines-ի դեմքը:

Հոկտեմբերի 21-ին շուրջ 200 մարդ էր հավաքվել Թուրքիայի փոխվարչապետ Ալի Բաբաջանի դեմ բողոքի ցույցի Լոս Անջելեսում: Ակցիան կազմակերպել էր Հայ երիտասարդական միությունը (AYF):

Հղումներ թեմայով.

http://asbarez.com

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը:

Հայ-թուրքական հարաբերությունների կարգավորման մասին Արձանագրություններ

Հայ-թուրքական հարաբերությունների կարգավորման մասին Արձանագրությունները ստորագրվել են 2009թ. հոկտեմբերի 10-ին Ցյուրիխում: Արձանագրությունները ստորագրել են Հայաստանի եւ Թուրքիայի ԱԳ նախարարներ Էդվարդ Նալբանդյանը եւ Ահմեդ Դավութօղլուն` Ֆրանսիայի, ԱՄՆ-ի, ՌԴ-ի եւ Շվեյցարիայի ԱԳՆ ղեկավարների ներկայությամբ: Շվեյցարիան որպես միջնորդ է հանդես գալիս հայ-թուրքական բանակցություններում 2007թ. ի վեր: Ըստ փաստաթղթերի, երկրների միջեւ պետք է հաստատվեն դիվանագիտական հարաբերություններ եւ պետք է բացվի 1993թ. ի վեր փակ հայ-թուրքական սահմանը: Հունվարի 12-ին Հայաստանի Սահմանադրական դատարանն Արձանագրությունները Հայաստանի Սահմանադրությանը համապատասխան ճանաչեց: ՍԴ որոշման մեջ Արձանագրությունների վերաբերյալ ոչ մի նախապայմաններ չկան, քանի որ դա հակասում է վճռի կայացման սահմանված կանոնին: ՍԴ որոշման համաձայն Հայ-թուրքական արձանագրությունները համապատասխանում են ՀՀ Սահմանադրությանն ու Հայաստանի Անկախության մասին հռչակագրին: