Փարիզի քաղաքապետ. Իրերն իրենց անուններով է պետք կոչել՝ Ցեղասպանության ճանաչումը թուրք ժողովրդին է պետք25 ապրիլի 2014 - 18:37 AMT PanARMENIAN.Net - Ապրիլի 24-ին Փարիզի քաղաքապետարանի ընդունելությունների սրահում տեղի ունեցավ Հայոց ցեղասպանության զոհերի հիշատակին նվիրված ավանդական միջոցառումը, որն այս տարի նախաձեռնել էր Փարիզի քաղաքապետ Անն Իդալգոն: Միջոցառմանը մասնակցել են քաղաքային իշխանությունների ներկայացուցիչներ, պատգամավորներ, սենատորներ, քաղաքական, մշակույթի գործիչներ, հարյուրավոր ֆրանսիացիներ և ֆրանսահայեր: Ինչպես հայտնում է ՀՀ ԱԳՆ մամուլի ծառայությունը, Հայոց ցեղասպանության զոհերի հիշատակին նվիրված միջոցառումը բացեց Անն Իդալգոն: Իր հայտարարության մեջ նա ասաց, որ երևույթները պետք է կոչել իրենց անուններով և ընդգծեց, որ Թուրքիայի իշխանությունների կողմից Հայոց ցեղասպանության ճանաչումը անհրաժեշտություն է ողջ թուրք ժողովրդի համար: Փարիզի քաղաքապետը խոսեց Հայոց ցեղասպանության հարյուրամյակի շրջանակներում մայրաքաղաքի իշխանությունների կողմից անցկացվելիք միջոցառումների՝ մասին: Այնուհետև ելույթներով հանդես եկան Ֆրանսահայ կազմակերպությունների համակարգման խորհրդի համանախագահներ Ֆրանկ Փափազյանը և Արա Թորանյանը, որոնք, մեկնաբանելով Թուրքիայի վարչապետի նախօրեին արված հայտարարությունները, ընդգծեցին Թուրքիայի իշխանությունների կողմից ժխտողական կեցվածքի անարդյունավետ լինելը: Միջոցառման եզրափակիչ խոսքով հանդես եկավ Ֆրանսիայում Հայաստանի դեսպան Վիգեն Չիտեչյանը: Շնորհակալություն հայտնելով Փարիզի նորընտիր քաղաքապետին ավանդական ընդունելության շարունակականությունն ապահովելու համար՝ դեսպան Չիտեչյանը նշեց. «Հայոց ցեղասպանության զոհերի հիշատակին հավատարմությունը, մարդու և ժողովուրդների համընդհանուր իրավունքների և արժեքներին նվիրվածությունը Ֆրանսիայի մեծության վկայություններն են: Աշխարհի մայրաքաղաքներից մեկը՝ Փարիզը, ոգեկոչում է մեր նախնիների հիշատակը: Արդեն տարիներ Ֆրանսիան, որը օրենքի ուժով Հայոց ցեղասպանությունը ճանաչած առաջին երկիրն է, նախագահի մակարդակով է հարգանքի տուրք մատուցում զոհերի հիշատակին: Հայաստանը գիտակցում և կարևորում է այս ամենը»: ՀՀ դեսպանն այնուհետև անդրադարձավ Թուրքիայի պաշտոնական դիրքորոշմանը` փաստելով, որ «Թուրքիայի իշխանությունները այդպես էլ չեն կարողանում առերեսվել անցյալին և շարունակում են օրեցօր ավելի մխրճվել իրականության խեղաթյուրման անօգուտ քաղաքականության մեջ: Ավարտելով իր ելույթը՝ դեսպան Չիտեչյանը հայտնեց, որ Անն Իդալգոն որպես հայ ժողովրդի բարեկամ միշտ սպասված է Հայաստանում և Փարիզի քաղաքապետին հանդիսավոր կերպով փոխանցեց Երևանի քաղաքապետ Տարոն Մարգարյանի կողմից նրան ուղղված պաշտոնական հրավերը: Ավելի վաղ Ֆրանսիայի հայ համայնքը հիասթափություն էր հայտնել Թուրքիայի վարչապետ Էրդողանի հայտարարության առնչությամբ: RFI-ին տված հարցազրույցում Ֆրանսիայի հայ համայնքի համակարգող խորհրդի համանախագահ, ՀՅԴ համանախագահ Մուրադ Փափազյանը հայտարարեց. «Մենք հիասթափված ենք այդ ցավակցությունից, ինչպես ընդհանուր առմամբ թուրք վարչապետի ելույթից: Մեր կարծիքով, նրա նպատակն էր ազդել միջազգային հասարակական կարծիքի վրա: Նա հրապարակավ ցավակցություն հայտնեց, սակայն, նրա ելույթի տեքստն ընթերցելիս ակնհայտ է դառնում, որ նրա դիրքորոշումը չի փոխվել»: Օրերս Թուրքիայի վարչապետ Էրդողանը հանդես եկավ հայտարարությամբ նվիրված Հայոց ցեղասպանության տարելիցին: Հայտարարության մեջ մասնավորապես ասվում էր. «Հույսով և հավատով, որ նմանատիպ սովորություններ ու ավանդույթներ ունեցող հին ժողովուրդները, որոնք միևնույն, բարդ աշխարհագրական տարածքին են պատկանում, կարող են միասին ու արժանի կերպով հիշել իրենց անցյալն ու կորուստները: Մենք ցանկանում ենք, որ 20-րդ դարի սկզբին զոհված հայերի հոգիները խաղաղությամբ հանգչեն, իսկ նրանց թոռներին հայտնում ենք մեր ցավակցությունը: Մենք հիշում ենք Օսմանյան կայսրության բոլոր քաղաքացիներին, ինչ կրոն էլ նրանք դավանեն և ինչ ազգության էլ պատկանեն, որոնք զոհվեցին այդ շրջանում նման պայմաններում: Թող հանգչեն խաղաղությամբ»: Մուրադ Փափազյանը նշեց, որ թուրքական կառավարությունը միշտ պնդել է, որ Առաջին համաշխարհային պատերազմի ժամանակ կոտորածներ են եղել ինչպես մի կողմից, այնպես էլ մյուս: «Ցավակցական խոսքեր հնչեցին 1915 թ. զոհված հայերի ժառանգներին, սակայն թուրքական կառավարությունը միշտ հերքել է ինչպես զոհերի քանակը, այնպես էլ այն, որ դա ցեղասպանություն էր: Եվ, ավաղ, շարունակում է դա անել: Ցեղասպանությունը ցեղասպանություն է, և պարոն Էրդողանը պետք է այն ճանաչի: Դրան է սպասում ողջ հայ ժողովուրդը, դրան է սպասում միջազգային հանրությունը»: Ըստ նրա, Ցեղասպանության 100-ամյա տարելիցից մեկ տարի առաջ Էրդողանը հնարավորություն ուներ ճանաչել այն և սկսել հատուցման գործընթացը: «Սակայն, մենք մտավախություն ունենք, որ, հակառակը, դա փորձ էր սաստկացնել ժխտողականությունը: Ամեն դեպքում, այն զգացողությունը կա, որ Թուրքիան ցավակցություն է հայտնել, և դա արդեն մեծ բան է: Թեև ցեղասպանությունը մնում է ցեղասպանություն և այն պետք է ճանաչել»: Ընթերցելով Էրդողանի հայտարարությունն, ակնհայտ է դառնում, որ այն ոչ մի նոր բան չի պարունակում ցավակցությունից բացի, նշել է Փափազյանը: Նա մտավախություն է հայտնել, որ դա ուղղված էր միջազգային հանրությանը, որպեսզի Ցեղասպանությունը ճանաչելու պահանջը ժամանակավրեպ թվա: «Մեկ տարի է մնացել մինչև Հայոց ցեղասպանության 100-ամյա տարելիցը: Թուրքիան իրազեկ է, որ միջազգային հանրությունը պատրաստվում է այդ տարելիցին, ուստի իր հայտարարություններով ցավակցությունների մասին ջանում է նսեմացնել այդ տարեթվի կարևորությունը», հայտնում է Armenia Today-ը: Photo: ndf.fr Հայոց ցեղասպանություն Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին: Ուշագրավ Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը
«Կշարունակենք այն վնասի հատուցման ուղիների քննարկումը, որը հասցնում է այդ աննախադեպ ճնշումը»,–ասել է նա Ամենաընթերցվողը բաժնում | Ֆասթ Բանկը մեկնարկել է դրամային պարտատոմսերի նոր տրանշի տեղաբաշխումը Բանկի պարտատոմսերը թողարկվել են 30 ամիս մարման ժամկետով Քաղաքացիները փակել են Երևան–Արմավիր ճանապարհը, Գյումրիում երթ է Մի խումբ քաղաքացիներ էլ երթ են անցկացնում Գյումրիում՝ կոչ անելով միանալ բողոքի ակցիաներին ՊՆ․ Բերքաբերից 1540 մ հյուսիս-արևելք պայթեցում է կատարվել Նախարորությունը նախապես հայտնել էր պայթյունի մասին Փաշինյանը՝ Բլինքենին․ Ամեն ինչ կարվի Տավուշի գյուղերի լեգիտիմ մտահոգությունները հասցեագրելու համար Զրուցակիցները քննարկել են նաև Հայաստան-ԱՄՆ երկկողմ հարաբերությունների օրակարգի հարցեր |