Ուսումնասիրություն. Ներքաղաքային տրանսպորտի ուղեվարձի արդյունավետ գներ են 207 և 252 դրամ 4 ապրիլի 2014 - 17:34 AMT PanARMENIAN.Net - IPSC քաղաքական և սոցիոլոգիական խորհրդատվությունների ինստիտուտը կատարել է Երևան քաղաքի վերգետնյա տրանսպորտային միջոցների ուղևորահոսքի ուսումնասիրություն, որը հիմնված է սոցիոլոգիական հարցումների վրա, և հանգել եզրակացության, որ Երևանում տրանսպորտը չի կարող շահագործվել 100 դրամ ուղեվարձով: Միջազգային ուսումնասիրությունը ներկայացվել է քաղաքապետարանում ապրիլի 4-ին տեղի է ունեցած ներքաղաքային ուղևորափոխադրումների վարձի ձևավորման նպատակով ստեղծված հանձնաժողովի հերթական նիստի ժամանակ, գրում է Tert.am-ը: Ուսումնասիրելով տրանսպորտային ծախսերը՝ հանգել են եզրակացության, որ 15% շահութաբերության պարագայում արդյունավետ գներ են միկրոավտոբուսի համար 207, իսկ համապատասխանաբար դիզել և գազով շահագործվող ավտոբուսների համար 252 և 176 դրամ: Իսկ առանց շահութաբերության միկրոավտոբուսների ուղեվարձը պետք է լինի 180 դրամ, դիզելով և գազով ավտոբուսներինը՝ 219 և 170 դրամ։ Ուսումնասիրությունը ներկայացնելուց առաջ նիստին ներկա «Սպառողների միության» նախագահ Արմեն Պողոսյանը հայտարարել է, որ մայրաքաղաքի տրանսպորտը գահավիժում է, իսկ հանձնաժողովի նախագահ, քաղաքապետի տեղակալ Վահե Նիկոյանն էլ պահանջել ներկայացնել ուսումնասիրությունը: Քննարկումը շարունակվել է նաև ուսումնասիրությունը ներկայացնելուց հետո։ Վահե Նիկոյանն ասել է, որ առաջարկներ կներկայացնեն նաև իրենց հաշվարկների վերաբերյալ, և առաջարկել, որ հանձնաժողովի մյուս անդամները նույնպես ներկայացնեն իրենց առաջարկները. «Մենք պատրաստ ենք յուրաքանչյուրի ներկայացրած ուսումնասիրությունը քննարկել, խնդրում եմ նախաձեռնող լինել»: Քաղաքապետ Տարոն Մարգարյանը մարտի 19-ին, անդրադառնալով Երևանի քաղաքային տրանսպորտի թանկացման խնդրին, նշել էր. «Տևական ժամանակ է, ինչ որոշ լրատվամիջոցներ ժամկետներ են հրապարակում, թե այսինչ օրը ուղեվարձը կթանկանա: Վերջին այդպիսի հրապարակման մեջ ասվում էր, որ ուղեվարձն այս տարվա ապրիլի մեկից թանկանալու է: Պաշտոնապես հայտարարում եմ, որ ուղեվարձն այս տարվա ապրիլի մեկից չի թանկանալու»: 2013 թվականի հուլիսի 1-ից Երևանում քաղաքային տրանսպորտի ուղեվարձի սակագինը սահմանվել էր 150 դրամ, ինչը բողոքի ալիք էր բարձրացրել հասարակության շրջանում: Մարդիկ հրաժարվում էին վճարել 150 դրամ, երթեր ու ցույցեր էին կազմակերպում, բոլորին հորդորում շարունակել վճարել 100 դրամ: Արդյունքում` 2013-ի հուլիսի 25-ին Տարոն Մարգարյանը կասեցրեց քաղաքային տրանսպորտի ուղեվարձը 150 դրամ սահմանելու մասին որոշումը. «Ես արդեն իսկ հանձնարարել եմ ստեղծել մասնագետներից և շահագրգիռ անձանցից կազմված հանձնաժողով, որը կհասցնի մի քանի ամիսների ընթացքում մշակել բոլոր այն մեխանիզմները, որոնք թույլ կտան ամբողջական դարձնել որոշումը, իսկ մինչ այդ այս որոշման գործողությունը իմ կողմից կկասեցվի»: Երևանի ներքաղաքային ուղևորափոխադրումների վարձի ձևավորման և կիրառման մեխանիզմների քննարկման, ինչպես նաև խնդրի առնչությամբ քաղաքացիական հասարակությանը հուզող հարցերի