Ղրիմի հարցը. Կիևը չի ուզում փչացնել ՀՀ հետ հարաբերությունները, Օբաման կողմ է ՌԴ դեմ պատժամիջոցներին, Մերկելը՝ դեմ27 մարտի 2014 - 18:51 AMT PanARMENIAN.Net - Ուկրաինան մտադիր չէ խզել դիվանագիտական հարաբերությունները Հայաստանի հետ, ասել է Հայաստանում Ուկրաինայի դեսպանատան խորհրդական Իգոր Ռոմանը, հայտնում է «Նովոստի Արմենիան»: «Մեր երկիրը մտադիր չէ դեմարշների գնալ Հայաստանի հետ…Հարցերը մենք արդեն քննարկել ենք, և հաջորդ շաբաթ դեսպանը կլինի Հայաստանում».-ասել է նա «Ճգնաժամն Ուկրաինայում. Ինչպե՞ս այն կարող է ազդել միջազգային հարաբերությունների վրա» քննարկման ժամանակ: Ըստ Ռոմանի, Ուկրաինան մտադիր չէ նվազեցնել իր դիվանագիտական ներկայությունը Հայաստանում կամ խզել վերջինիս հետ դիվանագիտական հարաբերությունները նույնիսկ եթե Հայաստանը դեմ քվեարկի Ղրիմի վերաբերյալ բանաձևին ՄԱԿ-ում: Նա նշել է նաև, որ քվեարկությունը լակմուսի թղթի դեր կկատարի, որի հիման վրա Ուկրաինան հետագայում կկառուցի իր հետագա քաղաքականությունը Հայաստանում: Ղրիմի վերաբերյալ բանաձևը ՄԱԿ ԳՎ-ում քվեարկության կդրվի այսօր՝ մարտի 27-ին: Նախօրեին՝ մարտի 26-ին, Հայաստանի ԱԳՆ մամուլի քարտուղար Տիգրան Բալայանը հայտարարեց, որ Հայաստանը ձեռնպահ կմնա Ղրիմի վերաբերյալ Ուկրաինայի ներկայացրած բանաձևի քվեարկությանը ՄԱԿ Գլխավոր վեհաժողովում: Ըստ բանաձևի նախագծի, Գլխավոր վեհաժողովին առաջարկվել է չճանաչել Ղրիմում մարտի 16-ին կայացած հանրաքվեն անվավեր և համարել, որ այն չի կարող «հիմք ծառայել Ղրիմի Ինքնավար Հանրապետության և Սևաստոպոլ քաղաքի կարգավիաճկի փոփոխության համար»: Կիևն իր դժգոհությունն է հայտնել Երևանի դիրքորոշման վերաբերյալ, որը ԱԳ փոխնախարար Շավար Քոչարյանի միջոցով հայտարարեց, որ Հայաստանը մշտապես պաշտպանել է ժողովրդների ինքնորոշման իրավունքը: Մինչդեռ ԱՄՆ նախագահ Բարաք Օբաման վճռականորեն է տրամադրված շարունակելու Ռուսաստանի դեմ պատժամիջոցները՝ վերջինիս դուրս մղելով Եվրոպայի երկրների համար բնական վառելիքի հիմնական մատակարարի դիրքից, գրում է gorod55.ru-ն: Ելույթ ունենալով մամուլի ասուլիսում ԱՄՆ-Եվրամիություն գագաթաժողովի ավարտին՝ Հյուսիսային Ամերիկայի առաջնորդը հայտարարել է, որ իր երկիրը պատրաստ է լիովին ապահովել Եվրոպայի երկրներին իր գազով այն քանակով, որն անհրաժետ է: Ըստ Օբամայի, իրավիճակն Ուկրաինայում ցույց տվեց, որ անհրաժեշտ է ամրապնդել էներգետիկ անվատնգությունը Հին աշխարհում, իսկ ԱՄՆ-ն կարող է ապահովել անվտանգությունն ու հուսալի գործընկեր լինել: Սակայն, ինչպես գտնում են որոշ փորձագետներ, ԱՄՆ նախագահի այս հայտարարությունները հեռավոր հեռանկարին են վերաբերում, քանի որ տվյալ պահին ԱՄՆ-ն դեռ պատրաստ չէ և չունի տերմինալներ գազի խտացման համար: Եվրոպական ԶԼՄ-ները արդեն անվանել են ամերիկյան առաջարկը հաղթաթուղթ Ռուսաստանի հետ բանակցություններում, քանի որ ռուսական գազից ամենամեծ կախումն ունեցող երկրների մի մասի պայմանագիրը Ռուսաստանի հետ գազի վերաբերյալ սպառվում է արդեն 2015 թվականին: Այդ երկրների թվում են Բոսնիան ու Հերցոգովինան, Հունգարիան, Լիտվան ու Էստոնիան: Իսկ Գերմանիայի կանցլեր Անգելա Մերկելն ասել է, որ Ուկրաինայի շուրջ քաղաքական ճգնաժամը կարելի է հանգուցալուծել առանց Ռուսաստանի դեմ տնտեսական պատժամիջոցների կիրառման: Այդ մասին նա հայտարարել է Բեռլինում Հարավային Կորեայի նախագահ Պակ Կին Հեի հետ հանդիպման ավարտին: ԳԴՀ կառավարության ղեկավարը նշել է, որ Արևմուտքը «չի հասել այն աստիճանին, որը ենթադրում է տնտեսական պատժամիջոցների կիրառում» Մոսկվայի դեմ: «Հուսով եմ, որ դրանից կհաջողվի խուսափել»: «Ես շահագրգռված չեմ սրման մեջ, հակառակը, ես աշխատում եմ իրավիճակը մեղմելու ուղղությամբ», ասել է Մերկելը, հայտնում է ԻՏԱՌ-ՏԱՍՍ-ը: Գերմանացի փորձագետները միակարծիք են, որ տնտեսական պատժամիջոցները Ռուսաստանի դեմ բացասական ազդեցություն կունենան Գերմանիայի տնտեսության վրա: ԳԴՀ և ՌԴ ապրանքաշրջանառությունը անցյալ տարի հասել է 76 մլրդ եվրոյի, ռուս գործընկերների հետ բիզնես ունեն մոտ 6 հազար գերմանական ընկերություններ, իսկ ներդրումների ընդհանուր ծավալը կազմում է 20 մլրդ եվրո: Մոտ 300 հազար աշխատատեղ Գերմանիայում կախված է Ռուսաստանի հետ տնտեսական հարաբերություններից: Իր հերթին, գերմանացի մեկնաբան Պավել Ֆելգենգաուերը կարծում է, որ Պուտինը արագ է գործելու, եթե ցանկանում է զավթել Ուկրաինայի հարավ-արևելքը: Առանցքային օրը ապրիլի 1-ն է: Ղրիմը մեծ կախման մեջ է մնում ցամաքային Ուկրաինայից՝ էլեկտրաէներգիա, ջրամատակարարում, գազ: Ռուսաստանի իշխանությունները հայտարարել են, որ չեն ճանաչում Կիևի կառավարությունն ու համընդհանուր ընտրությունների արդյունքներն Ուկրաինայում առանց դաշնային պետության նոր սահմանադրության ընդունման: «ֆեդերացիան Ուկրաինայի ռուսալեզու շրջանները կդարձնի Ռուսաստանի պրոտեկտորատը: Այդ շրջանների վերահսկումը թույլ կտա Մոսկվային միջանցք տանել դեպի Մերձդնեստր: Արդյունքում «Ուկրաինայի դաշնության» մասերը, գուցե, միանան ՌԴ-ին, »-գրում է Ֆելգենգաուերը: Ըստ ռազմական մեկնաբանի, եթե Պուտինը ցանկանում է զորքեր մտցնել Ուկրաինա, ապա քիչ ժամանակ է մնում: Վաղահաս գարնան պատճառով հողը շուտով կչորանա և ծանր տեխնիկան կկարողանա անցնել հարավային Ուկրաինայի դաշտերով: Առանցքային օրը ապրիլի 1-ն է՝ Ռուսաստանում սկսվում է գարնանային զորակոչն ու արդեն ծառայածների զորացրում է հայտարարվում: Զորացրումից հետո Ռուսաստանի զորքերը կկարողանան վերականգնել մարտունակությունը միայն աշնանը, հայտնում է novayagazeta-ug.ru-ն: Իսկ Մեծ Բրիտանիայի Եվրոպայի գծով նախարար Դևիդ Լիդինգթոնը լատվիական «Diena» պարբերականին տված հարցազրույցում կարծիք է հայտնել, թե չնայած Ղրիմի զավթմանը Ռուսաստանի կողմից, գործակցությունն այդ «պետության հետ» շատ կարևոր է իրենց համար, հատկապես, հաշվի առնելով, որ Ռուսաստանը վետոյի իրավունք ունի ՄԱԿ ԱԽ-ում: «Պետք է շարունակել համագործակցությունը Ռուսաստանի հետ, օրինակ, Իրանի միջուկային ծրագրի շուրջ: Սակայն, հասկանալի է նաև, որ մեր հարաբերություններում փոփոխություններ կլինեն, չէ, որ Ուկրաինայի իրադարձություններից հետո նախկինի պես լինել չի կարող: Մի քանի տասնյակ տարիների ընթացքում սա առաջին դեպքն է Եվրոպայում, երբ մի եվրոպական պետություն ներխուժում է մեկ այլ եվրոպական պետության տարածք՝ զավթելով այն: Ինչը վտանգավոր է ոչ միայն Եվրոպայի, այլ ամբողջ աշխարհի համար»,-ասել է Լիդինգթոնը, հայտնում է newsbalt.ru-ն: Մինչդեռ, Ղրիմի քաղխորհուրդը մարտի 27-ին հրապարակել է հանրապետության տարածքում անցանկալի անձանց ցուցակը, որի մեջ ընդգրկվել են նաև Կիևի նոր իշխանությունները: Ընդամենը ցուցակում 300 մարդ կա, որոնց թվում են նաև Գերագույն ռադայի նշանակած Ուկրաինայի նախագահ Ալեքսանդր Տուրչինովը և վարչապետ Արսենի Յացենյուկը, փոխվարչապետ Վիտալի Յարեման, Ազգային անվտանգության և պաշտպանության խորհրդի ղեկավար Անդրեյ Պարուբին, ՆԳՆ պետ Արսեն Ավակովը, ինչպես նաև Ուկրաինայի նոր դատախազ Օլեգ Մախնիցկին և այլոք: Անցանկալի անձանց ցուցակում է նաև նախագահի խորհրդականի պաշտոնից ազատված Աննա Գերմանը, «Ուդառ» կուսակցության առաջնորդ Վիտալի Կլիչկոն, «Սվոբոդայի» ղեկավար Օլեգ Տյագնիբոկն ու Ռեգիոնների կուսակցության փոխնախագահ Սերգեյ Տիգիպկոն: Ուկրաինայի նախկին վարչապետ Յուլիա Տիմոշենկոն այդ ցուցակում չկա: Ավելի վաղ պաշտպանության նախարարի պաշտոնակատար Իգոր Տենյուխը և Ուկրաինայի առաջին փոխնախագահ Վիտալի Յարեման չկարողացան Ղրիմ մեկնել: Ինչպես հայտնել են լրագրողները, ինքնաթիռին թույլ չեն տվել վայրէջք կատարել: Փետրվարի վերջում Կիևում իշխանափոխությունից և նախագահ Յանուկովիչի տապալումից հետո նախկին Ղրիմի ինքնավարությունը հայտարարեց, որ դեմ է Եվրամայդանին և չի սատարում երկրի քաղաքականությանը: Ղրիմի խորհրդարանը դիմեց ՌԴ նախագահ Պուտինին՝ խնդրելով ապահովել թերակղզու բնակիչների անվտանգությունը: Մարտի 21-ին հանրապետությունում անցկացված հանրաքվեից հետո ՌԴ նախագահը վավերացրեց Ղրիմի և Սևաստոպոլ քաղաքի ինտեգրումը ՌԴ կազմում: Մարտի կեսին Ղրիմի վարչապետ Սերգեյ Ակսյոնովը հայտարարեց, որ իշխանությունը «որը ուժային ճանապարհով է յուրացրել Ուկրաինայի քաղաքացիների կյանքը տնօրինելու իրավունքը, երկար չի գոյատևի»: Ըստ նրա, Կիևի նոր ղեկավարությունն ի սկզբանե չուներ ճանապարհային քարտեզ, որը նա կարող էր առաջարկել Ուկրաինայի հարավ-արևելյան շրջանների ռուսալեզու բնակչությանը: Եթե նոր իշխանությունը կարողանար գործողությունների իրական ծրագիր ներկայացնել, «իրավիճակն այլ կերպ կզարգանար և անդունդի եզրին չէր հասնի», հայտնում է KM.ru-ն: Ուշագրավ
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը Ամենաընթերցվողը բաժնում | ԻՆԳՈ-ն ապահովագրել է Career Сity Fest 2K24-ը և ներկայանում է շուկայում առաջին՝ միջոցառումների ապահովագրման պրոդուկտով Ապահովագրության պայմաններն ընտրվում են՝ հաշվի առնելով յուրաքանչյուր իրադարձության առանձնահատկությունները Ակբա բանկ․ ՀՀ-ում առաջին անգամ թողարկվում են UnionPay International-ի քարտեր Ակբա բանկը քարտերը տրամադրում է ռեզիդենտ և ոչ ռեզիդենտ ֆիզիկական և իրավաբանական անձանց Վարչապետ․ ՀԱՊԿ-ն ուզում էր ՀՀ գալ ոչ թե որպես դաշնակից, այլ` խաղաղապահ Նա հավելել է, որ դա էր ՀԱՊԿ-ի հետ հայկական կողմի ամենամեծ խնդիրը Փաշինյան. Ցեղասպանության զոհերի ցուցակագրման օրակարգ իշխանության օրակարգում երբեք չի եղել Նա նշել է, որ այդ մասին ավելի վաղ էլ է հայտարարվել |