Հարյուրավոր մարդիկ գրառումներ են կատարում Twitter-ի #SaveKessab էջում31 մարտի 2014 - 18:20 AMT PanARMENIAN.Net - Save Kassab էջը գնալով պահանջված է դառնում սոցցանցերում, մասնավորապես, Twitter-ում և Instagram-ում: Ըստ ամերիկյան Social News Daily պարբերականի, արշավի կողմնակից օգտատերերը դիմում են նաև հայտնի մարդկանց ու քաղաքական գործիչներին, որպեսզի նրանք իրենց կարծիքը հայտնեն Սիրիայում վերջին իրադարձությունների մասին: Քարոզարշավին են միանում հայտնի մարդիկ՝ մարզիկներ, շոու բիզնեսի աստղեր, այդ թվում նաև Քիմ և Քլոե Քարդաշյանները, երգչուհի Շերը, ԱՄՆ-ում հայտնի Blink 182 խմբի թմբկահար Թրեվիս Բարքերը: «Կասեցրեք ցեղասպանությունը, փրկեք Քեսաբը: Շատ բարեկամ հայեր ունեմ, որոնց սիրում եմ ու սատարում, որոնք ասես իմ ընտանիքը լինեն»,- գրել է երաժիշտն Instagram-ում: Անկախ մարզական մեկնաբան Մաքսիմ Սոկերմանը նույնպես գրառում է կատարել. «Տիպիկ է Արևմուտքի համար. Ղրիմի անարյուն միահամուռ միացումը Ռուսաստանին դարի հանցագործություն է, իսկ հայերի ցեղասպանությունը Քեսաբում՝ նորմալ է»: Էջում զետեղված է նաև ավստրալահայերի հայտարարությունն այն մասին, որ ապրիլի 2-ին Սիդնեյում տեղի կունենա բողոքի ակցիա Քեսաբում հայերի ջարդի դեմ: Արդեն մի քանի օր է Քեսաբում ողբերգական իրադարձություններ են ծավալվում: Թուրքական կողմը՝ խախտելով միջազգային օրենքներն ու պարտավորությունները, գնդակոծել է հայկական գյուղերն ու ավանները, այնուհետև ճանապարհ բացել ապստամբների համար, որպեսզի նրանք գրավեն հայաբնակ շրջանը: Քեսաբը Սիրիայի ու Թուրքիայի սահմանին է, այնտեղ հազարավոր հայեր են ապրում, կան հայաբնակ բնակավայրեր, համայնքային ու կուսակցական հաստատություններ, դպրոցներ ու հիվանդանոցներ: Գրոհայինների հարձակումից հետո մոտ 500 հայ ընտանիք Քեսաբից տարհանվել ու ապաստանել են Լաթակիայում: Այս մասին ասվում է ՀՀ ԱԺ պատգամավորների հայտարարության մեջ, որոնք գնահատել են կատարվածը որպես մարդու իրավունքների խախտում և դատապարտում են թուրքական ուժերի գործողությունները, որոնք, ըստ էության, մարտահրավեր են հայ համայնքին, որն ապաստան է գտել Սիրիայում Հայոց ցեղասպանությունից հետո: «Կոչ ենք անում Սիրիայի ու Թուրքիայի իշխանություններին իրադարձությունների անաչառ հետաքննություն անցկացնել, պահանջում ենք, որ միջազգային հանրությունը համարժեք գնահատական տա մարդու իրավունքների այդ սարսափելի խախտմանը, որպեսզի ՄԱԿ-ը դիտորդներ ուղարկի Քեսաբ: Կոչ ենք անում նաև Հայաստանի կառավարությանը միջոցներ ձեռնարկել, իսկ համաշխհարհային հայությանը՝ միավորել ջանքերը, սատարելու համար մեր հայրենակիցներին»,- ասվում է հայտարարության մեջ, որը ստորագրել են Սամվել Ֆարմանյանը, Էդմոն Մարուքյանը, Արման Սահակյանը, Թևան Պողոսյանը, Արթուր Գևորգյանը, Նաիրա Կարապետյանը և Լևոն Մարտիրոսյանը: Քեսաբի գրավումն արժանացել է ամբողջ աշխարհի հայության քննադատական արձագանքին: Երևանում ՄԱԿ-ի ներկայացուցչության մոտ ցույց է եղել՝ Սիրիայում անօրինական զինված խմբավորումների կողմից ազգային և կրոնադավանական փոքրամասնությունների հետապնդմանը վերջ դնելու պահանջով: Միաժամանակ Հայաստանի ղեկավարությունը երախտագիտություն է հայտնել Սիրիայի իշխանություններին հայ բնակչության պաշտպանության համար: Ամերիկայի Հայ դատի հանձնախումբը ԱՄՆ նախագահ Բարաք Օբամային և Կոնգրեսին կոչ է արել ճնշում գործադրել Անկարայի վրա և նրան ստիպել դադարեցնել աջակցությունը զինյալներին, որոնք հարձակվել են Քեսաբի խաղաղ բնակչության վրա: ՀՀ ԱԺ պատգամավոր Արման Սահակյանը Facebook-ի իր էջում զետեղել է քեսաբահայերի կոչը համայն հայությանը: «Այսօր՝ 2014թ.-ի մարտի 21-ին, Մայրերի օրը, մեր գեղեցիկ քաղաքը Թուրքիայի կառավարության կողմից նյութատեխնիկական աջակցություն ստացող «Ալ-Քաիդայի» եւ «Ճակատ ան-Նուսրա» ծայրահեղական խմբավորման կողմից հարձակման է ենթարկվել: Մենք սարսափահար արթնացել ենք լուսաբացից շատ առաջ հրթիռների ձայնից, որոնք ընկնում էին մեր քաղաքի վրա: Հազարավոր ծայրահեղականներ հատելեն մեր քաղաքի սահմանները: Թուրքական կողմը որդեգրել է գեղեցիկ Քեսաբի ոչնչացման քաղաքականություն Օսմանյան կայսրությունում Հայոց ցեղասպանության 100-ամյա տարելիցի նախօրեին: Քեսաբի հերոսները սկսել են պաշտպանել քաղաքը որսորդական հրացաններով նախքան այն, երբ օգնություն են ստացել Սիրիայի կառավարության կողմից: Եթե Քեսաբի բնակիչներին այդ հերոսները տեղյակ չպահեին տներից հեռանալու մասին, ապա աշխարհն ականատես կդառնար հերթական ցեղասպանության, իսկ լրատվամիջոցները կտարածեին եւս մեկ ապատեղեկատվություն: Դարերի ընթացքում Քեսաբը հազարավոր հայերի տունն էր: Առաջին անգամ Քեսաբը հոգեվարքի մեջ էր 1909թ.-ին, ողբերգական իրադարձությունների ժամանակ, երբ թուրքերը հարձակվեցին քաղաքի վրա, որի հետեւանքով Քեսաբն ավերվեց, տները հրդեհվեցին եւ 161 հայեր դաժանորեն սպանվեցին: 1915թ.-ին, երբ իրագործվեց Հայոց ցեղասպանությունը, թուրքական զորքերը մտան Քեսաբ եւ սկսեցին աքսորել հայերին, սպանվեց վելի քան 5000 հայ: Թուրքիայի իրագործած հայերի ցեղասպանությունը 1.5 մլն հայերի կյանք խլեց: Սակայն այդ թիվը մի քանի անգամ կարող է ավելանալ, թե միջազգային հանրությունը համապատասխան քայլեր չձեռնարկի Սիրիայի հայերին պաշտպանելու համար: Սիրիայում արաբները պաշտպանում են մեզ, նրանք օգնել են մեզ ոտքի կանգնել եւ շարունակել գոյությունը՝ հաղթահարելով սարսափելի հիշողությունները մահի ու կոտորածի մասին, մենք առհավետ պետք է շնորհակալ լինենք նրանց: Մինչ այս պահը մենք ապրում էինք այլադավանների հետ խաղաղության ու ներդաշնակության պայմաններում, որպես մեծ հայկական ընտանիք, որպես մեկ տուն, որը կոչվում է Սիրիա: Այսօր մենք նույնպես օգնության կարիք ունենք, քանի որ թուրքական կառավարությունը, ցավոք, համարձակվել է հարձակում գործել հայերի վրա՝ անտեսելով Հայ Դատը: Այդ կերպ Թուրքիայն դարձյալ հրաժարվում