Նազարբաևը դեմ է Հայաստանի անդամակցությանը ՄՄ-ին Ղարաբաղի պատճառո՞վ24 դեկտեմբերի 2013 - 17:39 AMT PanARMENIAN.Net - Ղազախստանը պատրաստ է ստորագրել Մաքսային միությանը Հայաստանի անդամակցության «ճանապարհային քարտեզը», սակայն հատուկ կարծիքով, քանի որ պահանջում է բացատրել Մաքսային միության սահմանի հարցը Լեռնային Ղարաբաղի խնդրի հետ կապված: Այս մասին Ղազախստանի նախագահ Նուրսուլթան Նազարբաևը հայտարարել է Եվրասիական բարձրագույն տնտեսական խորհրդի նիստում: «Հայաստանի վերաբերյալ «ճանապարհային քարտեզը» հիմնականում համաձայնեցված է, կարծում եմ, այն կարելի է ընդունել: Միևնույն ժամանակ բաց է մնում այն հարցը, թե ղարաբաղյան հակամարտության հետ կապված որտեղ է լինելու Մաքսային միության սահմանը Հայաստանում: Ուստի մենք մեր պաշտոնակիցների հետ միասին կստորագրենք «ճանապարհային քարտեզը», սակայն հատուկ կարծիքով, որը կշարադրվի»,-ասել է Նազարբաևը: Նա հույս է հայտնել, որ փաստաթղթի համաձայնեցման ընթացքում փորձագետները կգտնեն այս հարցի լուծումը: Հավանաբար, Ղազախստանի նախագահը, իսկ նրանից առաջ Բելառուսի նախագահը, Մաքսային միությունը շփոթում են ՆԱՏՕ-ի նման կառույցի հետ, որտեղ չեն ընդունվում չկարգավորված հակամարտություններ ունեցող երկրները: Այսպիսով, Լեռնային Ղարաբաղի խնդիրը շատ հարմար լծակ է ինտեգրման գործընթացներին մասնակցելու հարցում Հայաստանին մերժելու համար ինչպես տարածաշրջանում, այնպես էլ ԱՊՀ տարածքում: Մի կողմից, Նազարբաևին ու Լուկաշենկոյին կարելի է հասկանալ: Ղազախստանը Իսլամական համագործակցության կազմակերպության անդամ է և անում է այն, ինչը ոչ հրապարակավ նախատեսում է ԻՀԿ կանոնադրությունը՝ ամենուր կասեցնել Հայաստանի անդամակցությունը: Լուկաշենկոն, ինչպես հայտնի է, չափից շատ է պարտական Իլհամ Ալիևին, սեփական կարծիք ունենալու համար: Նուրսուլթան Նազարբաևը անկեղծ չէ սահմանի հարցում: Կա Հայաստանի Հանրապետության պաշտոնական սահման և համաձայնագիրը կնքվում է հենց նրա հետ: Ղարաբաղն այստեղ կապ չունի, ինչպես և Ղազախստանի նախագահը, որն իր ժողովրդին ամուր բռունցքի մեջ է պահում՝ կասեցնելով ցանկացած այլախոհություն: Ավելորդ չի լինի հիշեցնել, թե ինչպես Նազարբաևն իշխանության եկավ: 1986 թվականի դեկտեմբերին Ղազախստանի մայրաքաղաք Ալմաթիում զանգվածային անկարգություններ սկսվեցին, քանի որ Ղազախստանի Կոմկուսի առաջին քարտուղարի պաշտոնում Դինմուհամեդ Կունաևի փոխարեն ընտրվեց Գենադի Կոլբինը: Կունաևն անձամբ դեմ էր Նազարբաևի նշանակմանը, որը սկզբում նույնպես ներկայացվել էր այդ պաշտոնի համար: Այնուամենայնիվ, 1989 թվականից մինչ օրս Նազարբաևն է Ղազախստանը ղեկավարում զերծ չմնալով բռնատիրական մեթոդներից: Եվ այս մարդը, որը ճնշում է ցանկացած ընդդիմադիր շարժում իր երկրում, մտադրվել է «սեփական կարծիքն ունենալ Ղարաբաղի հարցում»: Հավանաբար, Նազարբաևը նման յուրօրինակ կերպով շնորհավորեց Ադրբեջանի նախագահ Իլհամ Ալիևին ծննդյան օրվա կապակցությամբ: Ի դեպ, ըստ Եվրասիական տնտեսական հանձնաժողովի կոլեգիայի նախագահ Վիկտոր Խրիստենկոյի, Հայաստանի անդամակցությունը Մաքսային միությանը կնպաստի ղարաբաղյան հարցի կարգավորմանը: «Ղարաբաղի հարցը հիմա չի առաջացել, և կապված չէ ՄՄ-ին Հայաստանի անդամակցության հետ: Դրա համար կան առանձին ձևաչափեր, կան մասնագետներ, որոնք զբաղվում են կարգավորման հարցով ու հանգուցալուծման ուղիներով»,-ասել է նա՝ նշելով, որ ինտեգրացիոն գործընթացները այստեղ պետք է դիտարկել զուտ տնտեսական հարթության վրա: Վիկտոր Խրիստենկոն նշել է, որ երբեք տնտեսական զարգացումը չի խորացրել չկարգավորված իրավիճակներն ու հակամարտությունները, այլ, որպես կանոն, նպաստել է դրանց կարգավորմանը: «Ըստ իս, այսօրվա իրավիճակը կապված Ղարաբաղի հարցի հետ, չի խոչընդոտում Հայաստանի պլաններին և չի բարդացնի, այլ, ավելի շուտ, կբարելավի իրավիճակը Ղարաբաղի շուրջ»,-ասել է նա Երևանում: Սակայն, մյուս կողմից, ՄՄ երկրները, այսինքն Ռուսաստանը, Ղազախստանն ու Բելառուսը լավ առիթ ունեն չստորագրելու «ճանապարհային քարտեզը» Հայաստանի հետ: Չլիներ Ղարաբաղի հարցը, մեկ այլ պատրվակ կգտնվեր: Բայց չգուշակենք՝ իրավիճակը պարզ կդառնա շատ շուտով: Ըստ Վլադիմիր Պուտինի, «ՄՄ-ին Հայաստանի անդամակցության «ճանապարհային քարտեզը» կարող է հաստատվել այսօր: Կարինե Տեր-Սահակյան / PanARMENIAN.Net Ուշագրավ
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը Ամենաընթերցվողը բաժնում | ՀՀ-ն և Հունգարիան դեսպանություններ կբացեն, մայրաքաղաքների միջև ուղիղ չվերթ կգործի Չվերթը կգործարկվի արդեն հուլիսին Առաջին դասարանցիների հայտագրումը կսկսվի հունիսի 10–ից Այն կիրականացվի 3 փուլով Ադրբեջանի հետ սահմանին արդեն սահմանային 40 սյուն է դրվել Երկու երկրների փորձագիտական խմբերի աշխատանքները շարունակվում են Վարչապետի աշխատակազմում անհեթեթ են անվանել Բագրատ սրբազանի՝ ՔՊ բարձրաստիճան անդամների` իրենց միանալու հայտարարությունը «Անհեթեթ է անդրադառնալ նման հարցադրմանը»,–ասել են աշխատակազմից |