համակողմանի և լիարժեք տեղեկատվություն տրամադրելու նպատակով Երևանի քաղաքապետ Տարոն Մարգարյանի նախաձեռնությամբ ստեղծված հանձնաժողովն արդեն իսկ երեք նիստ էր գումարել` առաջինը` սեպտեմբերի 27-ին: Նիստի ընթացքում Վահե Նիկոյանը հանձնաժողովի անդամների քննարկմանն է ներկայացրել Երևանի քաղաքապետի 2012 թվականի մարտի 30-ի 2911-Ա որոշմամբ հաստատված Երևան քաղաքի ներքաղաքային կանոնավոր ուղևորափոխադրումների երթուղային ցանցի այն հիմնական չափորոշիչները, որոնք կարող են հիմք հանդիսանալ ուղևորափոխադրումների վարձի ձևավորման համար` երթուղային ցանցի ցուցանիշների ապահովում, շարժակազմի՝ երթուղիներում շահագործվելու թույլատրելի ժամկետի սահմանափակում, անսարք մեքենաների երթուղի դուրս գալը բացառելը, վարորդների վարքագծի կանոնների սահմանումը և ապահովումը (արտաքին տեսք, սպասարկման որակ, վարք, արտահագուստ): Չափորոշիչների շարքում տեղ է գտել նաև հաշմանդամություն ունեցողների համար հասարակական տրանսպորտից (ավտոբուսներից) օգտվելու ապահովումը: Հանձնաժողովի երկրորդ նիստին, որը գումարվել է հոկտեմբերի 25-ին, ներկայացվել է ծախսերի հաշվարկը, այսինքն՝ այն ծախսերը, որոնք ամսվա կամ տարեկան կտրվածքով անում են երթուղագիծ շահագործող տնտեսվարողները, որից էլ պետք է գոյանա նոր ուղեվարձի հաշվարկը: Երրորդ նիստին` դեկտեմբերի 26-ին, հանձնաժողովի նախագահ՝ Երևանի քաղաքապետի տեղակալ Վահե Նիկոյանը նշել էր, որ. «Հանձնաժողովն աշխատում է, և աշխատանքի արդյունքները, բնականաբար, կներկայացվի հանձնաժողովի քննարկմանը, թե ծախսային մասով, օպտիմալացնելու և ուղևորահոսքի հետազոտությունները, որից հետո նոր միայն կարող է խոսք գնալ ինքնարժեքի հաշվարկի, այնուհետև նաև սակագնի ձևավորման մասին, այսինքն՝ այն շահարկումները, որ հունվարի մեկից, կամ չգիտեմ, տարբեր ժամկետներ էին շահարկում, չեն համապատասխանում իրականությանը»,-ասել է Վահե Նիկոյանը: Ուշագրավ
«Ամեն բնակչի կողքին 15 ոստիկան է կանգնած, անձնագրով են ներս թողնում միայն Կիրանցի բնակիչներին»,–ասել է վարչական ղեկավարը Որոշ դեպքերում անձանց ազատությունից զրկելիս չեն ներկայացվում նրանց ազատությունից զրկելու հիմքերն ու պատճառները Պահանջն առնչվում է նրա հետ փոխկապակցված 7 անձի Վարդանյանն ասել է, որ գտնվում է մեկուսացման խցում Ամենաընթերցվողը բաժնում | Զախարովա․ ՀՀ-ն շարունակում է ՀԱՊԿ լիարժեք անդամ մնալ իր համապատասխան պարտավորություններով Նա նաև ասել է, որ ՌԴ–ն կասկածի տակ չի դնում իր արտաքին քաղաքական կուրսն ընտրելու ՀՀ սուվերեն իրավունքը Կուպմանը Բաքվում ասել է, որ Եվրահանձնաժողովը ողջունում է ՀՀ-ի և Ադրբեջանի միջև վերջին պայմանավորվածությունները Նա ասել է, որ Եվրահանձնաժողովում դրական են գնահատում Հարավային Կովկասում վերջին իրադարձությունները ԱՄՆ–ն պատժամիջոցներ է սահմանել որոշ թուրքական և ադրբեջանական ընկերությունների դեմ՝ ՌԴ–ին աջակցելու համար Պատժամիջոցներն առնչվում են այն ընկերություններին և ֆիզիկական անձանց, որոնք օգնում են Մոսկվային ռազմական բաղադրիչներ ստանալ Էրդողան․ Թուրքիան որոշել է խզել առևտրային կապերն Իսրայելի հետ Առևտրաշրջանառությունը երկրների միջև հասնում է 9․5 մլրդ դոլարի |