է ճանաչել Հայոց ցեղասպանությունը եւ հնարավոր ամեն ինչ անում է, որպեսզի այսօր էլ ավելի շատ հայեր մահանան: Մենք թուրք ժողովրդի դեմ ոչինչ չունենք: Մենք ապրել ենք նրանց կողքին, որպես հարեւաններ եւ ինչ-որ փոփոխություն չենք ցանկանում: Թուրքական կառավարությունն աջակցելով Քեսաբի բնակիչների սպանությունը, աջակցում է ահաբեկիչներին, որոնց դեմ ուղղված է մեր կոչը: Մենք պարզապես ցանկանում ենք վերադարձնել մեր քաղաքը կամ այն, ինչ մնացել է նրանից, YouTube-ում շատ հոլովակներ վկայում են այն մասին, որ ծայրահեղականները հրդեհում ու ոչնչացնում են մեր գեղեցիկ քաղաքը: Սիրիան շատ լավ գիտի, որ այնտեղ, ուր հայտնվում են այդ ծայրահեղականները, ոչինչ և ոչ ոք կենդանի չի մնում: Մեզանից խլել են մեր սեփական տները, դարերի մեր ժառանգությունն անխնա ոչնչացվել է: Այս կոչն ուղղում ենք բոլոր հայերին: Այս կոչն ուղղում ենք համայն մարդկությանը: Էրդողանն ու իր կառավարությունը ռազմական հանցագործներ են: Մենք Ձեր օգնության կարիքն ունենք: Կարիք ունենք, որպեսզի Դուք համապատասխան միջոցներ ձեռնարկեք: Մեր կյանքը կախված էձեզանից, ձեր որոշումներից: Մենք այլեւս ոչինչ չունենք, բացի հագուստը, որն այժմ կրում ենք: Եթե մենք հավաքեինք առաջին անհրաժեշտության իրերը, ապա հավանական է այլեւս ողջ չլինեինք: Շատերը չեն հասցրել անձնագիրն ու այլ փաստաթղթեր վերցնել: Խնդրում ենք Ձեզ դիմել ձեր երկների կառավարություններին, ՄԱԿ-ին կամ այլ կառույցներին տվյալ գործին միջամտելու համար: Միայն ապրել ենք ցանկանում: Եթե դուք անտեսեք այս խնդրանքը, մենք ծայրահեղականների կողմից կոչնչացվենք, նույն այն կերպ, ինչպես որ եղել է Հալեպում, Յակուբիայում, Ղենեմիում և Սիրիայի ողջ տարածքում: Նրանք, որոնց դուք անվանում եք ապստամբներ, իրկանում արմատականներ են: Այդպիսի խմբավրումների կազմում կան տարբեր ազգության ներկայացուցիչներ՝ աֆղաններ, չեչեններ, Սաուդյան Արաբիայից եկածներ եւ այլն: Քեսաբի բնակիչները եւ ողջ Սիրիան ականատես է եղել, թե ինչպես են նրանք հարձակվել խաղաղ բնակիչների վրա ու սպանել նրանց: Լրատվամիջոցները չեն կարող մշտապես թաքցնել ճշմարտությունը: Դուք միշտ չեք կարող ղեկավարել մարդկային կյանքերը: Այսպես կոչված ապստամբները հարձակվում են խաղաղ բնակիչների վրա: Մենք ձեզ խնդրում ենք ուշքի գալ: Դու չեք կարծում, որ արդեն բավական անմեղ արյուն է թափվել: Չեք կարծում, որ բավական հարձակումներ են գործվել: Երեք տարի մենք ապրել ենք խաղաղ ու երջանիկ: Սա հեղափոխություն չէ, այլ՝ պատերազմ: Սիրիական բանակը հիմա պայքարում է Քեսաբում, որպեսզի ապահովի հայերի անվտանգ վերադարձն իրենց տներ: P.S. Այս նամակը գրել են Քեսաբի բնակիչները, որոնք ապաստան են գտել Լաթաքիայի հայկական եկեղեցում»: Անցած շաբաթ Սենատի Կոմիտեի արտաքին գործերի հանձնախմբի նախագահ Ռոբերտ Մենենդեսը ողջունել է Հայաստանին աջակցող խմբի համանախագաներ Ֆրենկ Փալոունի և Մայքլ Գրիմի, Հայոց ցեղասպանության վերաբերյալ բանաձևի հեղինակներ Ադամ Շիֆի ու Դևիդ Վալդաոյի հայտարարությունները, ինչպես նաև Բրեդ Շերմանի, Ջիմ Կոստայի և Ջեյմս Մակհովերնի Քեսաբի վրա հարձակման դատապարտումը և կոչ արել Պետքարտուղարությանն անհապաղ միջոցներ ձեռնարկել բնակչությանը պաշտպանելու ուղղությամբ: Իր նամակում սենատոր Մենենդեսը նշել է, որ խորապես մտահոգված է մարտի 21-ի հաղորդագրություններով սիրիական հայաշատ Քեսաբ քաղաքի վրա Թուրքիայի տարածքից «Ալ Քայիդայի» հետ կապված գրոհայինների հարձակումների մասին: «Այդպիսի հարձակումները շատ վտանգավոր են, քանի որ սիրիական փոքրամասնությունները դառնում են իսլամիստների թիրախը: Ես դատապարտում եմ նման բոլոր հարձակումներն ինչպես հայերի, այնպես էլ բոլոր քրիստոնյաների վրա»,- ասել է Մենենդեսը: Նախագահ Օբամային հասցեագրված նամակում կոնգրեսականներ Ադամ Շիֆը, Մայքլ Գրիմն ու Դևիդ Վալդաոն հայտարարել են, որ այս իրադարձությունները հիշեցնում են Օսմանյան կայսրությունում Հայոց ցեղասպանության առաջին օրերը: «Համարում ենք, որ այժմ Ամերիկան պետք է բազմապատկի ջանքերն, ուղղված Մերձավոր Արևելքում քրիստոնյա փոքրամասնության պաշտպանության ապահովմանը», -ասվում է նամակում: Ըստ կոնգրեսական, մարդու իրավունքների հանձնաժողովի համանախագահ Ջեյմս Մակհովերնի, Միացյալ Նահանգներն ու միջազգային հանրությունը պետք է մանրակրկիտ ու արդար հետաքննություն սկսի՝ պարզելու համար Թուրքիայի դերը Քեսաբի դեմ հարձակման մեջ: Կոնգրեսականներ Շիֆն ու Շերմանը էջ են բացել Twitter-ում #SaveKessab հեշթեգով, որտեղ հազարավոր օգտատերեր գրել են Քեսաբում հումանիտար ճգնաժամի մասին և իսլամիստներին Թուրքիայի աջակցության մասին: «Ալ Քայիդայի» հետ կապ ունեցող ահաբեկիչների դաժան հարձակումները հայերի և Քեսաբի մյուս քրիստոնյաների վրա սարսափելի են ու անթույլատրելի»,- գրել է կոնգրեսական Շիֆը: Նախօրեին ԱՄՆ Պետքարտուղարությունում ամենօրյա ճեպազրույցի ժամանակ գերատեսչության պաշտոնական ներկայացուցիչ Մարի Հարֆը հայտարարել է, որ Պետքարտուղարությունը խորապես մտահոգված է Սիրիայի հայաշատ հին հայկական Քեսաբ քաղաքում ստեղծված իրավիճակով, հայտնում է Ամերիկայի Հայ Դատի հանձնախումբը (ANCA): Միևնույն ժամանակ Պետքարտուղարությունը չի դատապարտել Թուրքիայի դերը քաղաքի վրա հարձակման գործում: «ANCA-ն ողջունում է մտահոգությունը Քեսաբի դեմ հարձակումների վերաբերյալ և մտադիր է շարունակել խորհրդակցություններն այդ հարցի շուրջ Պետքարտուղարության ներկայացուցիչների հետ: Մենք մտադիր ենք մատնանշել հայերի, բոլոր քրիստոնյաների ու այլ փոքրամասնությունների դեմ ուղղված բռնության կոնկրետ փաստերը Քեսաբում, Հալեպում և Սիրիայի այլ շրջաններում: Մենք նախկինի պես մտահոգված ենք իրավիճակով և համարում ենք, որ ԱՄՆ վարչակազմի լռությունը վկայում է Թուրքիայի աջակցության մասին ահաբեկիչներին և կոչ ենք անում Օբամայի վարչակազմին կասեցնել Թուրքիայի մասնակցությունը Սիրիայի հայ բնակչության դեմ գրոհներին, իսկ պետքարտուղար Քերին պետք է հանդես գա Թուրքիային ուղղված ուղերձով», -հայտարարել է կազմակերպության նախագահ Քեն Խաչիկյանը: Մարի Հարֆը նշել է, որ «տուժածների թվում շատ են քաղաքացիական անձիք, բոլոր նրանք և նրանց սրբությունները պետք է պաշտպանված լինեն: Մենք վաղուց ենք մտահոգություն հայտնում Սիրիայի հայ համայնքի հանդեպ ծայրահեղականներից բխող սպառնալիքի վերաբերյալ»: Ամերիկայի երիտասարդական ֆեդերացիան ուրբաթ օրը մամուլի ասուլիս էր կազմակերպել ԱՄՆ հայ համայնքի անդամների մասնակցությամբ, որից հետո բողոքի ցույց տեղի ունեցավ Լոս Անջելեսում թուրքական հյուպատոսության դիմաց: Բողոքի ակցիային մասնակցել է նաև Լոս Անջելեսի քաղաքային խորհրդի անդամ Փոլ Քրեքորյանը և Կալիֆորնիայի հայ համայնքի առաջնորդները: Արդեն մի քանի օր է սիրիական հայաբնակ Քեսաբում ողբերգական իրադարձություններ են կատարվում: Քեսաբը Սիրիայի ու Թուրքիայի սահմանին է, այնտեղ հազարավոր հայեր են ապրում, կան հայաբնակ բնակավայրեր, համայնքային ու կուսակցական հաստատություններ, դպրոցներ ու հիվանդանոցներ: Մարտի 21-ին, խախտելով բոլոր միջազգային իրավունքներն ու նորմերը, թուրքական կողմը գնդակոծեց Սիրիայի հայաբնակ գյուղերն ու ավանները, իսկ հետո ճանապարհ բացեց գրոհայինների համար, որպեսզի նրանք գրավեն հայկական բնակավայրերը: Գրոհայինների հարձակումից հետո մոտ 400 հայ ընտանիքներ (այլ տվյալներով մոտ 600 ընտանիք) Քեսաբից տարհանվել ու ապաստանել են Լաթակիայում, իսկ մի քանի մարդու ճակատագիրն անհայտ է մնում: Ապստամբները պղծել են Քեսաբի եկեղեցին, թալանել տներն ու քանդել մի շարք կառավարական շենքեր: Շաբաթվա սկզբին ինտերնետում զետեղվել է Թուրքիայի պաշտոնյաների մասնակցությամբ գաղտնի խորհրդակցության ձայնագրությունը, որի ընթացքում քննարկվում են Թուրքիայի գաղտնի ծրագրերը Սիրիայի վերաբերյալ: Սիրիայում քաղաքացիական պատերազմի տարիներին 70 հայ է զոհվել: Հայերը Սիրիայում հիմնականում բնակվում են Հալեպում ու Դամասկոսում: Մինչ պատերազմը հայ համայնքը հասնում էր 80 հազարի: Այժմ մոտ 20 հազար հայ հեռացել է Սիրիայից, հիմնականում մեկնելով Հայաստան, Լիբանան ու ԱՄՆ: Ուշագրավ
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը Ամենաընթերցվողը բաժնում | Գասպարյան․ 2022-ի սեպտեմբերի 13-ին զոհված 2 զինվորի դիերը դեռ միջդիրքային հատվածում են Չնայած նրան, որ հայկական կողմը Ադրբեջանին է տրամադրել դիերի կոորդինատները, սակայն մինչ օրս որևէ պատասխան չի ստացվել ԱՄՆ կոնգրեսականին մեղադրանք է առաջադրվել Ադրբեջանից տարիներ շարունակ կաշառք ստանալու համար Նույն գործով անցնում է նաև կոնգրեսականի կինը Բագրատ սրբազան․ Կիրանցից քայլերթով շարժվում ենք Երևան Նախատեսում են Երևան հասնել մայիսի 9-ին Կիրանցի բնակչուհի. Արդեն մենք չենք ուզում, որ ոստիկանները գնան՝ ականները հանել են, այլևս անվտանգ չէ «Երեկ ականազերծել են, թե ինչու են ոստիկանները գյուղում մնացել չգիտեմ»,–ասել է նա |